ଖପ୍ରାଖୋଲ ପୁଲିସ ହାତରେ ପଡ଼ିଲା ଚୋରା ଗାଡ଼ି, ଦୁଇ ଅଭିଯୁକ୍ତଙ୍କୁ କରାଗଲା କୋର୍ଟ ଚାଲାଣ

ଖପ୍ରାଖୋଲ: ବଲାଙ୍ଗିର ଜିଲ୍ଲା ଖପ୍ରାଖୋଲ ପୁଲିସକୁ ମିଳିଛି ବଡ଼ ସଫଳତା। ପୁଲିସ୍‌ ରାତିରେ ପାଟ୍ରୋଲିଂ କରୁଥିବା ବେଳେ ଏକ ଚୋରା ଗାଡ଼ି ଧରିବା ସହ ଦୁଇ ଗାଡ଼ି ଚୋରକୁ ଧରି ମଙ୍ଗଳବାର କୋର୍ଟ ଚାଲାଣ କରିଥିବା ଜଣାଯାଇଛି।

ସୂଚନା ଅନୁସାରେ ପାଟ୍ରୋଲିଂ କଲା ବେଳେ ଗୋଟିଏ ଟାଟା ଏସି ମାଲବାହୀ ଗାଡିକୁ ଅଟକ ରଖି ପଚରାଉଚରା କରିଥିଲା ପୁଲିସ୍‌। ପଚରାଉଚରା କରିବାରୁ ଗାଡ଼ିଟି ଚୋରି ଗାଡ଼ି ବୋଲି ପୁଲିସ ଜାଣିବାକୁ ପାଇଥିଲା। ଚୋରମାନଙ୍କୁ ପଚରାଉଚରା କରି ଏକ ବୋଲେରୋ ଗାଡି ମଧ୍ୟ ପୁଲିସ ଠାବ କରି ବରଗଡ଼ ଜିଲ୍ଲାରୁ ଉଦ୍ଧାର କରିଥିବା ସୂଚନା ଦେଇଛି।

ଟାଟା ଏସି ଗାଡ଼ିଟି ବୌଦ୍ଧ ଜିଲ୍ଲାର ଓ ବୋଲେରୋ ଗାଡ଼ିଟି ଦେବଗଡ଼ ଜିଲ୍ଲାର ବୋଲି ଜଣାଯାଇଛି। ଏହି ଚୋରି ଘଟଣାରେ ପୁଇନ୍ତଲା ଥାନା କୁଲୁଥିପାଲି ଗାଁର ବୈଷ୍ଣବ ଦଳାଇ ( ୨୮) ଓ ସତ୍ୟନାରାୟଣ ଦଳାଇ ( ୩୦) ଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି। ଏନେଇ ଖପ୍ରାଖୋଲ ଥାନା କେସ ନମ୍ବର ୫୯/୨୩ ରେ ଏକ ମାମଲା ରୁଜୁ କରି ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବା ବେଳେ ଘଟଣାର ତଦନ୍ତ ଚାଲିଥିବା ଥାନା ଅଧିକାରୀ ରମାକାନ୍ତ ସାହୁ ପ୍ରକାଶ କରିଛନ୍ତି।