ବେଆଇନ ଗୋରୁ ଚାଲାଣକାରୀଙ୍କୁ ଅଟକାଇବାକୁ ଯାଇଥିବା ଗୋରକ୍ଷକ ଓ ପୁଲିସ ଉପରକୁ ଢେଲାମାଡ଼
ଆକ୍ରମଣକାରୀଙ୍କୁ ଗିରଫ କରିବାକୁ ଆରକ୍ଷୀ ଅଧିକ୍ଷକଙ୍କୁ ଦାବିପତ୍ର
ଖୋର୍ଦ୍ଧା : ଗତକାଲି ବିଳମ୍ବିତ ରାତିରେ ବେଗୁନିଆରୁ ଖୋର୍ଦ୍ଧା ପଟକୁ ଆସୁଥିବା ବେଆଇନ ଗୋରୁ ଚାଲାଣ କରୁଥିବା ଟ୍ରକ୍କୁ ଅଟକାଇବାକୁ ଯାଇଥିବା ଗୋରକ୍ଷକ ଓ ପୁଲିସ ଉପରକୁ ଗୋରୁଚାଲାଣକାରୀମାନେ ଢେଲାମାଡ଼ କରିଛନ୍ତି । ଏଥିରେ କେହି ଆହତ ହୋଇନଥିଲେ ମଧ୍ୟ ଏହି ଘଟଣା ପୁଲିସ ପାଇଁ ଖୋଲା ଚାଲେଂଜ୍ ସୃଷ୍ଟି କରିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନାନୁସାରେ, ବେଗୁନିଆ କୁଶପଲ୍ଲା ଗାଁରୁ କେତେକ ଲୋକ ବେଆଇନ ଭାବେ ଗୋରୁ ଚାଲାଣ କରୁଥିବା ନେଇ ଖବର ପାଇ ଭୁବନେଶ୍ୱର ଓ ଖୋର୍ଦ୍ଧାରୁ ୮-୯ଜଣ ଗୋରକ୍ଷକ ବେଗୁନିଆ ପୁଲିସକୁ ସୂଚନା ଦେଇଥିଲେ । ବେଗୁନିଆ ପୁଲିସ୍ ସହାୟତାରେ ସେମାନଙ୍କୁ ରାସ୍ତାରେ ଅଟକାଇବା ପାଇଁ ଚେଷ୍ଟା କରିଥିଲେ । ତେବେ ଗୋରୁ ଟ୍ରକ୍ଟି ଦ୍ରୁତଗତିରେ ଖସି ଚାଲିଯାଇଥିଲା । ଗୋରୁ ଚାଲାଣକାରୀ ଟ୍ରକ୍ଟିକୁ ପିଛା କରୁଥିବା ପୁଲିସ ଓ ଗୋରକ୍ଷକଙ୍କୁ ବାଘମାରୀ ପୂର୍ବରୁ ୨୦ରୁ ଉଦ୍ଧ୍ୱର୍ ମୋଟରସାଇକଲ୍ ଓ ୩ଟି ବୋଲେରୋରେ ପ୍ରାୟ ୪୦ଜଣ ଲୋକ ଘେରାବନ୍ଦୀ କରି ଢେଲାମାଡ଼ କରିଥିଲେ । ସେଠାରୁ କୌଣସି ମତେ ଖସି ଆସି ବାଘମାରୀ ପୁଲିସର ସହାୟତାରେ ଖୋର୍ଦ୍ଧା ଗଙ୍ଗପଡ଼ା ଯାଏଁ ଗୋରକ୍ଷକମାନେ ଚାଲିଆସିଥିଲେ ।
ଆଜି ଏହି ଘଟଣାରେ ସମ୍ପୃକ୍ତ ଗୋରକ୍ଷକଙ୍କ ପକ୍ଷରୁ ଜିଲ୍ଳା ଆରକ୍ଷୀ ଅଧିକ୍ଷକ ରାଜ କିଶୋର ଦୋରାଙ୍କୁ ଭେଟି ଗୋରୁ ଚାଲାଣକାରୀଙ୍କ ବିରୋଧରେ ଦୃଢ଼ ପଦକ୍ଷେପ ନେବାକୁ ଦାବି କରିଥିଲେ । ଦାବିପତ୍ରରେ ସେମାନେ ଦର୍ଶାଇଛନ୍ତି ଯେ ବେଗୁନିଆ, ଜମାସାହି, ପରୀକ୍ଷେତ, କୁଶପଲ୍ଲା ଓ କେରଙ୍ଗ ଇଲାକାରୁ ନିୟମିତ ଭାବେ ଶତାଧିକ ଗୋରୁ ବେଆଇନଭାବେ ଚାଲାଣ କରାଯାଉଛି । ଗତକାଲି କୁଶପଲ୍ଲାରୁ ଗୋରୁ ଚାଲାଣ କରୁଥିବା ମାଫିଆଙ୍କ ଆକ୍ରମଣରୁ ସେମାନେ ଓ ବେଗୁନିଆ ପୁଲିସର କେତେକ କର୍ମଚାରୀ ଅଳ୍ପକେ ରକ୍ଷା ପାଇଛନ୍ତି । ଏହି ଅଂଚଳରେ ପୁଲିସ ପାଟ୍ରୋଲିଂ ବ୍ୟବସ୍ଥା ବ୍ୟାପକ କରିବା ସହ ବେଆଇନ ଗୋରୁ ଚାଲାଣକାରୀଙ୍କ ବିରୋଧରେ ଦୃଢ଼ ପଦକ୍ଷେପ ନେବାକୁ ସେମାନେ ଦାବି କରିଛନ୍ତି ।