ପ୍ରଧାନଶିକ୍ଷକଙ୍କ ବଦଳି ପ୍ରତିବାଦରେ ଧାରଣା ଦେଲେ ଛାତ୍ରଛାତ୍ରୀଙ୍କ ସହ ଅଭିଭାବକ
ପାପଡାହାଣ୍ଡି: ଗୁରୁ ଶିଷ୍ୟର ପରମ୍ପରା ନିଆରା ନିଦର୍ଶନ | ନିଜ ପ୍ରଧାନଶିକ୍ଷକଙ୍କ ବଦଳି ଖବର ଦେଲା ଗଭୀର ଦୁଃଖ | ନିଜ କୋହକୁ ସମ୍ଭାଳି ନପାରି ଭୋ ଭୋ ହୋଇ କାନ୍ଦିଲେ ଛାତ୍ରଛାତ୍ରୀ | ପ୍ରିୟର ପ୍ରଧାନଶିକ୍ଷକଙ୍କୁ ବଦଳି ଆଦେଶକୁ ବାତିଲ କରିବାକୁ ଶକ୍ତି ନଥିଲା, ତେଣୁ ଲୁହ ମାଧ୍ୟମରେ ନିଜର ବେଦନାକୁ ଛାତ୍ରଛାତ୍ରୀ ପରିପ୍ରକାଶ କରିଛନ୍ତି | ସେହିପରି ଛାତ୍ରଛାତ୍ରୀ, ଅଭିଭାବକ ଓ ଗ୍ରାମବାସୀ ମିଳିତ ହୋଇ ପ୍ରଧାନଶିକ୍ଷକଙ୍କ ବଦଳି ପ୍ରତିବାଦରେ ଧାରଣା ଦେଇଛନ୍ତି | ଏଭଳି ଏକ ଭାବବିହ୍ଵଳ ଘଟଣା ନବରଙ୍ଗପୁର ଜିଲ୍ଲା ପାପଡାହାଣ୍ଡି ବ୍ଲକ ଡେଙ୍ଗାଗୁଡା ପଂଚାୟତ ଖର୍କି ସରକାରି ଆଶ୍ରମ ବିଦ୍ୟାଳୟଠାରେ ଦେଖିବାକୁ ମିଳିଛି | ଅନ୍ୟ ପଟେ ଛାତ୍ରଛାତ୍ରୀ କାନ୍ଦୁଥିବା ଦେଖିବା ପରେ ସ୍ଥାନୀୟ ସରପଞ୍ଚ ସୁମିତ୍ରା ମାଝୀ, ଏସଏମସି ସଭାପତି ଡିସମ୍ବର ମାଝୀ,ବିଦ୍ୟାଳୟ ପରିଚାଳନା କମିଟି, ଗ୍ରାମବାସୀ ଓ ଅଭିଭାବକ ମିଳିତ ଭାବେ ପ୍ରଧାନଶିକ୍ଷକଙ୍କ ବଦଳି ବାତିଲ କରିବାକୁ ଅଣ୍ଟା ଭିଡିଛନ୍ତି |
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ ଡ଼େଙ୍ଗାଗୁଡ଼ା ଗ୍ରାମପଞ୍ଚାୟତ ଖର୍କି ଆଶ୍ରମ ବିଦ୍ୟାଳୟରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ମୋଟ ୪୫୪ ଛାତ୍ରଛାତ୍ରୀ ପାଠ ପଢୁଛନ୍ତି | ଏଥିରେ ୨୦୦ ଜଣ ଛାତ୍ର ଓ ୧୩୬ ଛାତ୍ରୀ ହଷ୍ଟେଲରେ ରହି ପାଠ ପଢୁଛନ୍ତି | ପ୍ରଧାନ ଶିକ୍ଷକ ଫ୍ରାନ୍ସସିସ ନାଗ ଦୀର୍ଘ ଚାରି ବର୍ଷ ଏହି ବିଦ୍ୟାଳୟରେ ଶିକ୍ଷାଦାନ କରିଆସୁଥିବା ସହ ପ୍ରଧାନଶିକ୍ଷକ ଦାୟିତ୍ୱ ତୁଲାଉଥିଲେ | ତେଣୁ ସମସ୍ତ ଛାତ୍ରଛାତ୍ରୀଙ୍କ ଅତି ନିକଟତର ହୋଇଥିଲେ | ଜଣେ ମାଗଦର୍ଶକ ସହ ଜଣେ ଉତ୍ତମ ବନ୍ଧୁ ଭାବେ ପିଲାକୁ ପ୍ରତ୍ୟେକ କ୍ଷେତ୍ରରେ ପରାମର୍ଶ ଦେଇ ଆସୁଥିଲେ | ପାଠପଢା ସହ ପିଲାଙ୍କ ଉଜ୍ଜଳ ଭବିଷ୍ୟତ ପାଇଁ ତତ୍ପର ଥିଲେ | ଯାହାକି ପିଲାମାନଙ୍କୁ ପ୍ରଭାବିତ କରିଥିଲା |
ନାଗଙ୍କ ସମୟରେ ବିଦ୍ୟାଳୟର ବହୁ ଉନ୍ନତିକରଣ କାର୍ଯ୍ୟ ସହ ଛାତ୍ରୀଛାତ୍ରମାନେ ହଷ୍ଟେଲରେ ରହି ଭଲ ଭାବରେ ସୁବିଧା ପାଉଥିଲେ | ତେଣୁ ପ୍ରଧାନଶିକ୍ଷକଙ୍କ ବଦଳି ହୋଇଯିବ ବୋଲି କେହି କଳ୍ପନା କରିନଥିଲେ | ତେବେ ଆଜି ବଦଳି ଖବର ପାଇବା ପରେ ଛାତ୍ରଛାତ୍ରୀ ଦୁଃଖରେ ଭାଙ୍ଗି ପଡିଛନ୍ତି | ଆଉ ଆଜି ସକାଳ ୯ଘଣ୍ଟାରୁ ଦୁଇ ଘଣ୍ଟା କାଳ ଛାତ୍ରଛାତ୍ରୀ, ଅଭିଭାବକ, ଗ୍ରାମବାସୀ ଧାରଣା ଦେଇଥିଲେ | ଆଜି ବିଦ୍ୟାଳୟ ଛୁଟି ରହିଥିବା ଯୋଗୁଁ ଆସନ୍ତାକାଲି ଉପରିସ୍ଥ ଅଧିକାରୀଙ୍କୁ, ପ୍ରଧାନଶିକ୍ଷକଙ୍କ ବଦଳି ବାତିଲ କରିବାକୁ ଦାବି ଜଣେଇବେ ବୋଲି ସ୍ଥାନୀୟ ଲୋକ କହିଛନ୍ତି |