ଦଶମ ଶ୍ରେଣୀ ଛାତ୍ରଙ୍କ ସନ୍ଦେହଜନକ ମୃତ୍ୟୁ, ହଷ୍ଟେଲ କର୍ତ୍ତୃପକ୍ଷଙ୍କ ଅବହେଳା ଯୋଗୁଁ ଛାତ୍ରଙ୍କ ମୃତ୍ୟୁ ଅଭିଯୋଗ
ରାଇରଙ୍ଗପୁର/ତିରିଂ: ମୟୁରଭଞ୍ଜ ଜିଲ୍ଲା ତଥା ଝାଡ଼ଖଣ୍ଡ ସୀମାନ୍ତ ତିରିଂ ଥାନା ଅନ୍ତର୍ଗତ ଏକ ଆଶ୍ରମ ସ୍କୁଲରେ ଜଣେ ଛାତ୍ରଙ୍କ ମୃତ୍ୟୁ ଘଟିଛି । ସୂଚନାଯୋଗ୍ୟ ଯେ ତିରିଂ ବ୍ଲକ ପଣ୍ଡୁପାଣି ସରକାରୀ ଉଚ୍ଚ ବିଦ୍ୟାଳୟର ଆଶ୍ରମ(ଛାତ୍ରାବାସର) ଜଣେ ଦଶମ ଶ୍ରେଣୀରେ ପଢ଼ୁଥିବା ଛାତ୍ର ମୁନା ମାର୍ଣ୍ଡି(୧୪) ଗତ ରାତିରେ ଖାଇପିଇ ଶୋଇଥିଲେ । ତେବେ ଅନ୍ୟ ଛାତ୍ରଙ୍କ କହିବା ଅନୁଯାୟୀ ଶୋଇବା ସମୟରେ ମୁନାର ଦେହ ଅସୁସ୍ଥ ହୋଇଥିଲା । ତେବେ ସେହି ସମୟରେ ହଷ୍ଟେଲ କର୍ତ୍ତୃପକ୍ଷ କେହି ନ ଥିବାରୁ ହସ୍ପିଟାଲ ନିଆଯାଇପାରିନଥିଲା । ଆଜି ସକାଳ ୮ଟା ସମୟରେ ଅନ୍ୟ ଛାତ୍ରମାନେ ମୁନାକୁ ଖାଇବା ପାଇଁ ଡାକିଥିଲେ । ତେବେ ସେ ନ ଉଠିବାରୁ ମୁନାର ମା ଦାଡି ମାର୍ଣ୍ଡିଙ୍କୁ ଫୋନ କରି ଘଟଣା ସମ୍ପର୍କରେ କହିଥିଲେ ।
Sambad is now on WhatsApp
Join and get latest news updates delivered to you via WhatsApp
ବିଲରେ ତଳି ପକାଉଥିବା ମାଆ ଛୁଆର ଦେହ ଖରାପ ଶୁଣି ଧରମଡିହି ଗ୍ରାମରୁ ଏକ ଅଟୋ ଯୋଗେ ଆଶ୍ରମ ସ୍କୁଲକୁ ଆସିଥିଲେ ଏବଂ ଚିକିତ୍ସା ନିମନ୍ତେ ତିରିଂ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ସେଠାରୁ ତାଙ୍କୁ ରାଇରଙ୍ଗପୁର ଉପଖଣ୍ଡ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା । ତେବେ ଡାକ୍ତର ସେଠାରେ ତାଙ୍କୁ ମୃତ୍ୟୁ ଘୋଷଣା କରିଥିଲେ । ମୃତ୍ୟୁ ଘୋଷଣାର ଏକ ଘଣ୍ଟା ପରେ ବିଦ୍ୟାଳୟ ଶିକ୍ଷକ ହସ୍ପିଟାଲରେ ପହଞ୍ଚିଥିଲେ ।
ତେବେ ଉକ୍ତ ଘଟଣାରେ ଛାତ୍ରାଙ୍କ ମାଆ ହଷ୍ଟେଲ କର୍ତ୍ତୃପକ୍ଷଙ୍କ ଅବହେଳା ଯୋଗୁଁ ତାଙ୍କ ପୁଅର ମୃତ୍ୟୁ ଘଟିଛି ।କାହିଁକି ନା ହଷ୍ଟେଲର ଛୁଆଙ୍କ କହିବା ଅନୁଯାୟୀ ଗତକାଲି ରାତିରେ ମୁନାକୁ ବାତ ମାରିଥିଲା । ଏନେଇ ଛାତ୍ର ମାନେ ହଷ୍ଟେଲ କର୍ତ୍ତୃପକ୍ଷଙ୍କୁ ଜଣାଇଥିଲେ । କିନ୍ତୁ କର୍ତ୍ତୃପକ୍ଷ କର୍ଣ୍ଣପାତ କଲେ ନାହିଁ । କର୍ତ୍ତୃପକ୍ଷଙ୍କ ଅବହେଳା ଯୋଗୁଁ ମୃତ୍ୟୁ ହୋଇଥିବା ଅଭିଯୋଗ କରିଛନ୍ତି । ଛୁଆର ମୃତ୍ୟୁ ପାଇଁ କର୍ତ୍ତୃପକ୍ଷ ଦାୟୀ ବୋଲି ଅଭିଯୋଗ କରିଛନ୍ତି । ସହକାରୀ ଜିଲ୍ଲା ମଙ୍ଗଳଅଧିକାରୀ ସୁରେଶ ଚନ୍ଦ୍ର ଜିତବାବୁଙ୍କୁ ଯୋଗାଯୋଗ କରିବାରୁ ଘଟଣାର ତଦନ୍ତ କରୁଛନ୍ତି ବୋଲି କହିଲେ । ମୃତକଙ୍କ ଘର ତିରିଂ ବ୍ଲକର ଧରମଡିହି ହୋଇଥିବାବେଳେ ତାଙ୍କ ପିତା ଫୁଲମାର ମାର୍ଣ୍ଡିଙ୍କର ମୃତ୍ୟୁ ହୋଇଯାଇଛି । ମାତା ଦାଦି ମାର୍ଣ୍ଡୀଙ୍କର ଦୁଇଟି ଛୁଆ ପୁଅଟିଏ ଏବଂ ଝିଅଟିଏ । ମାତା ଦାଦି ମାର୍ଣ୍ଡୀ ଏକମାତ୍ର ପୁଅକୁ ହରାଇ କାନ୍ଦି କାନ୍ଦି ବେହୋସ ହୋଇଯାଉଥିବା ଦେଖିବାକୁ ମିଳିଥିଲା । ଏନେଇ ତିରିଂ ଥାନାରେ ୧୨/୨୨ ରେ ଏକ ଅପମୃତ୍ୟୁ ମାମଲା ରୁଜୁ ହୋଇଛି।