ବାଳ ବିକାଶ ହେଲା କାଳ: କଦମ୍ବ ଗଛରୁ ପଡି ନବମ ଶ୍ରେଣୀ ଛାତ୍ର ମୃତ

ଦେଓଗାଁ: ବଲାଙ୍ଗୀର ଜିଲ୍ଲା ଦେଓଗାଁର ଗାଇବାହଲ ଗାଁରେ ଗଛରୁ ପଡି ଜଣେ ଛାତ୍ରଙ୍କ ମୃତ୍ୟୁ ହୋଇଯାଇଛି | ମିଳିଥିବା ସୂଚନା ମୁତାବକ ଅଙ୍ଗନବାଡ଼ି କର୍ମୀଙ୍କ ଠାରୁ ସ୍କୁଲ ଗେଟ ଚାବି ନେଇ ରବିବାର ଦିନ ଦେଓଗାଁ ଅଞ୍ଚଳର ଜଣେ ସାଇଭକ୍ତ ଶିକ୍ଷକ ଗାଇବାହଲ ଗାଁର କିଛି ଛାତ୍ରଛାତ୍ରୀଙ୍କୁ ନେଇ ଗାଇବାହଲ ଉନ୍ନୀତ ଉଚ୍ଚ ବିଦ୍ୟାଳୟରେ ବାଳବିକାଶ କାର୍ଯ୍ୟକ୍ରମ କରୁଥିଲେ। ଏହି ସମୟରେ ନବମ ଶ୍ରେଣୀରେ ପଢ଼ୁଥିବା ସୀତାରାମ କିଛି ଛାତ୍ରଙ୍କ ସହ ଖେଳକୁଦ କରି ଏକ କଦମ୍ବ ଗଛକୁ ଚଢି ଯାଇ ତଳେ ପଡିଯାଇଥିଲା। ଫଳରେ ସେ ଗୁରୁତର ହେବାରୁ ଗାଁ ଲୋକେ ପ୍ରଥମେ ବଲାଙ୍ଗୀର ଓ ପରେ ବୁର୍ଲା ଡାକ୍ତରଖାନାକୁ ନେଇ ଚିକିତ୍ସା କରୁଥିଲେ।

କିନ୍ତୁ ରବିବାର ବିଳମ୍ବିତ ରାତିରେ ଛାତ୍ର ଜଣକର ମୃତ୍ୟୁ ହୋଇଥିବା ଜଣାପଡିଛି। ଏବେ ପ୍ରଶ୍ନ ଉଠୁଛି ଛୁଟି ଦିନରେ ସ୍କୁଲ ପରିସରରେ ଛୋଟ ଛୋଟ ପିଲାଙ୍କୁ ନେଇ ଧାର୍ମିକ ଅନୁଷ୍ଠାନ ପକ୍ଷରୁ ବାଳ ବିକାଶ କାର୍ଯ୍ୟକ୍ରମ କରିବା ପାଇଁ ଶିକ୍ଷକଙ୍କୁ କିଏ ଅନୁମତି ଦେଇଥିଲେ ? ଅଙ୍ଗନବାଡି କର୍ମୀ କାହା ନିର୍ଦେଶରେ ସ୍କୁଲ ଗେଟର ଚାବି ଦେଇଥିଲେ ସେ ଦିଗରେ ତଦନ୍ତ କରିବାକୁ ଗାଁ ଲୋକେ ଦାବି କରିଛନ୍ତି।