ଶିକ୍ଷକ ବଦଳି ନକରିବା ପାଇଁ ସ୍କୁଲ ଆଗରେ ଧାରଣାରେ ବସିଲେ ଛାତ୍ରଛାତ୍ରୀ

କାମାକ୍ଷାନଗର: ଢେଙ୍କାନାଳ ଜିଲ୍ଲା କଙ୍କଡାହାଡ଼ ବ୍ଲକ ଘାଗରାମୁଣ୍ଡା ପଞ୍ଚାୟତ କଟୁମୁଣ୍ଡା ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟର ଶିକ୍ଷକ ବାପୁଜି ନାଏକଙ୍କ ବଦଳି ହେବା ଖବର ପାଇ ଗ୍ରାମବାସୀ, ବିଦ୍ୟାଳୟର ଛାତ୍ରଛାତ୍ରୀ, ଅଭିଭାବକ ବିଦ୍ୟାଳୟ ଫାଟକରେ ତାଲା ପକାଇ ଧାରଣାରେ ବସିଥିଲେ । ଗ୍ରାମବାସୀଙ୍କ ବ୍ଲକ ଶିକ୍ଷା ଅଧିକାରୀଙ୍କୁ ଏକ ଲିଖିତ ଅଭିଯୋଗ କରିଛନ୍ତି ଯେ ବିଦ୍ୟାଳୟରେ ୮ ଟି ଶ୍ରେଣୀକୁ ୮୫ ଜଣ ଛାତ୍ରଛାତ୍ରୀ ଥିଲାବେଳେ ବିଜ୍ଞାନ ଶିକ୍ଷକ ବାପୁଜି ନାଏକଙ୍କୁ ବଦଳି କରିବା ଦ୍ୱାରା ଗଣିତ ଓ ବିଜ୍ଞାନରେ ଛାତ୍ରଛାତ୍ରୀଙ୍କୁ ଶିକ୍ଷାଦାନ କରିବାରେ ବାଧା ସୃଷ୍ଟି ହେବ ।

ଗ୍ରାମବାସୀ ଅଭିଯୋଗ କରିଛନ୍ତି ଶିକ୍ଷକ ବାପୁଜି ଜଣେ ଆଦର୍ଶ ଶିକ୍ଷକ ହେଇଥିବାରୁ ତାଙ୍କ ବଦଳି ବାତିଲ କରାନଗଲେ ଅନିର୍ଦ୍ଦିଷ୍ଟ ପାଇଁ ଗ୍ରାମବାସୀ, ଅଭିଭାବକ, ଛାତ୍ରଛାତ୍ରୀ ଧାରଣାରେ ବସି ରହିବେ । ଏ ସମ୍ପର୍କରେ ବ୍ଲକ ଶିକ୍ଷା ଅଧିକାରୀ ହରିହର ଦେହୁରୀ କହିଛନ୍ତି ଗ୍ରାମବାସୀଙ୍କ ଦାବିକୁ ଗୁରୁତ୍ୱ ଦିଆଯାଇ ଶିକ୍ଷକଙ୍କ ବଦଳିକୁ ସ୍ଥଗିତ ରଖାଯାଇଛି |