ନିଜ ହାତ ନାହିଁ, ତଥାପି ଭାଇ ହାତ ଖାଲି ରଖନ୍ତିନି: ଦିବ୍ୟାଙ୍ଗ ସୁଭଦ୍ରାଙ୍କ ନିଆରା ରାଖୀପୂର୍ଣ୍ଣିମା
ବାରିପଦା: ଆଜି ହେଉଛି ପବିତ୍ର ରାଖୀ ପୂର୍ଣ୍ଣିମା । ଏହି ଦିନ ବଡ଼ ଭାଇ ବଳଭଦ୍ର ଏବଂ ଜଗତର ନାଥ ଜଗନ୍ନାଥଙ୍କୁ ରାଖୀ ବାନ୍ଧିଥାନ୍ତି ଭଉଣୀ ସୁଭଦ୍ରା । ସୁଭଦ୍ରାଙ୍କ ହାତ ଗୋଡ଼ ନଥାଇବି ଦୁଇ ଭାଇଙ୍କୁ ରାଖୀ ବାନ୍ଧିବାର ପରମ୍ପରା ରହିଛି । ଏମିତି ଏକ ସୁଭଦ୍ରା ଅଛନ୍ତି ମୟୂରଭଞ୍ଜ ଜିଲାରେ । ଜନ୍ମରୁ ହାତ ଗୋଡ଼ ନଥାଇ ଦିବ୍ୟାଙ୍ଗ ହୋଇ ମାଆ କୋଳରେ ଜନ୍ମ ନେଇଥିବା ସୁଭଦ୍ରା କିପରି ନିଜ ଭାଇକୁ ରାଖୀ ବାନ୍ଧୁଛନ୍ତି ତାହା ସମସ୍ତଙ୍କୁ ନିଶ୍ଚୟ ଆଶ୍ଚର୍ଯ୍ୟ କରିବ । ଏମିତି ମନୋରମ ଦୃଶ୍ୟ ଦେଖିବାକୁ ମିଳିଛି ମୟୁରଭଞ୍ଜ ଜିଲ୍ଲା ସୁକୃଳୀ ବ୍ଲକ୍ ତେରଣ୍ଟି ଗାଁ କଲୋନୀ ସାହିରେ । ଭଉଣୀକୁ ରକ୍ଷା କରିବା ପାଇଁ ବନ୍ଧାଯାଉଥିବା ପବିତ୍ର ସୂତା ଖିଅର ଏହି ବନ୍ଧକୁ ରାଖୀ ପୂର୍ଣ୍ଣିମା କୁହାଯାଏ । ଏହି ପର୍ବକୁ କେବଳ ଓଡିଶା ନୁହେଁ ବରଂ ସାରା ଦେଶରେ ପାଳନ କରାଯାଏ । ଏହାକୁ ଶ୍ରାବଣ ମାସ ଶୁକ୍ଳ ପକ୍ଷ ପୂର୍ଣ୍ଣିମା ତିଥିରେ ପାଳନ କରାଯାଇଥାଏ । ଓଡିଆମାନେ ଏହାକୁ ପ୍ରଭୁ ବଳଭଦ୍ରଙ୍କର ଜନ୍ମ ତିଥି ଭାବରେ ମଧ୍ୟ ପାଳନ କରନ୍ତି । ଶ୍ରୀମନ୍ଦିରରେ ଜଗନ୍ନାଥ ଓ ବଳଭଦ୍ରଙ୍କ ହାତରେ ଭଉଣୀ ସୁଭଦ୍ରା ରାଖୀ ବାନ୍ଧିଥାନ୍ତି ।
Sambad is now on WhatsApp
Join and get latest news updates delivered to you via WhatsApp
ପୂର୍ଣ୍ଣିମା ଦିନ ସକାଳୁ ସକାଳୁ ଭଉଣୀମାନେ ଗାଧୋଇ ନିଜ ଘରର ଇଷ୍ଟ ଦେବତାଙ୍କୁ ପୂଜା କରିବା ସହ ଭାଇମାନଙ୍କ ହାତରେ ରାଖୀ ବାନ୍ଧି ସେମାନଙ୍କୁ ବନ୍ଦାପନା କରିଥାଆନ୍ତି । ଏହି ପବିତ୍ର ପୂର୍ଣ୍ଣିମା ଅବସରରେ ଭଉଣୀମାନେ ଭାଇମାନଙ୍କ ମଙ୍ଗଳ କାମନା କରି ସାରା ଜୀବନ ସେମାନଙ୍କ ସୁରକ୍ଷା ପାଇଁ ପ୍ରାର୍ଥନା କରିଥାଆନ୍ତି । ତେଣୁ ଏହି ଅବସରରେ ଆଜି ଆମେ ଦେଖିବା ଜଣେ ନିଆରା ସୁଭଦ୍ରା ଭଉଣୀଙ୍କ କାହାଣୀ । ରାଖୀପୂର୍ଣ୍ଣିମା ଆସିଲେ ବେଶ ଖୁସି ହେବା ସହିତ ଅତି ଆନନ୍ଦରେ ଭାଇମାନଙ୍କୁ ରାଖୀ ବାନ୍ଧିଥାଏ ସୁଭଦ୍ରା । ଜନ୍ମର କିଛିଦିନ ପରେ ବାପ ଛେଉଣ୍ଡ ହୋଇଯାଇଥିବା ସୁଭଦ୍ରାଙ୍କୁ ଏବେ ୧୦ ବର୍ଷ ଛୁଇଁଲାଣି । ସେ ଜନ୍ମରୁ ହିଁ ଦିବ୍ୟାଙ୍ଗ । ଶ୍ରଦ୍ଧାରେ ସମସ୍ତେ ଡାକନ୍ତି ସୁଭଦ୍ରା । ତାଙ୍କର ଗୋଟିଏ ଭାଇ ଅଛି ଯାହାଙ୍କୁ ୧୩ ବର୍ଷ ହେବ । ସୁଭଦ୍ରା ଏବେ ପଞ୍ଚମ ଶ୍ରେଣୀରେ ପାଠ ପଢୁଛନ୍ତି । ମା ଏକ କାରଖାନାରେ ଦିନ ମଜୁରିଆ ଭାବେ କାମ କରି ପରିବାର ଚଳାଇଥାଆନ୍ତି । ସୁଭଦ୍ରାଙ୍କ ବାପା ଆରପାରିକି ଚାଲିଯିବାର ୧୦ ବର୍ଷ ବିତିଗଲାଣି । ଏହା ଭିତରେ ଦୁଃଖ ଯନ୍ତ୍ରଣା ଅନେକ ଆସିଛି । ଭଲ ଘରଟିଏ ବି ନାହିଁ ବର୍ଷା ଦିନେ ଘରେ ପାଣି ଗଳିବା ସହିତ ଆର୍ଥିକ ସଙ୍କଟ ସବୁ ସମୟରେ ରହୁଛି ।
ଏମିତି କି ସୁଭଦ୍ରା ପାଠ ପଢିବାକୁ ଯିବା ପାଇଁ ଭିନ୍ନକ୍ଷମ ଗାଡିଟିଏ ବି ନାହିଁ । ସୁଭଦ୍ରାଙ୍କ ପାଠ ଯେମିତି ଭଲ ପଢ଼ନ୍ତି ସେମିତି ଗୁଣ ବି ତାଙ୍କର । ଦିବ୍ୟାଙ୍ଗ ହେଲେ ମଧ୍ୟ କେବେ ଭଗବାନଙ୍କୁ ଦୋଷ ଦେଇ ନାହାନ୍ତି । ରାଖୀ ପୂର୍ଣ୍ଣିମା ଆସିଲେ ବେଶ ଖୁସି ହୋଇପଡ଼ନ୍ତି ସୁଭଦ୍ରା । କାରଣ ତାଙ୍କ ଭାଇକୁ ସେ ବହୁତ ଭଲ ପାଆନ୍ତି । ସେ ଚାଲିପାରୁନଥିବାରୁ ଜଣେ ପଡ଼ିଶା ଘର ଭାଇ କାନ୍ଧରେ ପକାଇ ତାକୁ ନେବା ଆଣିବା କରେ । ଆଉ ସେ ପଡିଶା ଭାଇଙ୍କ ହାତରେ ସିନ୍ଦୁର ,ଫୁଲ ଦେଇ ପୂଜା କରିବା ସହିତ ହାତରେ ରାକ୍ଷୀ ବାନ୍ଧି ମିଠା ଖୁଆଇଛି । ପଡିଶା ଘର ଭାଇ ବି ତାରଠାରୁ ରାଖୀ ବାନ୍ଧିଥିବାବେଳେ ବେଶ ଖୁସି ହୋଇଯାଆନ୍ତି । ସୁଭଦ୍ରା ୪ ବର୍ଷ ହେବ ଭାଇଙ୍କୁ ରାଖୀ ବାନ୍ଧୁଛନ୍ତି । ସୁଭଦ୍ରାଙ୍କ ପାଇଁ ରାଖୀ ପୂର୍ଣ୍ଣିମା ଦିନଟି ସବୁଠାରୁ ଗୁରୁତ୍ୱପୂର୍ଣ୍ଣ ଦିନ । କାରଣ ଏହି ଦିନକୁ ବର୍ଷେ ପର୍ଯ୍ୟନ୍ତ ଅପେକ୍ଷା କରିବାକୁ ପଡେ ସୁଭଦ୍ରାଙ୍କୁ । ଏହି ଦିନ ଭଉଣୀ, ଭାଇ ହାତରେ ରାଖୀ ବାନ୍ଧିଥାଏ ଓ ତାଙ୍କର ଉଜ୍ଜ୍ୱଳ ଭବିଷ୍ୟତ ପାଇଁ ପ୍ରାର୍ଥନା କରିଥାଏ, ବଦଳରେ ଭାଇ, ତା’ର ଭଉଣୀକୁ ରକ୍ଷା କରିବାର ସଂକଳ୍ପ ନେଇଥାଏ ।