ବିଦ୍ୟୁତ୍‌ ଟାୱାରକୁ ଚଢ଼ି ଯୁବକଙ୍କ ଆତ୍ମହତ୍ୟା ଉଦ୍ୟମ

ବଲାଙ୍ଗୀର: ପୁଇନ୍ତଳା ଥାନା ଖମାରମୁଣ୍ଡା ଗାଁର ଜଣେ ଯୁବକ ବିଦ୍ୟୁତ୍‌ ଟାୱାରକୁ ଚଢ଼ି ଆତ୍ମହତ୍ୟା ଉଦ୍ୟମ କରୁଥିବା ଭିଡିଓ ଏବେ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି। ଖମାରମୁଣ୍ଡା ଗାଁର ସିଦ୍ଧେଶ୍ବର ଭୋଇ କୌଣସି କାରଣରୁ ୧୫୦ ଫୁଟ୍‌ ଉଚ୍ଚ ବିଦ୍ୟୁତ୍‌ ଟାୱାରକୁ ଚଢ଼ି ଆତ୍ମହତ୍ୟା ଉଦ୍ୟମ କରୁଥିଲେ। ଟାୱାର ଉପରକୁ ଚଢ଼ି ଡେଇଁବାକୁ ଉଦ୍ୟମ କରୁଥିବା ବେଳେ ସ୍ଥାନୀୟ ଲୋକେ ଦେଖି ଅଗ୍ନିଶମ ବିଭାଗକୁ ଖବର ଦେଇଥିଲେ। ଖବର ପାଇ ଘଟଣାସ୍ଥଳରେ ପୁଲିସ ମଧ୍ୟ ପହଞ୍ଚି ଉକ୍ତ ଯୁବକଙ୍କୁ ବୁଝାସୁଝା କରିଥିଲା।

ସେ ବିଳମ୍ବିତ ରାତିରେ ଏହି ଟାୱାର ଉପରକୁ ଚଢ଼ି ରାତିସାରା ଉପରେ ବସିଥିବା ଜଣାପଡ଼ିଛି। ସେ ଗତ ତିନିମାସ ତଳେ ବିବାହ କରିଥିଲେ। ବୁଧବାର ରାତିରେ ପାରିବାରିକ କଳହକୁ କେନ୍ଦ୍ରକରି ଆତ୍ମହତ୍ୟା କରିବାକୁ ଟାୱାର ଉପରକୁ ଚଢ଼ିଯାଇଥିବା ଜଣାପଡ଼ିଛି। ଭୋର୍‌ ସକାଳୁ ସ୍ଥାନୀୟ ଲୋକେ ସିଦ୍ଧେଶ୍ବରଙ୍କୁ ଟାୱାର ଉପରେ ବସିଥିବା ଦେଖି ଦମକଳ ବାହିନୀକୁ ଖବର ଦେଇଥିଲେ। ପରେ ତାଙ୍କୁ ଉଦ୍ଧାର କରି ଭୀମ ଭୋଇ ମେଡିକାଲ କଲେଜ ହସପିଟାଲରେ ଚିକିତ୍ସା ପରେ ଘରକୁ ଛାଡ଼ି ଦିଆଯାଇଥିଲା। ଏନେଇ ଥାନାରେ କୌଣସି ଅଭିଯୋଗ ହୋଇନଥିବା ସୂଚନା ମିଳିଛି।