ସୁନ୍ଦରଗଡ଼ରେ ଲଗାତର ଦୁର୍ଘଟଣା: ପୋଲକୁ ଧକ୍କା ଦେଇ ନାଳକୁ ଖସିଲା କାର୍

ସୁନ୍ଦରଗଡ଼: ତୃତୀୟ ଦିନରେ ସୁନ୍ଦରଗଡ଼ରେ ପୁଣି ଦୁର୍ଘଟଣା ଘଟିଛି। ସଦରଥାନା କଟରା ନିକଟରେ ଦ୍ରୁତଗତିରେ ଯାଉଥିବା ଏକ କାର୍ ପୋଲକୁ ଧକ୍କା ଦେଇ ପାଣି ଭର୍ତ୍ତି ନାଳକୁ ଖସି ପଡ଼ିଥିଲା। ତେବେ ସୌଭାଗ୍ୟକ୍ରମେ ଗାଡିରେ ଥିବା ୪ ଜଣ ଯୁବକ ସୁରକ୍ଷିତ ଥିବା ସୂଚନା ମିଳିଛି। କୌଣସି ପ୍ରକାରେ ସେମାନେ କାରରୁ ବାହାରି ଆସିବାରେ ସକ୍ଷମ ହୋଇଥିଲେ।। ତେବେ ଗାଡ଼ିଟି ଭାଙ୍ଗି ଚୂରମାର୍ ହୋଇଯାଇଛି। କିଞ୍ଜିରକେଲା ଓ ସୁନ୍ଦରଗଡ଼ର ୪ ଜଣ ଯୁବକ କୌଣସି କାମରେ କଟରା ଅଞ୍ଚଳକୁ ଯାଉଥିବାବେଳେ ଘଟିଥିଲା ଦୁର୍ଘଟଣା। କ୍ରେନ ସାହାଯ୍ୟରେ ଗାଡ଼ିକୁ ପାଣି ଭିତରୁ ଉଠାଯାଇଛି।

ଉଲ୍ଲେଖଯୋଗ୍ୟ, ରବିବାର ସଦରଥାନା ତେଲେନଡିହିରେ ଟ୍ରକ- ଅଟୋ ଦୁର୍ଘଟଣାରେ ଜଣେ ଶିଶୁକନ୍ୟା ସମେତ ୫ ଜଣଙ୍କ ଶୋଚନୀୟ ମୃତ୍ୟୁ ହୋଇଥିଲା। ସେହିପରି ସୋମବାର ସୁନ୍ଦରଗଡ଼ ଟାଉନଥାନା ବିଜୁ ଏକ୍ସପ୍ରେସ ୱେ ଷଡ଼ଙ୍ଗୀ ପେଟ୍ରୋଲ ପମ୍ପ ନିକଟରେ ଏକ କାର ରାସ୍ତାକଡରେ ପାର୍କିଂ କରିଥିବା ବୋରୱେଲ ଗାଡ଼ିକୁ ଧକ୍କା ଦେଇଥିଲା। ଏଥିରେ ଗାଡ଼ିର ସମ୍ମୁଖ ଭାଗ ଚୂରମାର୍ ହୋଇଯାଇଥିବାବେଳେ ଜଣେ ମହିଳା ଗୁରୁତର ଆହତ ହୋଇଥିଲେ। ତାଙ୍କୁ ସ୍ଥାନୀୟ ଲୋକେ ଉଦ୍ଧାର କରି ଜିଲ୍ଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରିଥିଲେ।