ସୁନ୍ଦରଗଡ଼: ଏମିତି ଏକ ଦୃଶ୍ୟ… ଯାହା ଆପଣଙ୍କ ଆଖିରେ ହୁଏତ ଲୁହ ଆଣିଦେଇପାରେ । ଖଣି ଖାଦାନ ଭରା ସୁନ୍ଦରଗଡ଼ କୋଇଡ଼ାରୁ ଆସିଛି ଦାରିଦ୍ର୍ୟର କରୁଣ କାହାଣୀ । ମାଟି ଭିତରେ କେତେ ଅମୂଲ୍ୟ ସଂପଦ ଭରି ରହିଛି ହେଲେ ମାଟି ଉପରେ ରହୁଥିବା ଲୋକଙ୍କ ପେଟ ପୋଡ଼ିଯାଉଛି । ଛୋଟିଆ ପୁଙ୍ଗୁଳା ଛୁଆଟିଏ, ରାସ୍ତା କଡ଼ରେ ପଡିଥିବା ଅଇଁଠା ପତ୍ରକୁ ଚାଟି ଖାଇଯାଉଛି । ଏହି ଗୋଟିଏ ଚିତ୍ର ସରକାରଙ୍କ ଶହ ଶହ ଯୋଜନା ଉପରେ ହଜାରେ ପ୍ରଶ୍ନ ଛିଡ଼ା କରୁଛି? ଏମିତି କ’ଣ ପରିସ୍ଥିତି ହେଲା ଯେ, ଏହି କୁନି ଛୁଆଟି ରାସ୍ତାରେ ପଡ଼ିଥିବା ଅଇଁଠା ପତ୍ର ଚାଟି ପେଟର ଭୋକ ମେଣ୍ଟାଇଲା । ବେଶ କିଛି ଦିନ ହେବ, ସୋସିଆଲ ମିଡିଆରେ ଭାଇରାଲ ହେଉଛି ଏହି ଦୃଶ୍ୟ ।
Sambad is now on WhatsApp
Join and get latest news updates delivered to you via WhatsApp
ଭିଡିଓଟି ନଜରକୁ ଆସିବା ପରେ ଘଟଣା ପଛର ସତ୍ୟାସତ୍ୟ ଜାଣିବା ପାଇଁ କୋଇଡାର ତାଡୁଗୋଠ ଗାଁରେ ପହଞ୍ଚିଥିଲେ ଗଣମାଧ୍ୟମ ପ୍ରତିନିଧି । ଆଉ ସେଠାରେ ଯାହା ଦେଖିଲେ, ତାହା ବିଶ୍ୱାସ ନ ହେଲା ଭଳି । ଖଣି ଖାଦାନ ଭରା ଅଞ୍ଚଳରେ ଥିଲା ଠିକ ନଗଡ଼ା ଭଳି ଚିତ୍ର । ଏହି ପଡ଼ାରେ ୧୦ରୁ ୧୨ଟି ପରିବାର ବସବାସ କରନ୍ତି । ସେଠାକାର ଜଣେ ବାସିନ୍ଦା ରାବଣ ମୁଣ୍ଡାଙ୍କ ତିନି ଛୁଆଙ୍କୁ ନେଇ ତେଲ ଲୁଣର ସଂସାର । ଖାଦ୍ୟ ଅଭାବ ଯୋଗୁ ଦିନକୁ ଓଳିଏ ଖାଇବାକୁ ନ ପାଇ ଅପପୁଷ୍ଟିର ଶିକାର ହୋଇଛନ୍ତି । କିଛି ମାସ ହେବ ରାବଣଙ୍କ ସ୍ତ୍ରୀଙ୍କ ଦେହାନ୍ତ ପରେ ଏବେ ପିଲାଙ୍କ ଦାୟିତ୍ୱ ରାବଣ ଉପରେ ପଡ଼ିଛି । ହେଲେ ବାହାରକୁ କାମ ପାଇଁ ନ ଗଲେ ତିନି ପିଲାଙ୍କ ମୁହଁରେ ଆହାର ଦେବେ କିପରି ? ତେଣୁ ପିଲାଙ୍କୁ ଘରେ ଛାଡ଼ି ସେ କାମରେ ଯାଇଥିବା ବେଳେ ଭୋକର ଦାଉରେ ଜଳୁଥିଲେ ତିନି ପିଲା ।
ଆଉ ପେଟର ଜ୍ୱଳା ସହି ନପାରି କୁନି ଶିଶୁଟି ରାସ୍ତାକଡ଼ରେ ଭୋଜି ପରେ ଫୋପାଡି ଦେଇଥିବା ପତ୍ର ଚାଟି ଖାଇଥିଲା । ଏ ନେଇ ପିଲାର ବାପାକୁ ପଚାରିବାରୁ ସେ କହିଛନ୍ତି, ଛୁଆଙ୍କୁ ଛାଡ଼ି କାମ କରିବାକୁ ଗଲେ ସେମାନେ ଏଣେ ତେଣେ ବୁଲାବୁଲି କରୁଛନ୍ତି । ତେଣୁ ଏବେ କାମ ଧନ୍ଦା ଛାଡ଼ି ଛୁଆଙ୍କୁ ଜଗି ରହିଛନ୍ତି । ପଞ୍ଚାୟତରୁ ମିଳୁଥିବା ଚାଉଳ ଓ ଜାଳେଣୀ କାଠ ବିକ୍ରି କରି ପରିବାର ଚଳାଉଛନ୍ତି । ତାଡୁଗୋଠ ଗାଁର ଉପର ମୁଣ୍ଡରେ ଲୁହା ଖଣି ଥିଲେ ମଧ୍ୟ କୌଣସି ସୁବିଧା ମିଳୁ ନଥିବାରୁ ମହିଳା ସମେତ ଛୁଆଙ୍କ ସ୍ୱାସ୍ଥ୍ୟବସ୍ଥା ଭଲ ନାହିଁ । ସେହିପରି ପଡ଼ାର ମହିଳାମାନେ ଅଭିଯୋଗ କରିଛନ୍ତି, ଅଙ୍ଗନୱାଡି କେନ୍ଦ୍ରରେ ଛତୁଆଠାରୁ ଆରମ୍ଭ କରି ବିଭିନ୍ନ ସାମଗ୍ରୀ ଦୁଇରୁ ତିନି ମାସରେ ଥରେ ମିଳେ ।