ଫିନାଇଲ୍ ଓ ଧୂପକାଠି ଦେଇଛି ପରିଚୟ; ମହିଳାଙ୍କୁ ବଞ୍ଚିବାର ରାହା ଦେଖାଇଛନ୍ତି ସୁନିନ୍ଦା
ନିଆଳି: ସ୍ବୟଂସହାୟକ ଗୋଷ୍ଠୀ ଗଠନ କରି ମହିଳାମାନଙ୍କୁ ବଞ୍ଚିବାର ରାହା ଦେଖାଇଛନ୍ତି ନିଆଳି ବ୍ଲକ୍ ଶଗଡ଼ାଇଲୋ ପଞ୍ଚାୟତ ଅନ୍ତର୍ଗତ କରଞ୍ଜ ଗ୍ରାମର ସୁନିନ୍ଦା ଖୁଣ୍ଟିଆ (୪୨)। କେବଳ ୧୫ ହଜାର ଟଙ୍କାର ମୂଳଧନରେ ସେ ଆରମ୍ଭ କରିଥିବା ଫିନାଇଲ୍ ଓ ଧୂପକାଠି ବ୍ୟବସାୟ ଏବେ ୨ ଲକ୍ଷ ଟଙ୍କାରେ ପହଞ୍ଚି ଯାଇଛି। ଗତ ୨୦୧୫ ମସିହାରେ ଗ୍ରାମର ୧୪ଜଣ ମହିଳାଙ୍କୁ ନେଇ ସ୍ବୟଂସହାୟିକା ଗୋଷ୍ଠୀ ଗଠନ କରି ସୁନିନ୍ଦା ଆରମ୍ଭ କରିଥିଲେ ଧୂପକାଠି ଓ ଫିନାଇଲ୍ ବ୍ୟବସାୟ। ଗୋଷ୍ଠୀର ସଦସ୍ୟାମାନଙ୍କ ସହଯୋଗରେ ଏଥିପାଇଁ ପ୍ରଥମେ ୧୫ ହଜାର ଟଙ୍କା ବିନିଯୋଗ କରାଯାଇଥିଲା। ଏବେ ୨ ଲକ୍ଷ ଟଙ୍କାରେ ପହଞ୍ଚି ଯାଇଥିବା ଏହି ବ୍ୟବସାୟରେ ୩୦ ଜଣ ମହିଳା ନିୟୋଜିତ ହୋଇଛନ୍ତି। ସଦସ୍ୟାମାନେ ମଧ୍ୟାହ୍ନ ପରେ ଏକତ୍ରିତ ହୋଇ ଧୂପକାଠି ଓ ଫିନାଇଲ୍ ପ୍ରସ୍ତୁତିରେ ଲାଗି ପଡ଼ନ୍ତି।
Sambad is now on WhatsApp
Join and get latest news updates delivered to you via WhatsApp
ଏଥିସହ ନିକଟବର୍ତ୍ତୀ ଅଞ୍ଚଳର ସ୍ବୟଂସହାୟିକା ଗୋଷ୍ଠୀର ସଦସ୍ୟମାନଙ୍କୁ ମଧ୍ୟ ସେମାନେ ଧୂପକାଠି ଓ ଫିନାଇଲ୍ ପ୍ରସ୍ତୁତି ସମ୍ପର୍କରେ ତାଲିମ ଦେଇଥା’ନ୍ତି। କଞ୍ଚାମାଲ ଓ ନିର୍ମାଣ ପରବର୍ତ୍ତୀ ବିକ୍ରିରେ ସମସ୍ୟା ସତ୍ତ୍ବେ ମହିଳାମାନେ ହାର୍ ମାନି ନାହାନ୍ତି। ସରକାର ବଜାର ସୁବିଧା ଯୋଗାଇ ଦେଲେ ସେମାନେ ଆହୁରି ଆଗକୁ ବଢ଼ିପାରିବେ ବୋଲି କହିଛନ୍ତି ସୁନିନ୍ଦା। ଅପରପକ୍ଷରେ ମହାମାରୀ କୋଭିଡ୍ ସମୟରେ ୫ ହଜାରରୁ ଅଧିକ ମାସ୍କ ପ୍ରସ୍ତୁତ କରି ଗ୍ରାମାଞ୍ଚଳରେ ବିତରଣ କରିଛନ୍ତି ବୋଲି ସେ ସୂଚନା ଦେଇଛନ୍ତି।