ନିର୍ବାଚନ ପ୍ରଚାରର ଯୋଗାଣ ସହାୟକ, ଜିଲ୍ଲାପାଳଙ୍କୁ ଫେରାଦ ହେଲା ବିଜେପି
ସୁନ୍ଦରଗଡ଼ : ଭୋଟ୍ ମାଗୁଛନ୍ତି ପଞ୍ଚାୟତ ଯୋଗାଣ ସହାୟକ। ପ୍ରଚାର ସଭାରେ ଦଳୀୟ ପ୍ରାର୍ଥୀଙ୍କ ସହ ବସି ଖୋଲାଖୋଲି ନିର୍ବାଚନ ପ୍ରଚାର କରୁଛନ୍ତି । ନିଜ ପଦବିର ଏପରି ଅପବ୍ୟବହାର କରିଛନ୍ତି କିରେଇ ଗ୍ରାମ ପଞ୍ଚାୟତର ଯୋଗାଣ ସହାୟକ ଅମିତ ପଟେଲ।
Sambad is now on WhatsApp
Join and get latest news updates delivered to you via WhatsApp
ଶ୍ରୀ ପଟେଲ ସଦର ବ୍ଲକ୍ ସରକାରୀ ଦଳର ପ୍ରାର୍ଥୀଙ୍କ ବିଭିନ୍ନ ସଭାରେ ଅତିଥି ଭାବେ ଯୋଗ ଦେଇଥିବା ନଜରକୁ ଆସିଛନ୍ତି । ଏହାର ଫଟୋ ଓ ଭିଡିଓ ଭାଇରାଲ୍ ହେବା ପରେ ପ୍ରତିକ୍ରିୟା ପ୍ରକାଶ ପାଇଛି। ଆଜି ବିଜେପିର ଏକ ପ୍ରତିନିଧି ଦଳ ଜିଲ୍ଲାପାଳଙ୍କୁ ଭେଟି ଫେରାଦ ହେବା ସହ ତୁରନ୍ତ କାର୍ଯ୍ୟାନୁଷ୍ଠାନ ଦାବି କରିଛନ୍ତି । ତ୍ରିସ୍ତରୀୟ ପଞ୍ଚାୟତ ମୁକ୍ତ ଓ ଅବାଧ ନିର୍ବାଚନ ପାଇଁ ନିର୍ବାଚନ କମିସନ କଡା ମାର୍ଗଦର୍ଶିକା ଜାରି କରିଛନ୍ତି । ଏଥିରେ ପ୍ରଶାସନର ଅଧିକାରୀ ବା କର୍ମଚାରୀ କୌଣସି ପ୍ରାର୍ଥୀଙ୍କ ସପକ୍ଷ କି ବିପକ୍ଷରେ ପ୍ରଚାର କରିବା ଉପରେ ବାରଣ ରହିଛି । ଏହାର ଖିଲାପ କରୁଥିବା କର୍ମଚାରୀଙ୍କ ବିରୋଧରେ ନିର୍ବାଚନ ଆଦର୍ଶ ଆଚରଣ ବିଧି ଆଇନରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କମିସନ ସତର୍କ କରାଇଛନ୍ତି । ଏହା ସତ୍ତ୍ବେ ଜଣେ ଯୋଗାଣ ସହାୟକ କିପରି ନିର୍ବାଚନୀ ସଭାରେ ବସି ପ୍ରଚାର କରୁଛନ୍ତି, ତାକୁ ନେଇ ଉଠିଛି ପ୍ରଶ୍ନ ।