ପାରଳାଖେମୁଣ୍ଡି: ମୋହନା ଥାନା ପରିସରରୁ ଜଣେ ଅଭିଯୁକ୍ତ ଗଞ୍ଜେଇ ମାଫିଆ ଫେରାର ହେବା ଓ ପୁଲିସ ତାର ଟେର ନ ପାଇବା ଭଳି ଘଟଣା ସାମ୍ନାକୁ ଆସିଛି। ତେବେ କର୍ତ୍ତବ୍ୟରେ ଅବହେଳା ଯୋଗୁ ଗଜପତି ଏସପି ତପନ ପଟ୍ଟନାୟକ ୪ ଜଣ ପୁଲିସ କର୍ମଚାରୀଙ୍କୁ ନିଲମ୍ବନ କରିଛନ୍ତି ବୋଲି ଅତିରିକ୍ତ ଆରକ୍ଷୀ ଅଧୀକ୍ଷକ ସୀତାରାମ ଶତପଥୀ ସୂଚନା ଦେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ନିଲମ୍ବିତ ହୋଇଥିବା କର୍ମଚାରୀମାନେ ହେଉଛନ୍ତି କନଷ୍ଟେବଳ ବିଶ୍ୱଜିତ୍ ସାଗର, ଉମାକାନ୍ତ ସାଗର ଏବଂ ହୋମଗାର୍ଡ ଦୁର୍ଯ୍ୟାଧନ କାର୍ଜି ଓ ଶେଖର ପ୍ରସାଦ ନାୟକ।
ସୂଚନା ଅନୁଯାୟୀ, ଏନଡିପିଏସ୍ ମାମଲାରେ ଗିରଫ ହୋଇଥିବା ଅଭିଯୁକ୍ତ ସନାତନ କରାଡ ଗତ ୧୩ ତାରିଖ ସକାଳୁ ମୋହନା ଥାନାରୁ ଚମ୍ପଟ ମାରିଛି। ଆସାମୀ ଫେରାର ଘଟଣାରେ ସୁରକ୍ଷା ବ୍ୟବସ୍ଥା ଢିଲା ଓ ଦାୟିତ୍ୱହୀନତା ପାଇଁ ଦୁଇ ଜଣ କନଷ୍ଟେବଳ ସମେତ ଦୁଇ ଜଣ ହୋମଗାର୍ଡଙ୍କୁ ନିଲମ୍ବିତ କରାଯାଇଥିବା ସୁଚନା ଦେଇଛନ୍ତି ଏଏସପି। ଆସାମୀ ଫେରାର ଘଟଣାରେ ମୋହନା ଥାନା କେସ ନଂ ୧୨୦/୨୦୨୦ରେ ଏକ ମାମଲା ରୁଜୁ କରାଯାଇଛି।