ଶିକ୍ଷକ ବଦଳି ପ୍ରତିବାଦରେ ସ୍କୁଲରେ ତାଲା

ଯାଜପୁରସଦର: ଯାଜପୁର ବ୍ଲକ୍‌ ସିମିଳିଆ ପଞ୍ଚାୟତର ମିରିଜାପୁର ନୋଡାଲ ଉ.ପ୍ରା. ବିଦ୍ୟାଳୟରେ ଶିକ୍ଷକ ବଦଳି ପ୍ରତିବାଦରେ ଛାତ୍ରଛାତ୍ରୀ ଓ ଅଭିଭାବକ ତାଲା ପକାଇବା ସହ ୨୦ ନମ୍ବର ଜାତୀୟ ରାଜପଥ ଅବରୋଧ କରିଥିଲେ। ଏହି ବିଦ୍ୟାଳୟର  ଶିକ୍ଷକ ଭୀମସେନ ଜେନାଙ୍କ ବଦଳିକୁ ଛାତ୍ରଛାତ୍ରୀ, ଅଭିଭାବକମାନେ ତୀବ୍ର ବିରୋଧ କରୁଛନ୍ତି। ଗତ ଶୁକ୍ରବାର ପିଲାମାନେ ରାସ୍ତା ଅବରୋଧ କରିଥିବା ବେଳେ ଶନିବାର କେହି ସ୍କୁଲ୍‌ ଆସିନଥିଲେ। ତେବେ ଆଜି ୨୦ ନମ୍ବର ଜାତୀୟ ରାଜପଥ ବନ୍ଦ କରିଥିଲେ। ଫଳରେ ରାସ୍ତାର ଉଭୟ ପାର୍ଶ୍ଵରେ ଗାଡ଼ି ମୋଟର ଅଟକି ରହିଥିଲା।

ସଦର ଥାନା ପୁଲିସ ଓ ପୂର୍ବତନ ସରପଞ୍ଚ ପରେଶ ବିଶ୍ବାଳ ପହଞ୍ଚି ବୁଝାସୁଝା କରିବା ପରେ ଧାରଣାକାରୀ ରାସ୍ତାରୁ ଉଠିଯାଇଥିଲେ। ହେଲେ ଛାତ୍ରଛାତ୍ରୀ ବିଦ୍ୟାଳୟ ମୁଖ୍ୟ ଫାଟକରେ ତାଲା ପକାଇ ବସି ରହିଥିଲେ। ଘଟଣାସ୍ଥଳକୁ ଶିକ୍ଷା ବିଭାଗର କୌଣସି ଅଧିକାରୀ ନଆସିବାରୁ ତୀବ୍ର ଅସନ୍ତୋଷ ପ୍ରକାଶ ପାଇଛି।