ବନ୍ତଳା: ଅନୁଗୁଳ ବ୍ଲକ କୁସୁମପାଟ ଗାଁରେ ଆଜି ଭୟାବହ ଅଗ୍ନିକାଣ୍ଡ ଘଟିଛି। ଏଥିରେ ତିନି ବଖରା ଘର ଭସ୍ମୀଭୂତ ସହ ୧୦ଟି ଛେଳିର ମୃତ୍ୟୁ ଘଟିଛି। ପ୍ରାପ୍ତ ସୂଚନା ଅନୁଯାୟୀ ଅନୁଗୁଳ ବ୍ଲକ ନନ୍ଦପୁର ପଞ୍ଚାୟତ କୁସୁମପାଟ ଗାଁର ମାଗତା ଦେହୁରୀଙ୍କ ଚାଳ ଛପରେ ଘରେ ଆଜି ରାତି ପ୍ରାୟ ୮ଟା ୧୦ ବେଳକୁ ବିଦ୍ୟୁତ ସର୍ଟ ସର୍କିଟ ଯୋଗୁଁ ଘରେ ଅଗ୍ନିକାଣ୍ଡ ଘଟିଥିଲା। ତେବେ ଏଥିରେ ବନ୍ଧା ହୋଇଥିବା ୧୦ଟି ଛେଳି ପୋଡି ଜୀବନ୍ତ ଦଗ୍ଧ ହୋଇଯାଇଛନ୍ତି। ଏହି ଭୟାବହ ଅଗ୍ନିକାଣ୍ଡ ଦେଖି ସ୍ଥାନୀୟ ଲୋକମାନେ ଅନୁଗୁଳ ଅଗ୍ନିଶମ ବାହିନୀକୁ ଖବର ଦେଇଥିଲେ। ତେବେ ଖବର ଲେଖା ହେବା ପର୍ଯ୍ୟନ୍ତ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ପାରିନାହିଁ। ଅନ୍ୟ ପକ୍ଷରେ କ୍ଷୟକ୍ଷତିର ଆକଳନ ହୋଇପାରିନାହିଁ।