ଖୋର୍ଦ୍ଧା: ଆଜିକୁ ୨୦ ବର୍ଷ ପୂର୍ବେ ଉଦ୍ଧାର ହୋଇ ଅର୍ଚ୍ଚନା ସ୍ୱେଚ୍ଛାସେବୀ ଅନୁଷ୍ଠାନ ଆଦୃତା ଶିଶୁ ସଦନରେ ରହିଥିଲେ । ପ୍ରଶାସନ ସହାୟତାରେ ତାଙ୍କର ଲାଳନପାଳନ ଓ ଶିକ୍ଷାଦିକ୍ଷା ପ୍ରଦାନ କରାଯାଇଥିଲା । ଆଜି ଜିଲ୍ଲା ପ୍ରଶାସନ ଓ ଆଦୃତା ଶିଶୁ ସଦନ କର୍ତୃପକ୍ଷ ଅର୍ଚ୍ଚନାଙ୍କ ପିତାମାତା ସାଜି ବିବାହ କରାଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଆଜି ଆଦୃତା ଶିଶୁ ସଦନରେ ଏହାର ଅଧ୍ୟକ୍ଷ ପ୍ରଫେସର ଆଦିତ୍ୟ କୁମାର ମହାନ୍ତି, ଅଧ୍ୟକ୍ଷା ସାଗରିକ ମିଶ୍ର ପିତାମାତା ସାଜି ଅର୍ଚ୍ଚନାଙ୍କ ବିବାହ ସୁନ୍ଦରଗଡ଼ର ଏକ ଘରୋଇ ଅନୁଷ୍ଠାନରେ ସୁରକ୍ଷାକର୍ମୀଭାବେ କାର୍ଯ୍ୟ କରୁଥିବା ଜୟରାମ ମାଝି (୨୩)ଙ୍କ ସହ କରାଇଥିଲେ । ଏହି ଅବସରେ ବରପକ୍ଷରୁ ତାଙ୍କ ପିତାମାତାଙ୍କ ସମେତ ୨୦ଜଣ ଉପସ୍ଥିତ ଥିବା ବେଳେ ଅର୍ଚ୍ଚନାଙ୍କ ପକ୍ଷରୁ ଜିଲ୍ଲାପାଳ ସନତ କୁମାର ମହାନ୍ତି, ଅତିରିକ୍ତ ଜିଲ୍ଲାପାଳ ମନୋଜ କୁମାର ପାଢ଼ୀ, ଜିଲ୍ଲା ଶିଶୁ ସୁରକ୍ଷା ଅଧିକାରୀ ବାଣିଶ୍ରୀ ପଟ୍ଟନାୟକ, ପୁରୋହିତ ଓ ସାଧୁସନ୍ଥ ଉପସ୍ଥିତ ଥିଲେ । ପ୍ରଶାସନ ପକ୍ଷରୁ ବିଜୁ ଶିଶୁ ସୁରକ୍ଷା ପାଣ୍ଠିରୁ ନବଦମ୍ପତିଙ୍କୁ ୫୦ହଜାର ଟଙ୍କାର ଏକ ଚେକ୍ ଜିଲ୍ଲାପାଳ ପ୍ରଦାନ କରିଥିଲେ । କାର୍ଯ୍ୟକ୍ରମକୁ ଆଦୃତାର ସମ୍ପାଦକ ସୁପ୍ରତି ମହାନ୍ତି ପରିଚାଳନା କରିଥିଲେ ।