ପାଠ ପଢ଼ାଇଲେ ଜିଲ୍ଲାପାଳ

ଦେଓଗାଁ: ସୋମବାର ବଲାଙ୍ଗୀର ଜିଲ୍ଲା ଗୁଡ଼ଭେଲା ବ୍ଲକ୍‌ ଚିଞ୍ଚେଡ଼ ୟୁଜି ହାଇସ୍କୁଲରେ ପହଞ୍ଚି ବଲାଙ୍ଗୀର ଜିଲ୍ଲାପାଳ ଚଞ୍ଚଳ ରାଣା ଦଶମ ଶ୍ରେଣୀ ପିଲାମାନଙ୍କୁ ଇଂରାଜୀ ପାଠ ପଢ଼ାଇଥିଲେ। ପ୍ରାୟ ଅଧଘଣ୍ଟା ଧରି ଇଂରାଜୀ ବିଷୟରେ ସେ ପିଲାଙ୍କୁ ଜ୍ଞାନ ବାଣ୍ଟିବା ସହ ବିଭିନ୍ନ ପ୍ରଶ୍ନ କରିଥିଲେ। ଏଥିରେ ପିଲାମାନେ ଉତ୍ସାହିତ ‌ଥିବା ଦେଖିବାକୁ ମିଳିଥିଲା।

ସୂଚନା ଅନୁସାରେ, ସୋମବାର ଗୁଡ଼ଭେଲା ବ୍ଲକ୍‌ରେ ଅଭିଯୋଗ ଶୁଣାଣି ଶିବିରରୁ ଫେରୁଥିବା ଜିଲ୍ଲାପାଳ ଏହି ସ୍କୁଲକୁ ଅଚାନକ ପରିଦର୍ଶନ କରିଥିଲେ। ସ୍କୁଲରେ ଶ୍ରେଣୀକୋଠରି ଓ ଶିକ୍ଷକ ଅଭାବ ଥିବାନେଇ ଗ୍ରାମବାସୀ ତାଙ୍କ ଦୃଷ୍ଟିଆକର୍ଷଣ କରିଥିଲେ। ୫-ଟିରେ ସ୍କୁଲଟି ରୂପାନ୍ତରିତ ହୋଇ ସୋନ୍ଦର୍ଯ୍ୟୀକରଣ ହେବାକୁ ଥିବାରୁ ସେ ଚାରିପଟ ବୁଲି ଦେଖିଥିଲେ। ଏହି ସମୟରେ ଦଶମ ଶ୍ରେଣୀକକ୍ଷକୁ ଯାଇ ଛାତ୍ରଛାତ୍ରୀଙ୍କ ସହ ଆଲୋଚନା କରିଥିଲେ। ଶିକ୍ଷକଙ୍କୁ ଇଂରାଜୀ ବହି ମାଗି ସେ ପଢ଼ାଇଥିଲେ। ଏହାକୁ ନେଇ ଶିକ୍ଷକ ମହଲରେ ଆଲୋଚନା ଜୋର୍‌ ଧରିଛି।