ଦ୍ୱାର ମୁହଁକୁ ପହଂଚି ପାରୁନି ରାଜସ୍ୱ ରଥ
ଖୋର୍ଦ୍ଧା: କରୋନା କଟକଣା ଯୋଗୁଁ ଲୋକମାନେ ତହସିଲ, ରାଜସ୍ୱ ନିରୀକ୍ଷକଙ୍କ କାର୍ଯ୍ୟାଳୟକୁ ଆସିପାରୁନାହାନ୍ତି । ଅପରପକ୍ଷରେ ସୀମିତ କର୍ମଚାରୀଙ୍କୁ ନେଇ କାର୍ଯ୍ୟାଳୟରେ କାମ ହେଉଥିବାରୁ ଠିକଣା ସମୟରେ ରାଜସ୍ୱ ମାମଲାର ଫୈସଲା ହୋଇପାରୁନାହିଁ । ଫଳରେ ହଜାର ହଜାର ଆର୍ଓଆର୍, ମ୍ୟୁଟେସ୍ନ, ଜାତି ପ୍ରମାଣପତ୍ର, ଜମି ପଟ୍ଟା ଆଦି ତହସିଲ କାର୍ଯ୍ୟାଳୟରେ ପଡ଼ିରହୁଛି । ରାଜ୍ୟ ସରକାର ଏହି ସମସ୍ୟାର ସମାଧାନ ପାଇଁ ଘର ନିକଟକୁ ଯାଇ ପ୍ରମାଣପତ୍ର, ପଟ୍ଟା ଆଦି ପ୍ରଦାନ କରିବା ଅଭିଯାନ ଆରମ୍ଭ କରିଥିଲେ । ପରିସଂଖ୍ୟାନକୁ ଦେଖିଲେ ଏହି ଅଭିଯାନର ସୁଫଳ ଜମି ପଟ୍ଟା ଆଦି ମାମଲାରେ ମିଳିଥିବା ବେଳେ ଆୟ, ଉତ୍ତରାଧିକାରୀ, ଜାତି ଆଦି ପ୍ରମାଣପତ୍ରରେ ସେହି ପରିମାଣରେ ମିଳିନଥିବା ଜଣାଯାଉଛି ।
Sambad is now on WhatsApp
Join and get latest news updates delivered to you via WhatsApp
ରାଜସ୍ୱ ବିଭାଗରୁ ମିଳିଥିବା ତଥ୍ୟାନୁସାରେ, ଡିସେମ୍ବର ୨୦୨୦ ଶେଷ ସୁଦ୍ଧା ୨୭, ୨୪୫ ମ୍ୟୁଟେସନ୍ ମାମଲା, ୨୭୪୦ ଓଏଲ୍ଆର୍ (୮-କ), ୧୨୭ଟି ଓଏଲ୍ଆର୍ (୧୯-୧)ଗ ମାମଲା ଜିଲ୍ଳାର ରାଜସ୍ୱ ବିଭାଗ ନିକଟରେ ବିଚାରଧୀନ ରହିଥିଲା । ମାର୍ଚ୍ଚ ମାସ ଶେଷ ସୁଦ୍ଧା ଏହା ୨୯,୧୬୫ଟି ମ୍ୟୁଟେସନ୍ ମାମଲା, ୨୬୬୦ ଓଏଲ୍ଆର୍ (୮-କ), ୧୩୪ଟି ଓଏଲ୍ଆର୍ (୧୯-୧)ଗ ମାମଲାକୁ ବୃଦ୍ଧି ପାଇଥିଲା । ଜୁଲାଇ ୨ ତାରିଖ ସୁଦ୍ଧା, ୧୬,୭୧୦ ଟି ମ୍ୟୁଟେସନ୍ ମାମଲା, ୪୯୩ଟି ଓଏଲ୍ଆର୍ (୮-କ), ୯୭ଟି ଓଏଲ୍ଆର୍ (୧୯-୧)ଗ ମାମଲା ବିଚାରାଧୀନ ରହିଛି । ସେହିଭଳି ୫୦,୦୭୧ଟି ଉତ୍ତରାଧିକାରୀ ପ୍ରମାଣପତ୍ର, ଆୟ ପ୍ରମାଣପତ୍ର, କରାଦାନକ୍ଷମତା ପ୍ରମାଣପତ୍ର, ଜାତିଗତ ପ୍ରମାଣପତ୍ର, ଆବାସିକ ପ୍ରମାଣପତ୍ର ଆଦି ଅନ୍ୟାନ୍ୟ ମାମଲା ଓ ୩୩,୪୦୦ ବ୍ୟାକ୍ଲଗ୍ ମାମଲା ପଡ଼ିରହିଛି ।
ସମସ୍ତ ମାମଲାର ସଂଖ୍ୟାକୁ ଆକଳନ କଲେ, ଜୁଲାଇ ୨ ତାରିଖ ସୁଦ୍ଧା ଜିଲ୍ଲାରେ ୨ଲକ୍ଷ ୯୮ ହଜାର ୩୨୦ଟି ଆବେଦନ ହୋଇଥିଲା । ଏହା ମଧ୍ୟରୁ ୩୩, ୩୫୪ଟି ଫର୍ମ-୩ ଆବେଦନକୁ ଖାରଜ କରାଯାଇଥିବା ବେଳେ ୬୪, ୮୮୫ଟି ଫର୍ମ-୩ ବ୍ୟତୀତ ଅନ୍ୟ ଆବେଦନକୁ ସଠିକ୍ ତଥ୍ୟ ଆଦି ପ୍ରଦାନରେ ତ୍ରୁଟି ରହିଥିବା କାରଣରୁ ଖାରଜ କରାଯାଇଛି । ମୋଟାମୋଟି ଭାବେ ମୋଟ ଆବେଦନର ୩୨.୯୯ ପ୍ରତିଶତ ରାଜସ୍ୱ ସମ୍ପର୍କିତ ଆବେଦନକୁ ଖାରଜ କରାଯାଇଛି । ସମଗ୍ର ରାଜ୍ୟରେ ଏହି ଖାରଜ ପ୍ରତିଶତରେ ଦେଓଗଡ଼ ପରେ ଖୋର୍ଦ୍ଧା ଜିଲ୍ଲା ତୃତୀୟ ସ୍ଥାନରେ ଥିବା ବେଳେ ସଂଖ୍ୟାରେ ଗଂଜାମ ଜିଲ୍ଲା ପରେ ଦ୍ୱିତୀୟ ସ୍ଥାନରେ ରହିଛି ।