ଅଧିକ ଯୌତୁକ ଦାବିରେ ନିର୍ଯ୍ୟାତନା ଅଭିଯୋଗ: ମହିଳାଙ୍କ ସ୍ୱାମୀ, ଶାଶୁ ଓ ଶ୍ୱଶୁର ଗିରଫ
ବାରିପଦା: ଅଧିକ ଯୌତୁକ ଦାବି କରି ଜଣେ ବିବାହିତ ମହିଳାଙ୍କୁ ଶାରୀରିକ ଓ ମାନସିକ ନିର୍ଯ୍ୟାତନା ଦିଆଯିବା ସହ ଜୀବନରୁ ମାରିଦେବା ନିମନ୍ତେ ଉଦ୍ୟମ ହୋଇଛି। ବାରିପଦା ଟାଉନ ଥାନାରେ ଅଭିଯୋଗ ହେବା ପରେ ପୁଲିସ ଅଭିଯୁକ୍ତ ସ୍ୱାମୀ, ଶ୍ୱଶୁର ଓ ଶାଶୁଙ୍କ ନାମରେ ଆଇପିସିର ଏକାଧିକ ଧାରାରେ ଏକ ମାମଲା ରୁଜୁ କରି ସେମାନଙ୍କୁ ଗିରଫ କରିବା ସହ କୋର୍ଟ ଚାଲାଣ କରିଛି।
Sambad is now on WhatsApp
Join and get latest news updates delivered to you via WhatsApp
ପ୍ରାପ୍ତ ସୂଚନାରୁ ଜଣାପଡିଛି, ବାରିପଦା ଟାଉନ ଥାନା ଅନ୍ତର୍ଗତ ଲକ୍ଷ୍ମୀପୋଷି ଇ-୫୮ ସିପି କଲୋନି ଅଂଚଳର ଗୌରାଙ୍ଗ ଚରଣ ସାହୁ(୫୯) ଙ୍କ ପୁଅ ଦେବାଶିଷ ସାହୁ(୩୨) ବାଲେଶ୍ୱର ଜିଲା କରଞ୍ଜିଆ ସତ୍ୟନଗର ଅଂଚଳରୁ ସୁଚରିତା ସାହୁଙ୍କୁ ବୈଦିକ ରୀତିନୀତି ଅନୁସାରେ ୨୦୧୭ ଡିସେମ୍ବର ୩ ତାରିଖରେ ବିବାହ କରିଥିଲେ। ବିବାହ ସମୟରେ ବରପକ୍ଷରୁ ଯୌତୁକ ବାବଦରେ କୌଣସି ଦାବି କରାଯାଇ ନ ଥିବାରୁ କନ୍ୟା ପକ୍ଷରୁ ବେଡି ଉପରେ ନଗଦ ୭୦ ହଜାର ଟଙ୍କା ସହ ଅନ୍ୟାନ୍ୟ ଆସବାବପତ୍ର ପ୍ରଦାନ କରାଯାଇଥିଲା। ମାତ୍ର ବାହାଘରର ପରବର୍ତ୍ତୀ ସମୟଠାରୁ ଅଧିକ ଯୌତୁକ ଦାବିରେ ସୁଚରିତାଙ୍କୁ ସ୍ୱାମୀ ଦେବାଶିଷ, ଶ୍ୱଶୁର ଗୌରାଙ୍ଗ ଓ ମମତାରାଣୀ ସାହୁ (୫୦)ଶାରୀରିକ ଓ ମାନସିକ ନିର୍ଯ୍ୟାତନା ଦେବା ସହ ଜୀବନରୁ ମାରିଦେବା ନିମନ୍ତେ ଉଦ୍ୟମ, ଚାରିତ୍ରିକ ଆକ୍ଷେପ କରି ଗାଳିଗୁଲଜ କରି ଆସୁଥିଲେ ।
କେବଳ ଏତିକି ନୁହେଁ, ଦେଢ଼ ମାସର ଗର୍ଭବତୀ ରହିଥିବା ସମୟରେ ସ୍ୱାମୀ ପେଟରେ ଗୋଇଁଠା ମାରି ଗର୍ଭ ନଷ୍ଟ କରାଇ ଦେଇଥିଲେ। ଏହି ସମସ୍ତ ଘଟଣାକୁ ନେଇ ଏସପିଙ୍କ ଦୃଷ୍ଟି ଆକର୍ଷଣ କରାଇବା ପରେ ପ୍ରାୟ ୪ ଥର ଉଭୟ ପକ୍ଷଙ୍କୁ ବସାଇ ଆପୋଷ ବୁଝାମଣା କରାଇବା ପରେ ମଧ୍ୟ କୌଣସି ସୁଫଳ ମିଳି ନ ଥିଲା । ପରବର୍ତ୍ତୀ ସମୟରେ ନିର୍ଯ୍ୟାତନା ବୃଦ୍ଧି ପାଇବାରେ ଲାଗିଲା। ସହିବାର ସମସ୍ତ ସୀମା ଅତିକ୍ରମ କରିବା ପରେ ସୁଚରିତା ବାଧ୍ୟ ହୋଇ ନ୍ୟାୟ ପାଇବା ନିମନ୍ତେ ଥାନାରେ ଆଶ୍ରୟ ନେଇଥିବାର ଜଣାପଡିଛି।