ସହିପାରିଲେନି ପେଟର ଭୋକ!: ବୋରିକିନାରୁ ବାସୁଦେବପୁର ଚାଲି ଚାଲି ଗଲେ ୩ ଜଣ ଶ୍ରମିକ
ଜଗତସିଂହପୁର: ପେଟର ଭୋକ ସହି ପାରିଲେନି । ପରିବାର ଚିନ୍ତା ବି ମାନସିକ ଯନ୍ତ୍ରଣା ଦେଲା । ଫଳରେ ଜଗତସିଂହପୁର ଜିଲ୍ଲା ବାଲିକୁଦା ବ୍ଲକ୍ ବୋରିକିନାରେ ଫସି ରହିଥିବା ଭଦ୍ରକ ଜିଲ୍ଲା ବାସୁଦେବପୁରର ତମ୍ବାଖଣ୍ଡ ଗାଁର ତିନି ଜଣ ଶ୍ରମିକ ଆଜି ଚାଲି ଚାଲି ନିଜ ଘରକୁ ବାହାରିଛନ୍ତି । ସକାଳୁ ବୋରିକିନାରୁ ବାହାରି ଅପରାହ୍ନ ସୁଧ ପ୍ରାୟ ୫୦ କିମି ଚାଲି ଜଗତସିଂହପୁର ଜିଲ୍ଲା ମୁଖ୍ୟାଳୟ ଅତିକ୍ରମ କରି ସାରିଥିଲେ । ବାଟରେ କିଛି ସହୃଦୟ ବ୍ୟକ୍ତି ତାଙ୍କୁ ଖାଦ୍ୟ ଯୋଗଇଥିଲେ । ତେବେ ବୋରିକିନାରୁ ବାସୁଦେବପୁର ୩୦୦ କିମିରୁ ଅଧିକ ରାସ୍ତା । ପାଖରେ ଟଙ୍କା ନାହିଁ କି ଖାଇବା ପାଇଁ ନାହିଁ । ଏଭଳି ପରିସ୍ଥିତିରେ ମଧ୍ୟ ଦୁଃଖ ଯନ୍ତ୍ରଣାକୁ ଖାତିର ନକରି ଶ୍ରମିକ ତିନି ଜଣ ରବୀନ୍ଦ୍ର କୁମାର, ନରେନ୍ଦ୍ର ସାମଲ, ତ୍ରିନାଥ ନାୟକ ନିଜ ପରିବାରକୁ ଫେରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ତେବେ ଗ୍ରୀନ୍ ଜୋନ୍ରେ ଥିବା ଜିଲ୍ଲାରୁ ଗ୍ରୀନ୍ ଜୋନ୍ ଜିଲ୍ଲାକୁ ପ୍ରଶାସନ ଶ୍ରମିକଙ୍କୁ ବସ୍ ଯୋଗେ ପଠାଇବାକୁ ବ୍ୟବସ୍ଥା କରୁଛି । ଗତକାଲି ତିର୍ତ୍ତୋଲ ବ୍ଲକ୍ରୁ ୮୦ ଜଣ ଶ୍ରମିକ ବସ୍ ଯୋଗେ ନିଜ ଘର ନୂଆପଡ଼ାକୁ ଯାଇଛନ୍ତି । ଆହୁରି ହଜାରରୁ ଅଧିକ ଶ୍ରମିକଙ୍କୁ ପଠାଯିବାର ବ୍ୟବସ୍ଥା କରାଯାଉଛି । କିନ୍ତୁ କରୋନା ପ୍ରଭାବିତ ଜିଲ୍ଲାରୁ କେହି ଗ୍ରୀନ୍ଜୋନ୍ ଜିଲ୍ଲାକୁ ଆସି ପାରିବେ ନାହିଁ କି ଯାଇ ପାରିବେ ନାହିଁ । ତେଣୁ ଏହି ତିନି ଜଣ ଶ୍ରମିକ ନିଜ ଭାଗ୍ୟ ଆଦରି ଚାଲି ଚାଲି ନିଜ ଘର ଅଭିମୁଖେ ଯାଇଛନ୍ତି । ବାଟରେ ଗାଡିକୁ ଯିବା ପାଇଁ ଅନୁରୋଧ କଲେ ବି ପୁଲିସ ଭୟରେ କେହି ନେଉ ନାହାନ୍ତି । ତେବେ ଚାଲି ଚାଲି ଯିବା ପ୍ରାୟତଃ ସମ୍ଭବ ହେବ ।
ରବୀନ୍ଦ୍ର କୁମାରଙ୍କ କହିବା ଅନୁସାରେ ଆମେ ଇଟା ଭାଟିରେ କାମ କରୁଥିଲୁ । ଲକ୍ଡାଉନ୍ ଆରମ୍ଭ ହେବ ମାତ୍ରେ କାମ ବନ୍ଦ ହୋଇ ଗଲା । ମାଲିକ ଆମକୁ କିଛି ଦିନ ଖାଇବାକୁ ଦେଲେ । ହେଲେ ତା ପରେ ସମସ୍ୟାରେ ପଡ଼ିଲୁ । କେତେ ଦିନ କାମ ଧନ୍ଦା ନକରି ବସି ରହିବୁ । ଘରେ ପିଲାମାନେ କଣ କଲେ ତାଙ୍କର କିଛି ଠିକ୍ ଠିକଣା ନାହିଁ । ଟଙ୍କା ପଠାଇଲେ ଘରେ ଚଳେ । ଆମରତ ରୋଜଗାର ନାହିଁ ମୋ ପିଲା ଛୁଆ କଣ କରୁଥିବେ କହି କାନ୍ଦି ପକାଇଥିଲେ ରବିନ୍ଦ୍ର । ଅନ୍ୟ ଦୁଇ ଜଣଙ୍କ ଅବସ୍ଥା ବି ସମାନ । କେବଳ ଏହି ତିନି ଜଣ ଶ୍ରମିକଙ୍କ କଥା ନୁହେଁ । ଏମିତି ଜିଲ୍ଳାରେ ଫସି ରହିଥିବା ଶ୍ରମକ ମାନେ ଦୁଃଖରେ ଭାଙ୍ଗି ପଡ଼ିଛନ୍ତି ।