ବଢୁଛି ଧଳାଜହର କାରବାର: ୫୩ ଗ୍ରାମ ବ୍ରାଉନ୍ସୁଗାର ଜବତ, ୩ ଗିରଫ
ଖୋର୍ଦ୍ଧା: ଆଜି ଦୁଇଟି ପୃଥକ ଘଟଣାରେ ଖୋର୍ଦ୍ଧା ଅବକାରୀ ବିଭାଗ ଓ ଖୋର୍ଦ୍ଧା ସଦର ଥାନା ପକ୍ଷରୁ ୫୩ ଗ୍ରାମ ବ୍ରାଉନ୍ସୁଗାର ଜବତ କରାଯିବା ସହ ୩ଜଣଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଖୋର୍ଦ୍ଧା ଅବକାରୀ ବିଭାଗର ଏକ ଟିମ ବରୁଣେଇ ପାହାଡ଼ ନିକଟରେ ଚଢ଼ଉ କରି ଜଟଣୀ ରଥୀପୁରର ସେକ୍ ମୁମତାଜ (୨୨)କୁ ଧରିଥିଲେ । ମୁମତାଜ ନିକଟରୁ ୪୨ ଗ୍ରାମ ବ୍ରାଉନ୍ସୁଗାର ଜବତ କରାଯାଇଛି । ସେ ଏକ ପଲସର ମୋଟରସାଇକଲ (ଓଡି୩୩ କ୍ୟୁ ୨୮୫୪)ରେ ଏହି ବ୍ରାଉନ୍ସୁଗାର ବିକ୍ରି କରିବାକୁ ବରୁଣେଇ ଆସିଥିଲା । ଜବତ ବ୍ରାଉନ୍ସୁଗାରର ଆନୁମାନିକ ମୂଲ୍ୟ ୪ଲକ୍ଷ ୨୧ହଜାର ଟଙ୍କା ହେବ । ଏନେଇ ଖୋର୍ଦ୍ଧା ଅବକାରୀ ବିଭାଗ ପକ୍ଷରୁ ଏନ୍ଡିପିଏସ୍ ଧାରାରେ ୨୨/୨୦୨୨-୨୩ରେ ଏକ ମାମଲା ରୁଜୁ କରାଯାଇ କୋର୍ଟ ଚାଲାଣ କରାଯାଇଛି ।
ସେହିଭଳି ଗତକାଲି ରାତିରେ ଖୋର୍ଦ୍ଧା ସଦର ଥାନା ପୁଲିସ ପକ୍ଷରୁ ଦଧିମାଛଗାଡ଼ିଆ ଠାରେ ଚଢ଼ଉ କରାଯାଇ ପୁରୀ ଜିଲ୍ଲା ଡେଲାଙ୍ଗ ହରିରାଜପୁରର ରୋହିତ କୁମାର ବେହେରା (୩୨) ଓ ଦଧିମାଛଗାଡ଼ିର ବିଶ୍ୱାନାଥ ବେହେରା (୨୧)କୁ ଧରିଥିଲା । ସେମାନଙ୍କ ନିକଟରୁ ୧୧.୨୮ ଗ୍ରାମ ବ୍ରାଉନ୍ସୁଗାର ଓ ଏକ ମୋଟର ସାଇକଲ ଜବତ କରାଯାଇଛି । ସେମାନଙ୍କ ବିରୋଧରେ ୧୧୪/୨୦୨୨ରେ ଏକ ମାମଲା ରୁଜୁ କରାଯିବା ସହ ଆଜି ସକାଳେ କୋର୍ଟ ଚାଲାଣ କରାଯାଇଥିବା ଜଣାଯାଇଛି ।