ସୁନା ଚେନ ଲୁଟେରା ସମେତ ୨ ଗିରଫ, ସୁନା ଚେନ ଓ ବାଇକ୍ ଜବତ
ରାଉରକେଲା: ୨ଟି ସୁନା ଚେନ, ୨ଟି ବାଇକ୍ ଓ ମୋବାଇଲ ସମେତ ୨ ଜଣ ଗିରଫ ହୋଇଛନ୍ତି। ରାଉରକେଲାର ଉଦିତ ନଗର ଥାନା ପୁଲିସ ମାଲଗୋଦାମ ଅଂଚଳର ଦୀପକ ସାହୁ ଓ ବୀରମିତ୍ରପୁର ଅଂଚଳର ମହମ୍ମଦ ସରିକ ଓରଫ ହମିଦଙ୍କୁ ଗିରଫ କରିଛି।
Sambad is now on WhatsApp
Join and get latest news updates delivered to you via WhatsApp
ଉଦିତ ନଗର ଥାନା ପରିସରରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ଆଇଆଇସି ସୁଦର୍ଶନ ପଣ୍ଡା କହିଛନ୍ତି, କୁଖ୍ୟାତ ଲୁଟେରା ଦୀପକ ନାଁରେ ଉଦିତ ନଗର, ସେକ୍ଟର-୧୫, ଝିରପାଣି, ସେକ୍ଟର-୩ ଓ ଛେଣ୍ଡ ଥାନାରେ ଏକାଧିକ ମାମଲା ରୁଜୁ ହୋଇଛି। ଦୀପକ ନିକଟରେ ଜେଲରୁ ଜାମିନରେ ଆସିଥିଲା। ଜେଲରୁ ବାହାରିବା ପରେ ମୋଟର ସାଇକେଲ, ସ୍କୁଟି ଚୋରୀ କରିବା ଆରମ୍ଭ କରିଦେଇଥିଲା। ସେହିପରି ସେ ମୋବାଇଲ ଫୋନ ଓ ସୁନା ଚେନ ଲୁଟ କରୁଥିଲା। ଚୋରୀ ଓ ଲୁଟ ପାଇଁ ଦୀପକ ବରିଷ୍ଠ ମହିଳାଙ୍କୁ ଟାର୍ଗେଟ କରୁଥିଲା। ସକାଳ ୫ଟାରୁ ସାଢ଼େ ୫ଟା ମଧ୍ୟରେ ଯେଉଁ ବରିଷ୍ଠ ମହିଳାମାନେ ଫୁଲ ତୋଲିବାକୁ ଆସୁଥିଲେ ଅଥବା ଚାଲିବାକୁ ଆସୁଥିଲେ, ସେମାନଙ୍କ ଠାରୁ ମୋବାଇଲ ଓ ସୁନାଚେନ ଛିଣ୍ଡାଇ ନେଉଥିଲା। ବିଭିନ୍ନ ଥାନାରେ ଚୋରୀ ଓ ଲୁଟ ଅଭିଯୋଗ ଆସିବା ପରେ ରାଉରକେଲା ଏସ୍ପିଙ୍କ ନିର୍ଦ୍ଦେଶରେ ଏକ ସ୍ୱତନ୍ତ୍ର ଟିମ୍ ଗଠନ ହୋଇଥିଲା। ଆଇଆଇସି ଶ୍ରୀ ପଣ୍ଡା କହିଛନ୍ତି, ଦୀପକ ଠାରୁ ଚୋରୀ ସାମଗ୍ରୀ କିଣିବା ଅଭିଯୋଗରେ ପୁଲିସ ମହମ୍ମଦ ସରିକକୁ ଗିରଫ କରିଛି।