ହତ୍ୟା ଉଦ୍ୟମ ମାମଲାରେ ୨ ଅଭିଯୁକ୍ତ ଭାଇଙ୍କୁ ୩ ବର୍ଷ ସଶ୍ରମ କାରାଦଣ୍ଡ ଓ ୨ ହଜାର ଟଙ୍କା ଜରିମାନା
ଭଦ୍ରକ: ଭଦ୍ରକ ମୁଖ୍ୟ ବିଚାର ବିଭାଗିୟ ମାଜିଷ୍ଟ୍ରେଟ ଦେବଦତ୍ତ ପଟ୍ଟନାୟକ ଏକ ମରଣାନ୍ତକ ଆକ୍ରମଣ ଓ ହତ୍ୟା ଉଦ୍ୟମ ମାମଲାର ବିଚାର କରି ଅଭିଯୁକ୍ତ ତିହିଡି ଥାନା ଅନ୍ତର୍ଗତ ଛତ୍ରପଦା ଗ୍ରାମର ବୈଷ୍ଣବ ମହାନ୍ତିଙ୍କ ୨ ପୁତ୍ର ଉମେଶ ମହାଳିକ ଓ ରମେଶ ମହାଳିକଙ୍କୁ ୩୨୫ ଦଫାରେ ଦୋଷି ସାବ୍ୟସ୍ତ କରି ୩ ବର୍ଷ ସଶ୍ରମ କାରାଦଣ୍ଡ ଓ ୨ ହଜାର ଟଙ୍କା ଜରିମାନା ଆଦେଶ ଦେଇଛନ୍ତି। ଜରିମାନା ଅନାଦେୟ ପୁଣି ୨ ମାସ ସଶ୍ରମ ଜେଲ ଦଣ୍ଡ ଭୋଗିବା ପାଇଁ ମାନ୍ୟବର କୋର୍ଟ ତାଙ୍କ ରାୟରେ ଉଲ୍ଲେଖ କରିଛନ୍ତି। ଘଟଣାରୁ ପ୍ରକାଶ ଏକ ପାରିବାରିକ ଜମିଜମା ମାମଲାକୁ ନେଇ ସେହି ଗ୍ରାମର ପ୍ରଶାନ୍ତ ମହାଳିକଙ୍କୁ ରମେଶ, ଉମେଶ ଓ ସେମାନଙ୍କ ପତ୍ନୀ ଯଥାକ୍ରମେ ମେନକା, ସୁଲୋଚନା ମାନେ ମିଶି ଗତ ୨୦୧୭ ମସିହା ମାର୍ଚ୍ଚ ୪ ତାରିଖ ମାରଣାସ୍ତ୍ର ସାହାଯ୍ୟରେ ମରଣାନ୍ତକ ଆକ୍ରମଣ କରିଥିଲେ।
Sambad is now on WhatsApp
Join and get latest news updates delivered to you via WhatsApp
ଏହି ଘଟଣାକୁ ନେଇ ପ୍ରଶାନ୍ତ ମହାଳିକଙ୍କ ଅଭିଯୋଗ କ୍ରମେ ତିହିଡି ଥାନାରେ ସେମାନଙ୍କ ବିରୁଦ୍ଧରେ ଥାନା କେସ ନଂ- ୬୯/୨୦୧୭ ଦଫା- ୩୦୭, ୩୨୩, ୩୨୫, ୫୦୬, ୩୪ ରେ ଏକ ମାମଲା ରୁଜୁ ହୋଇଥିଲା। ଅଭିଯୁକ୍ତ ମାନେ ଗିରଫ ହୋଇଥିଲେ ଓ ପରେ ମାନ୍ୟବର କୋର୍ଟ ସେମାନଙ୍କୁ ଜାମିନ ପ୍ରଦାନ କରିଥିଲେ। ମାମଲାଟି ତଦନ୍ତ ପରେ ଚାର୍ଜସିଟ ହୋଇଥିଲା। ଏହି ମାମଲାଟି ଭଦ୍ରକ ମୁଖ୍ୟ ବିଚାର ବିଭାଗିୟ ମାଜିଷ୍ଟ୍ରେଟଙ୍କ ଅଦାଲତରେ ୨୧/୨୦୧୮ରେ ବିଚାର ହୋଇ ଆଜି ଏହି ରାୟ ପ୍ରକାଶ ପାଇଛି। ମାନ୍ୟବର କୋର୍ଟ ୨ ମହିଳା ଅଭିଯୁକ୍ତଙ୍କୁ ନିର୍ଦୋଶରେ ଖଲାସ କରିଥିବା ବେଳେ ୨ ଭାଇ ରମେଶ ଓ ଉମେଶକୁ ୩୨୫ ଦଫାରେ ଦୋଷି ସାବ୍ୟସ୍ତ କରି ଉପରୋକ୍ତ ଦଣ୍ଡ ବିଧାନ କରିଛନ୍ତି। ସରକାରଙ୍କ ତରଫରୁ ଭଦ୍ରକର ଅତିରିକ୍ତ ପବ୍ଲିକ ପ୍ରସିକ୍ୟୁଟର ଜତିକାନ୍ତ ନାୟକ ମାମଲା ପରିଚାଳନା କରୁଥିଲେ।