ଜଗନ୍ନାଥପ୍ରସାଦ: ଗଞ୍ଜାମ ଜିଲ୍ଲା ଜଗନ୍ନାଥପ୍ରସାଦ ବ୍ଲକ୍ ରାଉତି ପଞ୍ଚାୟତ ଜଗନ୍ନାଥପାଟଣା ଗ୍ରାମରେ ଆଜି ସନ୍ଧ୍ୟାରେ ଏକ ଦୁଃଖଦ ଘଟଣା ଘଟିଛି। ପଙ୍କ ସଫା କରିବା ଓ ଉଝାଳିବାକୁ କୂଅ ଭିତରେ ପଶିଥିବା ଦୁଇ ଭାଇଙ୍କ ଶ୍ୱାସରୁଦ୍ଧରେ ମୃତ୍ୟୁ ହୋଇଛି। ମୃତକମାନେ ହେଲେ, କୈଳାସ ପ୍ରଧାନ (୪୮) ଓ ପ୍ରଦୀପ ପ୍ରଧାନ (୩୬)। ଏଥିରେ କୈଳାସଙ୍କ ପୁଅ ବାବୁ ଗୁରୁତର ହୋଇଥିବାରୁ ତାଙ୍କୁ ବ୍ରହ୍ମପୁର ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି।
Sambad is now on WhatsApp
Join and get latest news updates delivered to you via WhatsApp
କୈଳାସଙ୍କ ଘର ବାରିପଟେ ଥିବା କୂଅ ଶୁଖିଯାଇଥିବା ସହ ପଙ୍କ ଭର୍ତ୍ତି ହୋଇ ରହିଥିଲା। ଫଳରେ ଏହାକୁ ଉଝାଳିବା ପାଇଁ କୈଳାସ ଓ ତାଙ୍କ ସାନ ଭାଇ ପ୍ରଦୀପ ଆଜି ଅପରାହ୍ଣ ୪ଟାରେ କୂଅ ଭିତରେ ପଶିଥିଲେ। କିନ୍ତୁ ବହୁ ସମୟ ଧରି କୈଣସି ଶବ୍ଦ ନଶୁଭିବାରୁ କୈଳାସଙ୍କ ପୁଅ କୂଅ ପାଖରେ ବାପା ଓ ଦାଦାଙ୍କୁ ଡାକିଥିଲେ। କିନ୍ତୁ କେହି ନଶୁଣିବାରୁ ଘର ଲୋକଙ୍କୁ ଏନେଇ ଖବର ଦେବା ସହ ନିଜେ କୂଅ ଭିତରେ ପଶିଯାଇଥିଲେ। କିଛି ସମୟ ପରେ ଜଗନ୍ନାଥପ୍ରସାଦ ଦମକଳବାହିନୀ ପହଞ୍ଚି ୩ଜଣଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଜଗନ୍ନାଥପ୍ରସାଦ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଆଣିଥିଲା।
ସ୍ୱାସ୍ଥ୍ୟକେନ୍ଦ୍ରରେ କୈଳାସ ଓ ପ୍ରଦୀପଙ୍କୁ ଡାକ୍ତର ମୃତ ଘୋଷଣା କରିଥିଲେ। ବାବୁଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ ବ୍ରହ୍ମପୁର ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ଦୁଇଭାଇଙ୍କ ଶବକୁ ବ୍ୟବଚ୍ଛେଦ ପାଇଁ ଭଞ୍ଜନଗର ଉପଖଣ୍ଡ ସ୍ୱାସ୍ଥ୍ୟକେନ୍ଦ୍ରକୁ ପଠାଯାଇଛି। ଏହି ଘଟଣା ଗାଁରେ ଶୋକାକୁଳ ପରିବେଶ ଆଣି ଦେଇଛି।