ଦୁଇ କାର ମୁହାଁମୁହିଁ ଧକ୍କା: ଦୁଇ ମୃତ, ୫ଗୁରୁତର ଆହତଙ୍କୁ ବ୍ରହ୍ମପୁର ସ୍ଥାନାନ୍ତର
ଘୁ.ଉଦୟଗିରି: କନ୍ଧମାଳ ଜିଲ୍ଲା କଳିଙ୍ଗା ନିକଟ ରାଇପଦା ଠାରେ ଆଜି ସନ୍ଧ୍ୟା ସମୟରେ ଦୁଇଟି କାର ମୁଁହାମୁହିଁ ଧକ୍କା ହୋଇଛି। ଏହି ଦୁର୍ଘଟଣାରେ ଦୁଇ ଜଣଙ୍କ ଘଟଣା ସ୍ଥଳରେ ମୃତ୍ୟୁ ହୋଇଥିବା ସୂଚନା ମିଳିଛି। କଳିଙ୍ଗାରୁ ଘୁ.ଉଦୟଗିରି ଅଭିମୁଖେ ଆସୁଥିବା ଏକ ଅଲଟୋ କାର (ଓଆର-୧୫ଏଚ୍-୪୦୧୧) ସହ ବିପରୀତ ଦିଗରୁ ଆସୁଥିବା ଏକ ମାରୁତି ସୁଇଫ୍ଟ କାର ରାଇପଦା ବୁଲାଣିରେ ମୁହାଁମୁହିଁ ଧକ୍କା ହୋଇଥିଲା। ମୃତକମାନେ ହେଲେ କନ୍ଧମାଳ ଜିଲ୍ଲା ଟିକାବାଲି ବ୍ଲକର ତେନ୍ତୁଳିଗଡ଼ର ପଂଚାନନ ସାହୁ ଓ ବୁଦୁଗୁଡ଼ାରି ଗାଁର ସୁବାଷ ଚନ୍ଦ୍ର ବେହେରା। ଏମାନେ ଅଲଟୋରେ ଥିଲେ। ଆହତମାନେ ହେଲେ ଟିକାବାଲି ବ୍ଲକର ପ୍ରଧନାପଡ଼ାର ମିଥୁନ ପ୍ରଧାନ, ଗାଡ଼ିକିଆର ନାଗାର୍ଜୁନ ନାଏକ, ଦୀପକ କୁମାର ମଲ୍ଲିକ, ତେନ୍ତୁଳିଗଡ଼ର ରାଜେନ୍ଦ୍ର କୁମାର ସାହୁ ଓ ଟିକାବାଲିର ମହେଶ୍ୱର ପ୍ରଧାନ।
Sambad is now on WhatsApp
Join and get latest news updates delivered to you via WhatsApp
ତେବେ ଦୁର୍ଘଟଣାରେ ୫ଜଣ ଗୁରୁତର ଆହତଙ୍କୁ ସ୍ଥାନୀୟ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା। ହେଲେ ସେମାନଙ୍କ ଅବସ୍ଥା ଗୁରୁତର ଥିବାରୁ ସେମାନଙ୍କୁ ବ୍ରହ୍ମପୁର ରେଫେର କରିଦିଆଯାଇଛି। ଖବର ପାଇ ସ୍ଥାନୀୟ ଦମକଳ ବାହିନୀ ଗାଡି ଘଟଣା ସ୍ଥଳରେ ପହଞ୍ଚି ସମସ୍ତଙ୍କୁ ଉଦ୍ଧାର କରି ସ୍ଥାନୀୟ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ। ସ୍ଥାନୀୟ ଆଇଆଇସି ନରେଶ ସାହୁ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି।