କୋଇଲା ବୋଝେଇ ଗାଡ଼ିକୁ ଧକ୍କା ଦେଇ ୨ ମୃତ
ରେଙ୍ଗାଲି: ସମ୍ବଲପୁର ଜିଲ୍ଲା ଠେଲକଲୋଇ ଥାନା ଅନ୍ତର୍ଗତ ଠେଲକଲୋଇଠାରେ ଏକ କୋଇଲା ବୋଝେଇ ଟ୍ରକ୍କୁ ପଛ ପଟୁ ଧକ୍କା ଦେବାରୁ ୨ ବାଇକ୍ ଆରୋହୀଙ୍କ ମୃତ୍ୟୁ ହୋଇଯାଇଛି। ଏହି ଘଯଣାରେ ଜଣେ ମହିଳା ଗୁରୁତର ଆହତ ହୋଇଛନ୍ତି। ମଙ୍ଗଳବାର ସନ୍ଧ୍ୟା ପ୍ରାୟ ୫ଟାରେ ସମ୍ବଲପୁର ଜିଲ୍ଲା ମୁରା ଗ୍ରାମର ଟୁନା ସାହୁ, ଜୟରାମ ପଧାନ ଓ ଇନ୍ଦ୍ରାଣୀ ପାତ୍ର ଏକ ବାଇକ୍ (ଓଡି-୨୩ଏଲ୍-୫୦୬୫)ରେ ହିର୍ମାରେ ବୁଧବାର ହେବାକୁ ଥିବା ଏକ ଶୁଦ୍ଧି କ୍ରିୟାରେ ଯୋଗ ଦେବାକୁ ଯାଉଥିଲେ। ସମ୍ବଲପୁର- ରାଉରକେଲା ବିଜୁ ଏକ୍ସପ୍ରେସ୍ ୱେ ପାର୍ଶ୍ବରେ ଛିଡ଼ା ହୋଇଥିବା ଏକ କୋଇଲା ବୋଝେଇ ଟ୍ରଲର (ଓଡି-୨୩ଆର୍-୨୨୭୨)କୁ ବାଇକ୍ଟି ଧକ୍କା ଦେଇଥିଲା। ଘଟଣାସ୍ଥଳରେ ଟୁନା ଓ ଜୟରାମଙ୍କ ମୃତ୍ୟୁ ହୋଇଯାଇଥିଲା। ଗୁରୁତର ଅବସ୍ଥାରେ ଇନ୍ଦ୍ରାଣୀଙ୍କୁ ବୁର୍ଲା ଡାକ୍ତରଖାନା ପଠାଯାଇଛି। ପୁଲିସ ଶବ ଜବତ କରି ବ୍ୟବଚ୍ଛେଦ ପାଇଁ ବୁର୍ଲା ପଠାଇଛି। ପୁଲିସ ଏହି ଘଟଣାରେ ଏକ ମାମଲା ରୁଜୁ କରି ଅଧିକ ତଦନ୍ତ ଚଳାଇଛି।