ଚାଷ କାମରୁ ଘରକୁ ଫେରୁଥିଲେ ୨ ଚାଷୀ, ବଜ୍ରପାତ ନେଲା ଜୀବନ
ନିରାକାରପୁର: ବିଲରେ ଚାଷ କାମ ସାରି ଆଜି ସନ୍ଧ୍ୟାରେ ଘରକୁ ଫେରୁଥିବା ବେଳେ ବଜ୍ରପାତ ହୋଇଛି । ଏଥିରେ ୨ ଜଣ ଚାଷୀଙ୍କର ମୃତ୍ୟୁ ହୋଇଛି । ଖୋର୍ଦ୍ଧା ଜିଲ୍ଲା ଜଙ୍କିଆ ଥାନା ଅନ୍ତର୍ଗତ ଓଳସିଂହ ପଂଚାୟତର ଡମଣଭୂଇଁ ଗ୍ରାମରେ ଏଭଳି ଅଭାବନୀୟ ଘଟଣା ଘଟିଛି । ମୃତ ଚାଷୀମାନେ ହେଲେ ବଂଶୀଧର ଦଳେଇ (୫୦) ଓ ପ୍ରଦୀପ ଭୋଳ (୪୦) ।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ ଡମଣଭୂଇଁ ଗ୍ରାମର ବଂଶୀଧର ଏବଂ ପ୍ରଦୀପ ଅନ୍ୟ ଦିନ ପରି ଆଜି ମଧ୍ୟ ଚାଷ ଜମିକୁ ଯାଇଥିଲେ । ଆଜିର କାମ ଶେଷ କରି ଘରକୁ ଫେରୁଥିଲେ । ଏହି ସମୟରେ ଘଡ଼ଘଡ଼ି ସହିତ ବର୍ଷା ହୋଇଥିଲା । ଫଳରେ ସେମାନେ ରାସ୍ତାକଡ଼ରେ ଥିବା ଏକ ଆମ୍ବଗଛ ତଳକୁ ଯାଇଥିଲେ । ବଜ୍ରପାତ ହେବାରୁ ସେମାନେ ୨ ଜଣ ତଳେ ପଡ଼ିଯାଇଥିଲେ । ପରିବାର ଓ ଗାଁ ଲୋକଙ୍କ ଦ୍ୱାରା ବଂଶୀଧର ଓ ପ୍ରଦୀପଙ୍କୁ ଖୋର୍ଦ୍ଧା ଜିଲ୍ଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଥିଲା । କିନ୍ତୁ ଡାକ୍ତର ୨ ଜଣଙ୍କୁ ମୃତ ଘୋଷଣା କରିଛନ୍ତି ।