ପୋଖରୀରେ ବୁଡ଼ିଗଲେ ୨ ଶିଶୁ କନ୍ୟା, ଡାକ୍ତରଖାନାରେ ମୃତ ଘୋଷଣା
ସୋନପୁର: ସୁବର୍ଣ୍ଣପୁର ଜିଲ୍ଲାର ସୋନପୁର ଥାନା ଅନ୍ତର୍ଗତ ମଳିକମୁଣ୍ଡା ଗ୍ରାମରେ ପୋଖରୀରେ ବୁଡ଼ିଯିବାରୁ ୨ ଜଣ ଶିଶୁକନ୍ୟାଙ୍କ ମୃତ୍ୟୁ ଘଟିଛି। ମୃତକମାନେ ହେଲେ ଉଗେର ମହାନନ୍ଦଙ୍କ ଝିଅ ପିଙ୍କି ମହାନନ୍ଦ (୬) ଓ ନୃପ ଲୁହାଙ୍କ ଝିଅ ରାକ୍ଷୀ ଲୁହା (୮)। ସୂଚନା ପାଇ ଅଗ୍ନିଶମ ବିଭାଗର କର୍ମଚାରୀମାନେ ଘଟଣାସ୍ଥଳରେ ପହଂଚି ଉଭୟ ପିଙ୍କି ଓ ରାକ୍ଷୀଙ୍କୁ ଉଦ୍ଧାର କରି ଡାକ୍ତରଖାନା ନେଇଯାଇଥିଲେ। ହସ୍ପିଟାଲରେ ପହଂଚିବା ପରେ ପିଙ୍କି ଓ ରାକ୍ଷୀଙ୍କୁ ଡାକ୍ତର ମୃତ ଘୋଷଣା କରିଥିଲେ।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁସାରେ ଗୁରୁବାର ମଧ୍ୟାହ୍ନ ସମୟରେ ପ୍ରଥମ ଶ୍ରେଣୀର ଛାତ୍ରୀ ପିଙ୍କି ଓ ତୃତୀୟ ଶ୍ରେଣୀ ଛାତ୍ରୀ ରାକ୍ଷୀ ଘରୁ ବାହାରି ଯାଇଥିଲେ। ସେମାନେ ଘରୁ ଯିବା ସମୟରେ କାହାରିକୁ କିଛି ଜଣାଇ ନ ଥିଲେ। ପରେ ପରିବାର ଲୋକେ ଏଣେ ତେଣେ ଖୋଜାଖୋଜି କରି ଶିଶୁକନ୍ୟା ଦ୍ୱୟଙ୍କୁ ପାଇ ନ ଥିଲେ। ମାତ୍ର ସନ୍ଦେହ ହେବାରୁ ପରିବାର ଲୋକେ ଅଗ୍ନିଶମ ବିଭାଗକୁ ସୂଚନା ଦେଇଥିଲେ। ଅଗ୍ନିଶମ ବିଭାଗର କର୍ମଚାରୀମାନେ ୨ ଶିଶୁକନ୍ୟାକୁ ପୋଖରୀରୁ ଉଦ୍ଧାର କରିବା ପରେ ସେମାନଙ୍କୁ ସୋନପୁର ଜିଲ୍ଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା। ହସ୍ପିଟାଲରେ ପିଙ୍କି ଓ ରାକ୍ଷୀଙ୍କୁ ଡାକ୍ତର ମୃତ ଘୋଷଣା କରିଥିଲେ।