୨ ରାଜପଥ ଲୁଟେରା ଗିରଫ, ବନ୍ଧୁକ ଜବତ

ଖୋର୍ଦ୍ଧା: ଗତକାଲି ବିଳମ୍ବିତ ରାତିରେ ଟାଉନ୍ ଥାନାରୁ ପାଟ୍ରୋଲିଂ ଟିମ୍ ରାଜପଥ ଲୁଟେରା ଗ୍ୟାଙ୍ଗର ୨ ସଦସ୍ୟଙ୍କୁ ଗିରଫ କରିବା ସହ ସେମାନଙ୍କ ନିକଟରୁ ଏକ ଦେଶୀ ବନ୍ଧୁକ ଜବତ କରିଛନ୍ତି ।

ସୂଚନାନୁସାରେ ଗତକାଲି ଟାଉନ୍ ଥାନାର ଅତିରିକ୍ତ ଥାନା ଅଧିକାରୀ ଓ ଟିମ୍ ରାତି ପାଟ୍ରୋଲିଂ କରୁଥିବା ବେଳେ ଚଣ୍ଡିଚୁଆ ଛକ ନିକଟରେ ଏକ କାରକୁ ଅଟକାଇ ଡକାୟତି ଉଦ୍ୟମ କରୁଥିବା ସୂଚନା ପାଇଥିଲେ ।

ସୂଚନା ପାଇଁ ପୁଲିସ୍ ଟିମ୍ ତୁରନ୍ତ ଘଟଣାସ୍ଥଳରେ ପହଞ୍ଚି ଦୁଇ ଜଣ ଲୁଟେରାଙ୍କୁ ଧରିବାରେ ସକ୍ଷମ ହୋଇଥିଲେ । ଗିରଫ ହୋଇଥିବା ଦୁଇଜଣ ହେଲେ ସରଧାପୁରର ସେକ୍ ତୌସିଫ୍ ଓରଫ କଣା (୩୦) ଏବଂ ତରତୁଆର ସେକ୍ ମୁସ୍ତାକ ଓରଫ ବୁଦ୍ଧିଆ (୨୯) । ସେମାନଙ୍କ ନିକଟରୁ ଗୋଟିଏ ଦେଶୀ ବନ୍ଧୁକ ଜବତ ହୋଇଛି ।

ଏନେଇ ଟାଉନ୍ ଥାନା ଅଧିକାରୀ ଉମାଶଙ୍କର ସିଂହ କହିଛନ୍ତି ଯେ ତୌସିଫ୍ ବିରୋଧରେ ପୂର୍ବରୁ ୨୦୨୧ରେ ଏକ ମାମଲା ରହିଥିବା ବେଳେ ମୁସ୍ତାକ୍ ବିରୋଧରେ ୨୦୧୯ରେ ୨ଟି ଓ ୨୦୨୦ରେ ଗୋଟିଏ ଅପରାଧିକ ମାମଲା ରହିଛି । ଉଭୟଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି ।