ଅଘଟଣର ଦିନ: ରାଇରଙ୍ଗପୁରରେ ଦୁର୍ଘଟଣା, ଆଖି ବୁଜିଲେ ଦୁଇ ନାବାଳିକା
ରାଇରଙ୍ଗପୁର: ଆଜି ସକାଳ ଥିଲା ମୟୂରଭଂଜ ଜିଲ୍ଲା ବାମନଘାଟି ଉପଖଣ୍ଡ ପାଇଁ ଅଶୁଭ | ଅଘଟଣରେ ପ୍ରାଣ ହରାଇଲେ ୧୨ ବର୍ଷର ଦୁଇ ଜଣ ନାବାଳିକା | ସକାଳେ ଘଡଘଡି ସହ ବର୍ଷା ହେବାରୁ ଜାମଦା ଥାନା ତେଣ୍ଡରା ଗ୍ରାମର ସ୍ବର୍ଗତ ଗୁଲିଆ ସିର୍କାଙ୍କ ଝିଅ ଶିବାନୀ ଗାଁ ପାଖ ବିଲକୁ ଯାଇଥିବା ବେଳେ ବଜ୍ରପାତ ହୋଇଥିଲା | ଗୁରୁତର ଅବସ୍ଥାରେ ତାଙ୍କୁ ରାଇରଙ୍ଗପୁର ଉପଖଣ୍ଡ ଚିକିତ୍ସାଳୟକୁ ଅଣା ଯାଇଥିବା ବେଳେ ମୃତ୍ୟୁ ଘୋଷଣା କରାଯାଇଥିଲା |
Sambad is now on WhatsApp
Join and get latest news updates delivered to you via WhatsApp
ଅଘଟଣ ଖବର ପାଇ ରାଜ୍ୟସଭା ସାଂସଦ ମମତା ମହାନ୍ତ, ବିଜେଡି ସଦର ଜିଲ୍ଲା ସଭାପତି କାଶୀନାଥ ହେମ୍ବ୍ରମ, ରତିକାନ୍ତ ପରୀକ୍ଷା ପ୍ରମୁଖ ପହଂଚି ମୃତ ନାବାଳିକାର ପରିବାରକୁ ସମବେଦନା ଜଣାଇଥିଲେ | ନାବାଳିକାଙ୍କ ଶବ ବ୍ୟବଛେଦ କରାଯାଇଛି | ସେହିପରି ରାଇରଙ୍ଗପୁର ଟାଉନ ଥାନା ଅଂଚଳରେ ଅନ୍ୟ ଜଣେ ନାବାଳିକା ପାଣିରେ ବୁଡି ମୃତ୍ୟୁ ଘଟିଛି |
ରାଇରଙ୍ଗପୁର ସହର ଇଚିଣ୍ଡାର ବଜରଙ୍ଗୀ ବେହେରାଙ୍କ ୧୨ ବର୍ଷର ଝିଅ ବେବି ବେହେରା ତାଙ୍କ ମାମୁଁ ଘର ତିଳପୋଷିକୁ ଯାଇଥିଲେ | ଆଜି ସକାଳେ ସେଠାରେ ପୋଖରୀକୁ ଗାଧୋଇବାକୁ ଯାଇଥିବା ବେଳେ ପାଣିରେ ବୁଡ଼ି ଯାଇଥିଲେ | ତାଙ୍କୁ ଉଦ୍ଧାର କରି ରାଇରଙ୍ଗପୁର ହସ୍ପିଟାଲକୁ ଅଣାଯାଇଥିବା ବେଳେ ତାଙ୍କୁ ଡାକ୍ତର ମୃତ ଘୋଷଣା କରିଥିଲେ | ଆଜି ସକାଳେ ଦୁଇ ଗୋଟି ଅଘଟଣରେ ଦୁଇ ଜଣ ନାବାଳିକାଙ୍କ ମୃତ୍ୟୁ ଘଟଣାରେ ହସ୍ପିଟାଲରେ ଶୋକାକୁଳ ପରିବେଶ ସୃଷ୍ଟି ହୋଇଥିଲା |