ସୁନ୍ଦରଗଡ଼: ରିତମ୍ଭରା, ବୟସ ମାତ୍ର ଦୁଇ। ଖନେଇଖନେଇ ଅବୁଝା ଭାଷାରେ କଥା କହିବାର ବୟସ। କିନ୍ତୁ ରିତମ୍ଭରାର ଜିଭ ଅଗରେ ଇଂରାଜି ବର୍ଣ୍ଣମାଳା ଠାରୁ ଆରମ୍ଭ କରି ପ୍ରତି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ରାଜଧାନୀ ନାଁ। କେବଳ ସେତିକି ନୁହେଁ, ଚିତ୍ର ଦେଖି ଇଂରାଜିରେ ତା’ ନାଁ ଓ ରଙ୍ଗ କହି ଦେଉଛନ୍ତି। କିଛି ପଚାରିବା କ୍ଷଣି ଚଟକିନା କହି ଦେଉଛନ୍ତି ଉତ୍ତର।
Sambad is now on WhatsApp
Join and get latest news updates delivered to you via WhatsApp
ସୁନ୍ଦରଗଡ଼ ସହର ଆରଆରଆଇଟି କଲୋନିର ରିତମ୍ଭରାକୁ ଯିଏ ଶୁଣୁଛି, ସିଏ ଆଶ୍ଚର୍ଯ୍ୟ ହେଉଛି। ଏ ବୟସରେ ରିତମ୍ଭରାର ସାଧାରଣଜ୍ଞାନ ତାଙ୍କୁ ସହରରେ ବିସ୍ମୟକର ପ୍ରତିଭାର ପରିଚୟ ଦେଇଛି। କଲୋନିର ସୁମନ୍ତ ପଟେଲ ଓ ତାଙ୍କ ପତ୍ନୀ ରଶ୍ମିତା ପଟେଲଙ୍କ ଝିଅ ରିତମ୍ଭରାକୁ ବର୍ଷକର ହୋଇଥିବା ବେଳେ ତାଙ୍କ ଜିଜ୍ଞାସୁ ମନୋଭାବ ଓ ଅନେକ କିଛି ଶିଖିବାର ପ୍ରବଳ ଆଗ୍ରହ ଜଣାପଡ଼ିଥିଲା। ତାଙ୍କ ମା’ କହିବା କଥା ଥରେ ଶୁଣିଦେଲେ କି କୌଣସି ଜିନିଷ ଥରେ ଦେଖିଦେଲେ ତାକୁ ସହଜରେ ମନେ ରଖିବାର ଚମକପ୍ରଦ କ୍ଷମତା ତାଙ୍କର ରହିଛି। ଏତିକି ନୁହେଁ, ପ୍ରତିଦିନ ସେ ୪ରୁ ୫ ଘଣ୍ଟା ବହି ଖେଳାଇ ବସି ଯାଉଥିବା ବେଳେ ମା’ଙ୍କୁ ପଢ଼ାଇବାକୁ ବାଧ୍ୟ କରନ୍ତି।
ମା’ ପଢ଼ାଇ, ବୁଝାଇ ଥକି ଯାଆନ୍ତି, କିନ୍ତୁ ରିତମ୍ଭରା ମୁହଁରେ ସାମାନ୍ୟ କ୍ଲାନ୍ତି ନଥାଏ। ଝିଅର ଆଗ୍ରହ ଓ ପ୍ରଖର ସ୍ମୃତିଶକ୍ତି ଦେଖି ବାପାମାଙ୍କ ସମେତ ମାମୁ ରୋଶନ ପଟେଲ ତାଙ୍କ ପ୍ରତିଭାକୁ ଅଧିକ ବିକଶିତ କରିବାକୁ ଉଦ୍ୟମ ଚଲାଇଛନ୍ତି। କୁନି ପ୍ରତିଭାକୁ ଆଗକୁ ଇଣ୍ଡିଆ ବୁକ୍ ଅଫ ରେକର୍ଡ ଓ ଏସିଆ ବୁକ୍ ଅଫ୍ ରେକର୍ଡକୁ ପହଞ୍ଚାଇବାକୁ ଚେଷ୍ଟା କରାଯାଉଥିବା ମାମୁ ରୋଶନ ପ୍ରକାଶ କରନ୍ତି। ଖେଳିବା ବୁଲିବାର ଚଞ୍ଚଳମନା ବୟସରେ ରିତମ୍ଭରା ଏକ ବିରଳ ଓ ବିସ୍ମୟକର ବ୍ୟତିକ୍ରମ ନିଶ୍ଚୟ।