ଉତ୍କଳ ଗ୍ରାମୀଣ ବ୍ୟାଙ୍କ ୟୁ.ପି.ଏସ ଅଚଳ,୧୨ ଦିନ ହେଲା ଗ୍ରାହକ ସେବା ବନ୍ଦ
ତେନ୍ତୁଳିଖୁଣ୍ଟି : ତେନ୍ତୁଳିଖୁଣ୍ଟି ସ୍ଥିତ ଉତ୍କଳ ଗ୍ରାମୀଣ ବ୍ୟାଙ୍କ ରେ ଅଚଳବସ୍ଥା ଲାଗିରହିଛି | ବ୍ୟାଙ୍କ ପରିଚାଳିତ ନିମନ୍ତେ ଉଦ୍ଧିଷ୍ଟ ୟୁ. ପି. ଏସ ଅଚଳ ହୋଇ ପଡ଼ଇଥୁବାରୁ ଦୀର୍ଘ ୧୨ ଦିନ ଧରି ଗ୍ରାହକ ବ୍ୟାଙ୍କ ସେବାରୁ ବଂଚିତ ହୋଇ ରହୁଛନ୍ତି | ତେନ୍ତୁଳିଖୁଣ୍ଟି ସଦର ମହକୁମା ରେ ୧୯୭୭ ମସିହାରୁ ଅବସ୍ଥାପିତ ଏହି ବ୍ୟାଙ୍କ ଗ୍ରାହକଙ୍କୁ ନିରବଛିନ୍ନ ସେବା ଯୋଗେଇ ଆସୁଛି | ହେଲେ ୧୨ ଦିନ ହେଲା କମ୍ପୁଟର ପରିଚାଳନା ନିମନ୍ତେ ଥିବା ୟୁ. ପି. ଏସ ଅଚଳ ହୋଇ ପଡ଼ିଥିବାରୁ ଗ୍ରାହକ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ ହୋଇଛି | ତେନ୍ତୁଳିଖୁଣ୍ଟି, ପୂଜାରୀଗୁଡା, ଦିଗି, ଗ୍ରାମ ପଂଚାୟତ ଅଧୀନରେ ଥୁବା ଅନେକ ଗ୍ରାମର ଗ୍ରାହକ ଏହି ଏକମାତ୍ର ବ୍ୟାଙ୍କ ଉପରେ ନିର୍ଭର କରି କାରବାର କରନ୍ତି | ଏହି ବ୍ୟାଙ୍କ ଉପରେ ୧୨ ହଜାରରୁ ଉର୍ଦ୍ଧ୍ବ ଗ୍ରାହକ ନିର୍ଭର କରୁଛନ୍ତି |
Sambad is now on WhatsApp
Join and get latest news updates delivered to you via WhatsApp
ବର୍ତ୍ତମାନ କେନ୍ଦୁପତ୍ର ତୋଳାଳୀ,ପ୍ରଧାନମନ୍ତ୍ରୀ ଆବାସ ହିତାଧିକାରୀ,କାଳିଆ ଯୋଜନାରେ ଲାଭ ପାଉଥିବା ହିତାଧିକାରୀ,ବିଭିନ୍ନ ଦୋକାନୀ, ସମେତ ହଜାର ହଜାର ଜନସାଧାରଣଙ୍କ ବ୍ୟାଙ୍କର ଅଚଳବସ୍ଥା କାରଣରୁ ସେମାନଙ୍କ କାରବାର ଠପ ହୋଇ ପଡିଛି | ୧୨ ଦିନରୁ ଉର୍ଦ୍ଧ୍ବ ସମୟ ଧରି ୟୁ. ପି. ଏସ ଅଚଳ ହୋଇ ପଡିବା ଏବଂ ହେଡ ଅଫିସ ଏହାର ମରାମତି ଦିଗରେ ତତ୍ପରତା ପ୍ରକାଶ ନକରିବା ଗ୍ରାହକ ଙ୍କ ମହଲରେ ଅସନ୍ତୋଷ ର ଦାନା ବାନ୍ଧିବାରେ ଲାଗିଛି | ବ୍ୟାଙ୍କ ୟୁ. ପି. ଏସ ଅଚଳ ହେବା ବିଷୟ ଅନେକ ଗ୍ରାହକ ଜାଣିନଥୁବା ଯୋଗୁଁ ପ୍ରତ୍ୟେକ ଦିନ ବ୍ୟାଙ୍କକୁ ଆସି ହଇରାଣ ହେଉଥିବା ଦେଖିବାକୁ ମିଳୁଛି | ଅନ୍ୟପଟେ ଏହି ବ୍ୟାଙ୍କ କେବଳ ଦୁଇଜଣ କର୍ମଚାରୀ ଙ୍କୁ ନେଇ ଚାଲୁଛି |
ଜଣେ ବ୍ୟାଙ୍କ ମ୍ୟାନେଜର ଏବଂ ଜଣେ କୋଷାଧକ୍ଷଙ୍କୁ ନେଇ ବ୍ୟାଙ୍କ ପରିଚାଳିତ ହେଉଛି ! ଏହି ବ୍ୟାଙ୍କରେ ଜଣେ କ୍ଷେତ୍ରଧିକାରୀ, ଜଣେ କୋଷାଧକ୍ଷ ଏବଂ ଜଣେ ମେସେଞ୍ଜର ପଦବୀ ଖାଲିପଡିଛି | ବର୍ତ୍ତମାନ ବ୍ୟାଙ୍କ ମ୍ୟାନେଜର କୋଭିଡ ଆକ୍ରାନ୍ତ ହୋଇ ଚିକିତ୍ସା ହେଉଥିବା ସୂଚନା ମିଳିଛି | ଚଳିତ ମାସ ୧୮ ତାରିଖରୁ ୟୁ. ପି. ଏସ ଅଚଳ ହୋଇ ପଡ଼ିଥୁଲା | ଏନେଇ ୧୮ ତାରିଖ ଦିନ ହିଁ ଭବାନୀପାଟଣା ସ୍ଥିତ ଆଞ୍ଚଳିକ କାର୍ଯ୍ୟାଳୟକୁ ଅବଗତ କରାଯାଇଛି ବୋଲି ବ୍ୟାଙ୍କ ମ୍ୟାନେଜର ଅଶ୍ୱିନୀ କୁମାର ଭତରା ପ୍ରକାଶ କରିଛନ୍ତି | ତେବେ ଅବଗତ କରିବା ସତ୍ୱେ ମଧ୍ୟ ଉପରିସ୍ଥ ଅଧିକାରୀ ୟୁ. ପି. ଏସ ମରାମତି କରି ଗ୍ରାହକଙ୍କୁ ସେବା ଯୋଗେଇବାରେ ବିଫଳ ହେବା ଯୋଗୁଁ ଜନ ଅସନ୍ତୋଷ ତେଜିବାରେ ଲାଗିଛି | ଏଣୁ ବ୍ୟାଙ୍କରେ ଲାଗିରହିଥିବା ସମସ୍ୟାକୁ ସମାଧାନ କରି ଗ୍ରାହକଙ୍କୁ ତୁରନ୍ତ ସେବା ଯୋଗେଇବା ନିମନ୍ତେ ନବରଙ୍ଗପୁର ଜିଲ୍ଲା କଂଗ୍ରେସ କମିଟି ସଭାପତି ଅଖିଳ ଭତରା ଦାବି କରିଛନ୍ତି |