ଲାଞ୍ଚ ନେବା ବେଳେ ଧରାପଡିଲେ ସହକାରୀ ଯନ୍ତ୍ରୀ, ୮୦୦୦ ଟଙ୍କା ଜବତ
ନବରଙ୍ଗପୁର: ଉମରକୋଟସ୍ଥିତ ଉଠାଜଳସେଚନ ନିଗମର ସହକାରୀ ଯନ୍ତ୍ରୀ ଭରତ ମଣ୍ଡଳ ଚାଷୀଙ୍କୁ ଗଭୀର ନଳକୂପ ଖନନ ପାଇଁ ୨ ହଜାର ଟଙ୍କା ଲେଖାଏଁ ମାଗି ଶନିବାର ଦୁର୍ନୀତି ନିବାରଣ ବିଭାଗ ଅଧିକାରୀଙ୍କ ହାତରେ ଧରାପଡିଛନ୍ତି। ଅଧିକାରୀଙ୍କ ଠାରୁ ୮୦୦୦ ଟଙ୍କା ଜବତ କରାଯାଇଛି। ରାଇଘର ବ୍ଲକର ଆଦିବାସୀ ମହଣ୍ଡ ଗାଁର ଚାଷୀ ବଳରାମ ଖରା, ରବୀନ୍ଦ୍ର ଗୁଗା, ଦୁର୍ଯ୍ୟେଧନ ଗୁଗା ଓ ସୁନାଧର ପକୁଲ ୨୦୧୭ରେ ତାଙ୍କ ଜମିରେ ଗଭୀର ନଳକୂପ ଖନନ ପାଇଁ ଉମରକୋଟ ସ୍ଥିତ ଉଠାଜଳସେଚନ ନିଗମ କାର୍ଯ୍ୟାଳୟରେ ଆବେଦନ କରିଥିଲେ।
Sambad is now on WhatsApp
Join and get latest news updates delivered to you via WhatsApp
ଏ ପର୍ଯ୍ୟନ୍ତ ସେମାନେ ଆବେଦନ କରି ମଧ୍ୟ ତାଙ୍କ ନଳକୂପ ଖନନ ହୋଇ ନପାରିବାରୁ ଶୁକ୍ରବାର ଏହି ଚାଷୀମାନେ ଉମରକୋଟ ସ୍ଥିତ ସହକାରୀ ଯନ୍ତ୍ରୀଙ୍କ ନିକଟକୁ ଆସିଥିଲେ। ସହକାରୀ ଯନ୍ତ୍ରୀ ଫିଜବଲ୍ ରିପୋର୍ଟ ପ୍ରଦାନ ପାଇଁ ୨ ହଜାର ଟଙ୍କା ଲେଖାଏ ମାଗିଥିବା ନେଇ ଉକ୍ତ ଚାଷୀମାନେ ଦୁର୍ନୀତି ନିବାରରଣ ବିଭାଗ ନିକଟରେ ଅଭିଯୋଗ କରିଥିଲେ।
ଦୁର୍ନୀତି ନିବାରଣ ବିଭାଗର ପୂର୍ବ ପ୍ରସ୍ତୁତି ଅନୁଯାୟୀ ଏହି ଚାଷୀମାନେ ୨ ହଜାର ଟଙ୍କା ଲେଖାଏଁ ଦେବା ବେଳେ ପୂର୍ବରୁ ଛକି ରହିଥିବା ଅଧିକାରୀ ମାନେ ଆସି ଚଢାଉ କରିଥିଲେ। ସହକାରୀ ଯନ୍ତ୍ରୀଙ୍କ ଠାରୁ ରଂଗ ମିଶା ୮ ହଜାର ଟଙ୍କା ଜବତ କରାଯାଇଥିଲା। ଦୂର୍ନୀତି ନିବାରଣ ବିଭାଗ କାର୍ଯ୍ୟାଳୟ ପକ୍ଷରୁ ଉଠାଜଳସେନ ନିଗମ କାର୍ଯ୍ୟାଳୟ ଓ ସହକାରୀ ଯନ୍ତ୍ରୀଙ୍କ ବାସଭବନରେ ବି ଚାଉ କରିଥିବାର ସୂଚନା ମିଳିଛି।