ବୃକ୍ଷରୋପଣକୁ ଗ୍ରାମବାସୀଙ୍କ ବିରୋଧ
ଛେଣ୍ଡିପଦା: ଅନୁଗୁଳ ଜିଲ୍ଲା ଛେଣ୍ଡିପଦା ବ୍ଲକ ରାଇଝରଣ ଅଞ୍ଚଳରେ ନାଲକୋ କମ୍ପାନୀ ଦ୍ୱାରା ଅଧିଗୃହୀତ ଜମିରେ ବନ ବିଭାଗ ପକ୍ଷରୁ ହେଉଥିବା ବୃକ୍ଷରୋପଣକୁ ବିରୋଧ କରି ବନ କର୍ମଚାରୀଙ୍କୁ ଅଟକ ରଖିଲେ ଗ୍ରାମବାସୀ | ସୂଚନାଯୋଗ୍ୟ ୨୦୦୪ରେ ରାଇଝରଣ ଅଞ୍ଚଳର ଉତ୍କଳ-ଡି କୋଲବ୍ଲକକୁ କଳିଙ୍ଗ କୋଲ ମଇନ୍ସ କମ୍ପାନୀ ଓ ଉତ୍କଳ-ଇ କୋଲବ୍ଲକ ନାଲକୋ କମ୍ପାନୀକୁ ଆବଣ୍ଟନ ହୋଇଥିଲା। ୨୦୦୬ ଓ ୨୦୧୦ରେ ଜମି ହରେଇବା ଲୋକଙ୍କୁ କଳିଙ୍ଗ ଓ ନାଲକୋ କମ୍ପାନୀ ପକ୍ଷରୁ ଇଡ଼କୋ ମାଧ୍ୟମରେ ଜମିମୂଲ୍ୟ ଦିଆଯାଇଥିଲା।
Sambad is now on WhatsApp
Join and get latest news updates delivered to you via WhatsApp
୨୦୧୪ରେ ସର୍ବୋଚ୍ଚ ନ୍ୟାୟାଳୟ କୋଲବ୍ଲକ ଆବଣ୍ଟନ ବେଆଇନ ଦର୍ଶେଇ ସମସ୍ତ ଆବଣ୍ଟନ ହୋଇଥିବା କୋଲବ୍ଲକ ବାତିଲ କରିଥିଲେ। ପରବର୍ତ୍ତୀ ସମୟରେ ଗତ ଦୁଇବର୍ଷ ପୂର୍ବରୁ ଉତ୍କଳ-ଡି ଓ ଉତ୍କଳ-ଇ କୋଲବ୍ଲକ ନାଲକୋ କମ୍ପାନୀକୁ ମିଳିଛି। ଦୀର୍ଘଦିନରୁ ବିସ୍ଥାପିତ ଓ କ୍ଷତିଗ୍ରସ୍ତ ଲୋକଙ୍କ ନିଯୁକ୍ତି, ଥଇଥାନ ବ୍ୟବସ୍ଥା ନକରି ଉତ୍କଳ-ଡି ଓ ଉତ୍କଳ-ଇ କୋଲବ୍ଲକ ଅଧିଗୃହିତ ଜମି ସିମାନ୍ତରେ ଫରେଷ୍ଟର ପ୍ରୀତିରେଖା ଦେହୁରୀଙ୍କ ଉପସ୍ଥିତିରେ ସହକର୍ମୀଙ୍କ ଦ୍ୱାରା ବନ ବିଭାଗ ପକ୍ଷରୁ ଆଜି ଚାରାଗଛ ରୋପଣ ଓ ବାଡ଼ ଦିଆଯାଉଥିଲା।
ଏହି ସମୟରେ ଖବରପାଇ ସଭାପତି ତଅଁଳୁ ଗଡ଼ନାୟକ, ସମ୍ପାଦକ ଟୁଟୁ ଗଡ଼ନାୟକ ଓ ବାସୁଦେବ ଗଡନାୟକଙ୍କ ନେତୃତ୍ୱରେ ଶତାଧିକ ଗ୍ରାମବାସୀ ଚାରାରୋପଣକୁ ବିରୋଧ କରି ସମସ୍ତ କର୍ମଚାରୀଙ୍କୁ ଅଟକ ରଖିଥିଲେ। ଖବରପାଇ ରେଞ୍ଜର ପ୍ରତାପ ଚନ୍ଦ୍ର ରାଉଳ ପହଞ୍ଚି ଗ୍ରାମବାସୀଙ୍କ ସହିତ ଆଲୋଚନା କରି ଅଟକ କର୍ମଚାରୀଙ୍କୁ ଉଦ୍ଧାର କରିଥିଲେ।