ମାଲକାନଗିରି: ମାଲକାନଗିରି ଜିଲ୍ଲାରେ ସାତୋଟି ବ୍ଲକ ରହିଛି। ଏହି ସାତୋଟି ବ୍ଲକରେ ୧୫୦୯ ଟି ବୁଥ ରହିଛି।ସେଥିମଧ୍ୟରୁ ୯୪ଟି ଅତି-ସମ୍ବେଦନଶୀଳ, ୫୨୭ଟି ସମ୍ବେଦନଶୀଳ ଏବଂ ୮୮୮ଟି ସମ୍ବେଦନଶୀଳ ନୁହେଁ। ଯଦି ଦେଖିବା ଜିଲ୍ଲାର ଚିତ୍ରକୋଣ୍ଡା ବ୍ଲକର ୧୮ଟି ପଞ୍ଚାୟତରେ ସବୁଠାରୁ ୩୮ଟି ଅତି-ସମ୍ବେଦନଶୀଳ ବୁଥ ରହିଛି। ସେହିପରି କାଲିମେଳା ବ୍ଲକରେ ୧୫ଟି ବୁଥ୍‌ ଅତି ସମ୍ବେଦନଶୀଳ ରହିଛି। ତେବେ ପୁଲିସ ପ୍ରଶାସନର ନିର୍ଦେଶକ୍ରମେ ଜିଲ୍ଲା ପ୍ରଶାସନ କିଛି ଅତି ସମ୍ବେଦନଶୀଳ ବୁଥ୍‌କୁ ସ୍ଥାନାନ୍ତର କରିଛି। ସେଗୁଡିକ ମଧ୍ୟରୁ ମାଥିଲି ବ୍ଲକର ମହୁପଦର ପଞ୍ଚାୟତର ଵାର୍ଡ ନମ୍ବର ୧ର ବୁଥ୍‌ କମ୍ୟୁନିଟି ସେଣ୍ଟର ଦଣ୍ଡିପଦର ଗ୍ରାମରେ ଥିଲା। ଏହି ସ୍ଥାନଟି ନକ୍ସଲ ପ୍ରବଣ ହୋଇଥିବାରୁ ଏହାକୁ ଘୁଞ୍ଚାଇ ଦିଆଯାଇ ଏବେ ସେବାଶ୍ରମ, ମହୁପଦର ଠାରେ କରାଯାଇଛି। ତେବେ ଏହି ବୁଥ୍‌ଟି ଏକ ନମ୍ବର ୱାର୍ଡ଼ ଠାରୁ ବହୁ ଦୁରରେ ଅବସ୍ଥିତ। ସେହିପରି ନକ୍ସଲ ପ୍ରବଣ ଟେମରୁପାଲୀ ପଞ୍ଚାୟତର ଏକ ନମ୍ବର ୱାର୍ଡ଼ ଅଙ୍ଗନବାଡି କେନ୍ଦ୍ର, କେରମିଟି ଠାରୁ ବଦଳି ଏବେ ୟୁଜି ହାଇସ୍କୁଲ, ଟେମରୁପାଲୀ, ୱାର୍ଡ଼ ନମ୍ବର ୨ର ବୁଥ୍‌ ପ୍ରାଥମିକ ସ୍କୁଲ, ତୁଳସୀ ଗ୍ରାମରୁ ଘୁଞ୍ଚି ଏବେ ୟୁଜି ହାଇସ୍କୁଲ ଟେମରୁପାଲୀ କରାଯାଇଛି। ମାଥିଲି ବ୍ଲକର ହିଁ କର୍ତ୍ତନପାଲୀ ପଞ୍ଚାୟତର ୯ ନମ୍ବର ୱାର୍ଡ଼ ପ୍ରାଥମିକ ସ୍କୁଲ, କଟୁଆପଦର ଗ୍ରାମରୁ ସ୍ଥାନାନ୍ତର କରାଯାଇ ଏବେ ପ୍ରାଥମିକ ସ୍କୁଲ ବାରା ଗ୍ରାମକୁ ସ୍ଥାନାନ୍ତର କରାଯାଇଛି। ସେହିପରି ଏହି ପଞ୍ଚାୟତର ୧୨ ନମ୍ବର ୱାର୍ଡ଼ର ବୁଥ୍‌କୁ କେରାଙ୍ଗଯୋବା ଗ୍ରାମରୁ ଘୁଞ୍ଚି ଏବେ ପ୍ରାଥମିକ ସ୍କୁଲ ବାରାକୁ ଅଣାଯାଇଛି।

Advertisment

୩ ନମ୍ବର ୱାର୍ଡ଼ର ବୁଥ୍‌ ଡୁର୍କାଗୁଡା ଗ୍ରାମର ଘୁଞ୍ଚି ଏବେ ୟୁପିଏସ ଲୁଲେରକୁ ସ୍ଥାନାନ୍ତର କରାଯାଇଛି। ମାଥିଲି ବ୍ଲକର ସାଲିମି ପଞ୍ଚାୟତର ୧ ନମ୍ବର ୱାର୍ଡ଼ର ବୁଥ୍‌ କାଦଭଟ୍ଟା ଗ୍ରାମର ଘୁଞ୍ଚି ଏବେ ଅଙ୍ଗନବାଡି କେନ୍ଦ୍ର, କାଙ୍ଗରବେଡା ଗ୍ରାମକୁ ଘୁଞ୍ଚିଛି। କମାରପାଲୀ ପଞ୍ଚାୟତର ୧ ନମ୍ବର ୱାର୍ଡ଼ର ବୁଥ୍‌ ପ୍ରାଥମିକ ସ୍କୁଲ ମେସାଗନ୍ଧିରୁ ଘୁଞ୍ଚି ଏବେ ୟୁପିଏସ ମୁଣ୍ଡାଗୁଡାକୁ ଅଣାଯାଇଛି। ୨ ନମ୍ବର ବୁଥ୍‌ ପ୍ରାଥମିକ ସ୍କୁଲ କମାରପାଲୀରୁ ଜିପି ଅଫିସ ମୁଣ୍ଡାଗୁଡାକୁ ଅଣାଯାଇଛି। ସେହିପରି ଯଦି ଦେଖିବା କାଲିମେଳା ବ୍ଲକର ତିନୋଟି ଜୋନର ଅତି ସମ୍ବେଦନଶୀଳ ୩ଟି ବୁଥ୍‌କୁ ସ୍ଥାନାନ୍ତର କରାଯାଇଛି। ସେଗୁଡିକ ମଧ୍ୟରୁ ମାନ୍ୟମକୋଣ୍ଡ ପଞ୍ଚାୟତର ୭ ନମ୍ବର ୱାର୍ଡ଼ର ବୁଥ୍‌ ପ୍ରାଥମିକ ସ୍କୁଲ ସାଲୁର ଗ୍ରାମରୁ ବଦଳି ଏବେ ପ୍ରାଥମିକ ସ୍କୁଲ ସୁଧାକୋଣ୍ଡାକୁ ଅଣାଯାଇଛି। ୧୫ ନମ୍ବର ୱାର୍ଡ଼ର ବୁଥ୍‌ ସେବାଶ୍ରମ, ପାଲୁରରୁ ବଦଳି ହୋଇ ଏବେ ପ୍ରାଥମିକ ସ୍କୁଲ ଟାଗୋରକୋଟାକୁ ନିଆଯାଇଛି।

ତେଲରାଇ ପଞ୍ଚାୟତର ୧୦ ନମ୍ବର ୱାର୍ଡ଼ର ବୁଥ୍‌ କମଳାପଦର ଗ୍ରାମରୁ ଘୁଞ୍ଚି ଏବେ ପ୍ରାଥମିକ ସ୍କୁଲ ସୁଧାକୋଣ୍ଡାକୁ ଅଣାଯାଇଛି।ଚିତ୍ରକୋଣ୍ଡା ବ୍ଲକର କୁରମାନୁର ପଞ୍ଚାୟତର ୭ଟି ଅତି ସମ୍ବେଦନଶୀଳ ବୁଥ୍‌ ଗୁଡିକକୁ ମଧ୍ୟ ସ୍ଥାନାନ୍ତର କରାଯାଇଛି।ସେଗୁଡିକ ହେଲେ କୁରମାନୁର ପଞ୍ଚାୟତର ୧ ନମ୍ବର ୱାର୍ଡ଼ର ବୁଥ ଦୁଲାଗନ୍ଧିରୁ ସ୍ଥାନାନ୍ତର କରାଯାଇ ସରକାରୀ ହାଇସ୍କୁଲ କୁରମାନୁରକୁ ଅଣାଯାଇଛି। ୨ ନମ୍ବର ୱାର୍ଡ଼ର ବୁଥ ଆରାବତୀ ଗ୍ରାମରୁ ଏବେ ସରକାରୀ ପ୍ରାଥମିକ ହୋଷ୍ଟେଲ, କୁରମାନୁର, ୩ ନମ୍ବର ୱାର୍ଡ଼ର ବୁଥ ପ୍ରାଥମିକ ସ୍କୁଲ ସାରିଗେଡୁରୁ ସ୍ଥାନାନ୍ତର ହୋଇ ସରକାରୀ ପ୍ରାଥମିକ ସ୍କୁଲ, କୁରମାନୁର, ୪ ନମ୍ବର ୱାର୍ଡ଼ର ବୁଥ ଚିଲକାନମୁଣ୍ଡିରୁ ସ୍ଥାନାନ୍ତର ହୋଇ ସରକାରୀ ପ୍ରାଥମିକ ସ୍କୁଲ, କୁରମାନୁର।୫ ନମ୍ବର ୱାର୍ଡ଼ର ବୁଥ୍‌ ଏଲକାନୁର ଗ୍ରାମରୁ ହଟି ଏବେ କୁରମାନୁର, ୬ ନମ୍ବର ୱାର୍ଡ଼ର ବୁଥ୍‌ ବୁସପାକା ଗ୍ରାମରୁ ହଟି ପ୍ରାଥମିକ ସ୍କୁଲ ହୋଷ୍ଟେଲ କୁରମାନୁରକୁ ନିଆଯାଇଛି। ୭ ନମ୍ବର ୱାର୍ଡ଼ର ବୁଥ୍‌ ଗୁରାଲୁର ଗ୍ରାମରୁ ହଟି ଏବେ ପ୍ରାଥମିକ ହୋଷ୍ଟେଲ, କୁରମାନୁର ଏବଂ ୮ ନମ୍ବର ୱାର୍ଡ଼ର ବୁଥ ଆଲୁରକୋଟାରୁ ହଟି ଏବେ କୁରମାନୁରର ପ୍ରାଥମିକ ସ୍କୁଲକୁ ଘୁଞ୍ଚିଯାଇଛି। ତେବେ ଏସବୁ ବୁଥଗୁଡିକ ସ୍ଥାନାନ୍ତର କରାଗଲା ସତ କିନ୍ତୁ ସେହି ୱାର୍ଡ଼ ଠାରୁ ସବୁ ବୁଥ୍‌ ୧୦ କିଲୋମିଟରରୁ ଉର୍ଦ୍ଧ୍ବ ହେବ।

କିଛି କିଛି ବୁଥ୍‌ ୨୫ କିଲୋମିଟରରୁ ମଧ୍ୟ ଉର୍ଦ୍ଧ୍ବ ହେବ। ଯାହାଫଳରେ ଭୋଟର ମାନେ ମତଦାନ କରିବାକୁ ଯିବା ଏକ ପ୍ରକାର କଷ୍ଟସାଧ୍ୟ ସହ ନକ୍ସଲଙ୍କର ଭୟ ମଧ୍ୟ ରହିବ। ଅନ୍ୟପଟେ ନକ୍ସଲ ମାଥିଲି ବ୍ଲକର ଦୁର୍ଗମ ଗ୍ରାମରେ ଏକ ଫତୁଆ ଜାରି କରିଛନ୍ତି। ଗ୍ରାମବାସୀଙ୍କୁ ଭୋଟ ଦେବାକୁ ମନା କରୁନଥିଲେ ମଧ୍ୟ ପୂର୍ବରୁ ଯେଉଁଠି ବୁଥ୍‌ ଥିଲା ସେଠି ହିଁ କରିବାକୁ ଦାବି କରିଛନ୍ତି। ଯଦି ବୁଥ ଘୁଞ୍ଚାଯାଏ ତେବେ କୌଣସି ଗ୍ରାମବାସୀ ଭୋଟ ନଦେବାକୁ ଚେତାବନୀ ଦେଇଥିବା ବିଶେଷ ସୂତ୍ରରୁ ଖବର ମିଳିଛି। ଏବେ ଗ୍ରାମବାସୀ ଫସିଯାଇଥିବା ଦେଖିବାକୁ ମିଳିଛି। ସେମାନେ ଅନ୍ୟତ୍ର ବୁଥ୍‌ ବଦଳିଥିବାରୁ ସେଠାକୁ ଯାଇ ଭୋଟ ଦେବେ ନା ନାହିଁ ଚନ୍ତାରେ ପଡିଛନ୍ତି।ବିଶେଷକରି ମାଥିଲି ବ୍ଲକରେ ନକ୍ସଲଙ୍କ ହୁଇପ ଜାରି ହୋଇଛି। ତେବେ ଏନେଇ ପ୍ରଶାସନ କି ପଦକ୍ଷେପ ନେଉଛି ଦେଖିବାକୁ ବାକି ରହିଲା।