ସ୍କୁଲ ଭିତରେ ସହପାଠୀକୁ ଛୁରି ଭୁସିଲେ ଛାତ୍ର, ଜଣେ ଗୁରୁତର
ଭଞ୍ଜନଗର : କଥାରେ ଅଛି ଖେଳ ବେଳେ ବେଳେ କାଳର କାରଣ ହୁଏ। ଥଟ୍ଟାମଜାକୁ ନେଇ ଗଞ୍ଜାମ ଜିଲ୍ଲା ଭଞ୍ଜନଗରରେ ଜଣେ ଛାତ୍ର ନିଜ ସହପାଠୀକୁ ଛୁରି ଭୁସିଦେଇଛି । ଫଳରେ ସହପାଠୀଜଣକ ଗୁରୁତର ଆହତ ହୋଇ ବ୍ରହ୍ମପୁର ବଡ଼ ମେଡିକାଲରେ ଚିକିତ୍ସିତ ହେଉଛି । ଘଟଣାଟି ଘଟିଛି ଗାଙ୍ଗପୁର ଥାନା ଅଂଚଳର ବଡ଼ ବୋରସିଙ୍ଗ ଆଞ୍ଚଳିକ ସ୍କୁଲରେ।
Sambad is now on WhatsApp
Join and get latest news updates delivered to you via WhatsApp
ଆଜି ସକାଳେ ସ୍କୁଲର ପ୍ରାର୍ଥନା ପରେ ପିଲାମାନେ ନିଜ ନିଜ ଶ୍ରେଣୀ କକ୍ଷକୁ ଯାଇଥିଲେ । ତେବେ ପରସ୍ପର ସହିତ ଟାହିଟାପରାକୁ ନେଇ ଦଶମ ଶ୍ରେଣୀର ଦୁଇ ଛାତ୍ରଙ୍କ ମଧ୍ୟରେ ବିବାଦ ସୃଷ୍ଟି ହୋଇଥିଲା । ପରେ ଜଣେ ଛାତ୍ର ଉତକ୍ଷିପ୍ତ ହୋଇ ଅନ୍ୟଜଣକୁ ଛୁରି ଭୁସିଦେଇଥିଲା । ଏଥିରେ ଉକ୍ତ ଛାତ୍ରଜଣକ ଗୁରୁତର ଆହତ ହୋଇଯାଇଥିଲା ।
ଏହି ଖବର ପାଇବା ପରେ ସ୍କୁଲର ସହକାରୀ ଶିକ୍ଷକ ସନ୍ୟାସୀ ସାହୁଙ୍କ ସହାୟତାରେ ଆହତ ଛାତ୍ରକୁ ଏକ ଅଟୋ ସାହାଯ୍ୟରେ ଭଞ୍ଜନଗର ମେଡ଼ିକାଲରେ ଭର୍ତ୍ତି କରାଯାଇଥିଲା । ସେଠାରେ ପ୍ରାଥମିକ ଚିକିତ୍ସା ପରେ ତାର ଅବସ୍ଥା ଗୁରୁତର ହେବାରୁ ବ୍ରହ୍ମପୁର ଡାକ୍ତରଖାନାକୁ ସ୍ଥାନାନ୍ତର କରାଯାଇଛି । ଗାଙ୍ଗପୁର ପୁଲିସ ଅନ୍ୟ ଛାତ୍ର ଜଣକୁ ଅଟକ ରଖି ପଚରାଉଚୁରା କରୁଛି ।