ରାୟଗଡା: ରାୟଗଡ଼ ଜିଲ୍ଲାର ଦୁର୍ଗମ ଅଞ୍ଚଳରେ ଗ୍ରୀଷ୍ଣ ଋତୁରେ ଲୋକେ କିପରି ପାଣି ପାଇଁ ଡହଳ ବିକଳ ହେଉଛନ୍ତି ତାହା ନଦେଖିଲେ ବିଶ୍ବାସ କରିହେବ ନାହିଁ। ଦୁର୍ଗମ ଗ୍ରାମ ଗୁଡିକକୁ ରାସ୍ତା ନଥିବା ବେଳେ ପାଣି ପାଇଁ ପଚାରେ କିଏ।ଏଭଳି ଏକ ପାହାଡ ଉପର ଗ୍ରାମ ହେଉଛି କାଶୀପୁର ବ୍ଲକର ସିଡିପାଇ ପଞ୍ଚାୟତର ବାସଙ୍ଗମାଳି। ଦିନେ ଏହି ଗ୍ରାମଟି ନକ୍ସଲଙ୍କ କବଜାରେ ଥିଲା। ପାହାଡ ଉପର ଗ୍ରାମ ହୋଇଥିବା ବେଳେ ନକ୍ସଲ ଅତି ସ୍ବଚ୍ଛନ୍ଦରେ ଏଠାରେ ରହି ନିଜର ଗତିବିଧି ଚଳାଉଥିଲେ। ଏବେ କିନ୍ତୁ ସବୁ ବଦଳି ଯାଇଥିଲେ ମଧ୍ୟ ଲୋକେ ମୌଳିକ ସୁବିଧାରୁ ଏବେ ବି ବଞ୍ଚିତ ରହିଛନ୍ତି। ଆଜି ବି ଏହି ଗ୍ରାମରେ ପାଣିର କୌଣସି ଉତ୍ସ ନାହିଁ। ପିଇବା ପାଣି ପାଇଁ ଲୋକଙ୍କୁ ୩ କିଲୋମିଟର ଯିବାକୁ
ପଡୁଛି। ବାସଙ୍ଗମାଳି ଗ୍ରାମରେ ପ୍ରାୟ ୭୦ ଘର ରହିଥିବା ବେଳେ ପ୍ରାୟ ୪୦୦ ଲୋକ ବସବାସ କରନ୍ତି। ଏହି ଗ୍ରାମଟି କାଶୀପୁର ବ୍ଲକ ଠାରୁ ମାତ୍ର ୧୫ କିଲୋମିଟର ଦୁରରେ ଅବସ୍ଥିତ। ଏହି ଗ୍ରାମ ନିକଟରେ ଖଣି ଭୋରପୁର ହୋଇ ରହିଥିବା ବେଳେ ଓଏମଜି ତରଫରୁ ଏଠାରେ ଖଣି ଖନନ ପାଇଁ ପ୍ରସ୍ତୁତି ଏକ ପ୍ରକାର ଆରମ୍ଭ ହୋଇଛି। ବର୍ତ୍ତମାନ କାଗଜ କଲମରେ ସମସ୍ତ କାର୍ଯ୍ୟ ଚାଲିଥିବା ବେଳେ ଓଏମଜି ତରଫରୁ ଗ୍ରାମବାସୀଙ୍କ ପାଇଁ ପ୍ରତିଦିନ ଏକ ପାଣି ଟାଙ୍କି ପଠା ଯାଇଥାଏ। ପ୍ରତିଦିନ ଅପରାହ୍ନ ୪ଟା ବେଳେ ପାଣି ଟାଙ୍କି ଗ୍ରାମକୁ ଆସିଥାଏ। ପାଣି ଟାଙ୍କି ଆସିବା ପୂର୍ବରୁ ଗ୍ରାମର ମହିଳା ମାନେ ନିଜ ନିଜ ଗୋରା, ବାଲଟି ଇତ୍ୟାଦି ଧରି ଅପେକ୍ଷା କରି ରହିଥାନ୍ତି। ପାଣି ନେବା ପାଇଁ ଗାଡି ଉପରୁ ତଳକୁ ସବୁଆଡେ ଖୋଲା କରି ଦିଆଯାଇଥାଏ। ଶତାଧିକ ମହିଳାଙ୍କ ମଧ୍ୟରେ ପାଣି ପାଇଁ ପ୍ରତିଯୋଗିତା ଚାଲେ। ଯିଏ ଆଗରେ ଆସେ ସେ ପାଣି ପାଏ। ଆଉ ଯିଏ ପଛରେ ପଡେ, ସେ ଆଦୌ ପାଣି ପାଇପାରେ ନାହିଁ।ପାଣି ନେବା ପାଇଁ ଠେଲାପେଲାରେ ଜଣେ ବୃଦ୍ଧା ପାଣି ପାଇ ପାରିନଥିବା ଦେଖିବାକୁ ମିଳିଥିଲା। ଗୋଟିଏ ଛୋଟିଆ ହଣ୍ଡା ଧରି ପାଣି ପାଇଁ ଟାଙ୍କି ନିକଟରେ ଦୀର୍ଘ ସମୟ ଧରି ଛିଡା ହେବା ପରେ ମଧ୍ୟ ତାଙ୍କୁ ପାଣି ମିଳିନଥିଲା।

Advertisment

publive-image Sambad

ଶେଷରେ ସେ ଖାଲି ହାତରେ ଘରକୁ ଫେରିଥିଲେ। ଏହା ଗୋଟିଏ ଦିନର କାହାଣୀ ନୁହେଁ ପ୍ରାୟତଃ ପ୍ରତିଦିନ ଏଭଳି ଦୃଶ୍ୟ ଦେଖିବାକୁ ମିଳେ। ଗାଁରେ ଲୋକେ ଏହାକୁ ପିଇବା ପାଇଁ ବ୍ୟବହାର କରୁଥିବା ବେଳେ ଅନ୍ୟ କାମ ପାଇଁ ଦୀର୍ଘ ବାଟ ଚାଲି ନଦୀରେ ଗାଧୋଇବା ସହ ଅନ୍ୟ କାମ କରନ୍ତି। ଏହି ଗ୍ରାମର ରାମ ମାଝି ପ୍ରଶ୍ନ କରିଥିଲେ ଯେ ଜିଲ୍ଲାକୁ ୟେତିକି ଡିଏମଏଫ ଫଣ୍ଡ ମିଳିଛି ସେଥିରୁ ୬୦ ପ୍ରତିଶତ କାଶୀପୁର ଅଞ୍ଚଳର। ତେବେ ଏହି ବ୍ଲକର ୨୪ଟି ପଞ୍ଚାୟତରେ ପାଣିର ଘୋର ଅଭାବ ରହିଥିବା ବେଳେ ସେହି ଟଙ୍କା ପାନୀୟ ଜଳ ପାଇଁ କାହିଁକି ଖର୍ଚ୍ଚ କରାଯାଉ ନାହିଁ।ଏହି ଗାଁର ତଳେ କୋଟି କୋଟି ଟଙ୍କାର ଖଣି ରହିଛି। ଏପରିକି ଏହା ଗାଁ ଲୋକେ କୋଟି କୋଟି ଟଙ୍କାର ଖଣି ମାଲିକ କହିଲେ ଅତ୍ୟୁକ୍ତି ହେବ ନାହିଁ। କିନ୍ତୁ ସେମାନେ ଆଜି ମୁନ୍ଦାଏ ପାଣି ପାଇଁ ନିଜ ନିଜ ମଧ୍ୟରେ ଲଢେଇ କରୁଛନ୍ତି। ଏହି ଗ୍ରାମରେ ନଳକୂପ ଖୋଲିବା ଏକ ପ୍ରକାର ଅସମ୍ଭବ ଯୋଗୁ ଲୋକେ ପାଣି ପାଇ ପାରୁନଥିବା ଜଣାପଡିଛି। ପାହାଡ ଉପେର ଗାଁ ରହିଥିବାରୁ ନଳକୂପ ଖୋଳିବାକୁ ବହୁତ କଷ୍ଟ ସ୍ବୀକାର କରିବାକୁ ପଡିବ ବୋଲି କୁହାଯାଇଛି। ତେବେ ଏହି ଗ୍ରାମର ଲୋକେ ପ୍ରତିଦିନ ଦୁଇ ବୁନ୍ଦା ପାଣି ପାଇବେ, ଏହାର ସୁବିଧା କେବେ ଉଠାଇବେ ତାହା ଦେଖିବାକୁ ବାକି ରହିଲା।