ଖୋର୍ଦ୍ଧା: ଲକ୍ଡାଉନ୍ କଟକଣା ବି ରୋକି ପାରୁନି ବେଆଇନ ମଦ କାରବାର
ମଦ ବିକ୍ରି ଚାଲୁ କରି ସରକାର ସଂକଟକୁ ନବଢ଼ାନ୍ତୁ: ବୁଦ୍ଧିଜୀବୀ
ଖୋର୍ଦ୍ଧା: ଖୋର୍ଦ୍ଧା ଜିଲ୍ଲାରେ ପ୍ରତି ୧୦୦ଜଣରେ ୪୪ଜଣ ଦେଶୀ କିମ୍ବା ବିଦେଶୀ ମଦ ପିଉଛନ୍ତି ଏହିଥିଲା ୨୦୧୭ର ଜାତୀୟ ପରିବାର ସ୍ୱାସ୍ଥ୍ୟ ସମ୍ପର୍କିତ ସର୍ଭେ ରିପୋର୍ଟର ତଥ୍ୟ । ୨୦୧୮-୧୯ରେ ରାଜ୍ୟ ଅବକାରୀ ବିଭାଗର ତଥ୍ୟାନୁସାରେ ୨ ବର୍ଷ ମଧ୍ୟରେ ଜିଲ୍ଲାରେ ବେଆଇନ ମଦ କାରବାର ବୃଦ୍ଧି ପାଇବା ସହ ବିଦେଶୀ ମଦ ବିକ୍ରି ସଂଖ୍ୟା ମଧ୍ୟ ଆଶାତୀତ ବୃଦ୍ଧି ପାଇଛି । ଏଭଳି ସ୍ଥିତିରେ ଲକ୍ଡାଉନ୍ ସମୟରେ ଜିଲ୍ଲାରେ ମଦ ବିକ୍ରିକୁ ଅନୁମତି ଅନେକ ସମସ୍ୟାକୁ ସୃଷ୍ଟି କରିବା ସମ୍ଭାବନା ରହିଛି ।
Sambad is now on WhatsApp
Join and get latest news updates delivered to you via WhatsApp
୨୦୧୭ରେ ଜାତୀୟ ପରିବାର ସ୍ୱାସ୍ଥ୍ୟ ସର୍ଭେ ରିପୋର୍ଟ ଅନୁସାରେ, ଖୋର୍ଦ୍ଧା ଜିଲ୍ଲାରେ ମୋଟ ଜନସଂଖ୍ୟା ମଧ୍ୟରୁ ୪୪ ପ୍ରତିଶତ ଲୋକ ଦେଶୀ କିମ୍ବା ବିଦେଶୀ ମଦ ପିଉଛନ୍ତି । ସେମାନଙ୍କ ମଧ୍ୟରେ ପୁରୁଷଙ୍କ ସଂଖ୍ୟା ୪୧.୬ ପ୍ରତିଶତ ଥିବା ବେଳେ ମହିଳାଙ୍କ ସଂଖ୍ୟା ୨.୪ ପ୍ରତିଶତ ରହିଛି । ତେବେ ୨୦୧୯ ନଭେମ୍ବରରେ ଅବକାରୀ ବିଭାଗ ଦ୍ୱାରା ବିଧାନସଭାରେ ଦିଆଯାଇଥିବା ତଥ୍ୟାନୁସାରେ, ରାଜ୍ୟରେ ବିଅର, ୱାଇନ୍ ଆଦି ବିକ୍ରି ତାଲିକାରେ ଖୋର୍ଦ୍ଧା ଜିଲ୍ଲା ସର୍ବପ୍ରଥମ ରହିଥିବା ବେଳେ ଗଂଜାମ ଜିଲ୍ଲା ଏହା ପଛକୁ ରହିଛି ।
ଖୋର୍ଦ୍ଧା ଜିଲ୍ଲାରେ ୨୦୧୮-୧୯ରେ ସମୁଦାୟ ୭୮ଟି ବିଦେଶୀ ମଦ (ଅଫ୍) ଦୋକାନ ରହିଥିବା ବେଳେ ୨୬ଟି ଦେଶୀ ମଦ ଦୋକାନ ରହିଥିଲା । ତେବେ ୨୦୧୯-୨୦ ତଥ୍ୟାନୁସାରେ ଏହା ମଧ୍ୟରୁ ଗୋଟିଏ ସରକାରୀ ଜମିରେ ଦୋକାନ କରିଥିବା ହେତୁ ଲାଇସେନ୍ସ ରଦ୍ଦ କରାଯାଇଥିବା ବେଳେ ୪ଟି ଦୋକାନର ଲାଇସେନ୍ସ ନବୀକରଣ ହୋଇନଥିବାରୁ ବନ୍ଦ ରହିଛି । ସେହିଭଳି ୧୧ଟି ଦୋକାନକୁ ସ୍ଥାନୀୟ ଲୋକଙ୍କ ଅଭିଯୋଗ ଭିତ୍ତିରେ ସ୍ଥାନାନ୍ତର କରାଯାଇଛି । ଏହା ସତ୍ୱେ ଜିଲ୍ଲାରେ ୯୯ଟି ଦେଶୀ ଓ ବିଦେଶୀ ମଦ ଦୋକାନ ରହିଛି ।
ତେବେ ଲକ୍ଡାଉନ୍ରେ ଲୋକଙ୍କ ଗମନାଗମନ ଓ ଭିଡ଼ ଉପରେ କଟକଣା କିଛି ମାତ୍ରାରେ ସଫଳ ହୋଇଥିବା ବେଳେ ବେଆଇନ ମଦ ଓ ନିଶା କାରବାରକୁ ସଂପୂର୍ଣ୍ଣ ରୂପେ ବନ୍ଦ କରାଯାଇପାରିନାହିଁ । ମାର୍ଚ୍ଚ ୨୨ ତାରିଖରୁ ଅପ୍ରିଲ୍ ୨୬ ତାରିଖ ମଧ୍ୟରେ ଜିଲ୍ଲାରେ ପୁଲିସ୍ ବିଭାଗ ପକ୍ଷରୁ ଚଢ଼ଉ କରାଯାଇ ୪୧ରୁ ଉର୍ଦ୍ଧ୍ୱ ଅବକାରୀ ମାମଲାରେ ୨୩ଜଣଙ୍କୁ ଗିରଫ କରିବା ସହ ପ୍ରାୟ ୭୦୦ ଲିଟର ଦେଶୀ ଓ ବିଦେଶୀ ମଦ ଜବତ କରାଯାଇଥିଲା । ଗତ ସପ୍ତାହରେ ଖୋର୍ଦ୍ଧା ଉପକଣ୍ଠ ତୋଟାପଡ଼ା ଛକ ନିକଟରେ ଥିବା ଏକ ଗୋଦାମରୁ ୩୨୦୦ ପେଟି ବିୟର ଓ ୱାଇନ୍କୁ ମାଜିଷ୍ଟ୍ରେଟ୍ଙ୍କ ଉପସ୍ଥିତିରେ ଜବତ କରାଯାଇଥିଲା ।
ତେବ ଅବକାରୀ ବିଭାଗ ପକ୍ଷରୁ ଲକ୍ଡାଉନ୍ ସମୟରେ ବେଆଇନ ମଦ କାରବାର ରୋକିବାରେ ଆବଶ୍ୟକ ଆଗ୍ରହ ପରିଲକ୍ଷିତ ହୋଇନଥିଲେ ମଧ୍ୟ ଧର୍ମକୁ ଆଖିଠାର ଭଳି ଗତ ୪୦ ଦିନ ମଧ୍ୟରେ ୧୨ଟି ମାମଲାରେ ଶତାଧିକ କିଲୋ ଗଂଜେଇ ଜବତ କରାଯାଇଥିବା ବେଳେ ଓ ବେଆଇନ ଦେଶୀମଦ କାରବାର କରୁଥିବା ଘଟଣାରେ ୭ଜଣଙ୍କୁ ଗିରଫ କରାଯାଇଛି ।
ଏନେଇ ଖୋର୍ଦ୍ଧା ବ୍ୟବସାୟୀ ସଂଘର ଉପସଭାପତି ମଦନମୋହନ ରାମ କହିଛନ୍ତି ଯେ ଏଭଳି ସ୍ୱାସ୍ଥ୍ୟ ସଂକଟ ସମୟରେ ମଦ ଦୋକାନ ଖୋଲିବା କଥାନୁହେଁ । ଏହାଦ୍ୱାରା ସରକାରଙ୍କୁ ରାଜସ୍ୱ ମିଳିବ କିନ୍ତୁ ଅନେକ ପରିବାର ତଳିତଳାନ୍ତ ହୋଇଯିବେ । ସେହିଭଳି ଚାମ୍ବର ଅଫ୍ କମର୍ସର ପୂର୍ବତନ ସମ୍ପାଦକ ତଥା ବଜାର କମଟିର ବରିଷ୍ଠ ସଭ୍ୟ କ୍ଷୀରୋଦ ସାହୁ କହିଛନ୍ତି ଯେ ମଦ ଦୋକାନ ଖୋଲିବା ଉଚିତ ନୁହେଁ । ଏହାଦ୍ୱାରା ସଂକଟ ଆହୁରି ବୃଦ୍ଧି ପାଇବ । ଏଭଳି ଦୀର୍ଘ ଦିନ ବନ୍ଦ ରହିବା ଦ୍ୱାରା ଅନେକ ନିଶାଶକ୍ତ ସୁଧୁରି ଯିବେ ଓ ଅନେକ ପରିବାର ବଂଚିଯିବ । ଖୋର୍ଦ୍ଧା ବିକଶ ପରିଷଦ ଆବାହକ ଶକ୍ତି ମିଶ୍ର କହିଛନ୍ତି ଯେ ସରକାର ମଦ ବନ୍ଦ କରିବାକୁ ନିଷ୍ପତ୍ତି ନେଇଥିଲେ କିନ୍ତୁ ଚୋରା ମଦକୁ ପ୍ରୋତ୍ସାହନ ଦେଉଥିଲେ । ଏଣୁ ଆଇନତଃ କିମ୍ବା ବେଆଇନରେ ମଦ ବିକ୍ରିକୁ ସଂପୂର୍ଣ୍ଣ ବନ୍ଦ କରନ୍ତୁ ।