ଜୟପୁର: ସପ୍ତମ ଆନ୍ତର୍ଜାତିକ ଯୋଗ ଦିବସ ପାଳନର ଅବ୍ୟବହିତ ପୂର୍ବରୁ ସରକାରୀ ମହିଳା ମହାବିଦ୍ୟାଳୟର ଜାତୀୟ ସେବା ଯୋଜନା ( ଏନ୍ ଏସ୍ ଏସ୍) ଆନୁକୁଲ୍ୟରେ ଏକ ଯୋଗ କର୍ମଶାଳା ଭାରଚୁଆଲରେ ଅନୁଷ୍ଠିତ ହୋଇଛି। ଅଧ୍ୟକ୍ଷା ଡ଼ ମନୋରମା ଦେବୀଙ୍କ ପ୍ରୋତ୍ସାହନରେ ଆୟୋଜିତ ଏହି କର୍ମଶାଳାରେ ଜିଲ୍ଲା କାର୍ଯ୍ୟକ୍ରମ ଅଧିକାରୀ (ଏନ୍ଏସ୍ଏସ୍) କିଶୋର ଚନ୍ଦ୍ର ବେହେରା ମୁଖ୍ୟ ଅତିଥି ଓ ପତଞ୍ଜଳି ଯୋଗ ଶାଖାର ପ୍ରଶିକ୍ଷିକା ଜାନକୀ ପାଣିଗ୍ରାହୀ ମୁଖ୍ୟ ବକ୍ତା ତଥା ପ୍ରଶିକ୍ଷିକା ଭାବେ ଯୋଗ ଦେଇଥିଲେ।
Sambad is now on WhatsApp
Join and get latest news updates delivered to you via WhatsApp
କାର୍ଯ୍ୟକ୍ରମ ପ୍ରାରମ୍ଭରେ କର୍ମଶାଳାର ଆବାହକ ତଥା ଏନ୍ ଏସ୍ ଏସ୍ କାର୍ଯ୍ୟକ୍ରମ ଅଧିକାରୀ ଡ଼ ମନୋରଞ୍ଜନ ପ୍ରଧାନ ସ୍ବାଗତ ଭାଷଣ ଓ ଅତିଥି ପରିଚୟ କରିଥିବା ବେଳେ ଶ୍ରୀବେହେରା ଯୋଗର ପ୍ରାସଙ୍ଗିକତା ସମ୍ପର୍କରେ ମତବ୍ୟକ୍ତ କରିଥିଲେ। ପ୍ରଶିକ୍ଷିକା ଶ୍ରୀମତୀ ପାଣିଗ୍ରାହୀ ଯୋଗ ସାଧନା ଦ୍ବାରା ଶରୀର ସୁସ୍ଥ, ମନ ଶାନ୍ତ ରହିବା ସହ ବ୍ୟକ୍ତି ନିରୋଗୀ ଓ ନିର୍ଭୀକ ହୋଇଥାଏ ବୋଲି କହିଥିଲେ। ଯୋଗ ଏକ ନିତ୍ୟ ସାଧନା ଏବଂ ଏହା ଦୈନନ୍ଦିନ ଜୀବନରେ ଅବିଚ୍ଛେଦ୍ୟ ଅଙ୍ଗ ହେବା ଗ୍ରହଣ କରିବା ଉଚିତ ବୋଲି କହିବା ସହ ଉପସ୍ଥିତ ପ୍ରଶିକ୍ଷାର୍ଥୀଙ୍କୁ ଆସନ, ମୁଦ୍ରା ଓ ପ୍ରାଣାୟାମ ସମ୍ପର୍କରେ ପ୍ରଶିକ୍ଷଣ ଦେଇଥିଲେ।
ପ୍ରଥମେ ଗ୍ରୀବା, ହସ୍ତ, ପାଦ, ସ୍କନ୍ଦ ଓ ଚକ୍ଷୁ ସଞ୍ଚାଳନ ସମ୍ବନ୍ଧରେ ଶିଖେଇବା ସହ ସୂର୍ଯ୍ୟ ନମସ୍କାର, ବଜ୍ରାସନ, ଶଶାକାସନ, ଅର୍ଦ୍ଧ ଚକ୍ରାସନ, ଉତ୍ଥାନ ମଣ୍ଡୁକାସନ, ଆଦି ଆସନ ଓ ଭସ୍ତ୍ରୀକା, କପାଳଭାତି, ଅନଲୋମ ବିଲୋମ ଓ ଭ୍ରାମରୀ ପ୍ରାଣାୟମ ସମ୍ପର୍କରେ ପ୍ରଶିକ୍ଷଣ ଦେଇଥିଲେ। ଶେଷରେ ଏକ ପ୍ରଶ୍ନୋତ୍ତର କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ଯାହା ଦ୍ଵାରା ପ୍ରତିଭାଗୀମାନେ ନିଜ ପ୍ରଶ୍ନ ମାଧ୍ୟମରେ ଶ୍ରୀମତୀ ପାଣିଗ୍ରାହୀ ଙ୍କ ଠାରୁ ସମସ୍ତ ସନ୍ଦେହ ମୋଚନ କରିଥିଲେ। କର୍ମଶାଳାରେ ପଚାଶରୁ ଉର୍ଦ୍ଧ୍ବ ସ୍ଵେଚ୍ଛାସେବୀ, ଅଧ୍ୟାପକ ଓ ଅଧ୍ୟାପିକା ଅଂଶ ଗ୍ରହଣ କରିଥିଲେ। ଶେଷରେ କଲେଜର ଅନ୍ୟତମ ଏନ୍ଏସ୍ଏସ୍ କାର୍ଯ୍ୟକ୍ରମ ଅଧିକାରୀ ଡ଼ ସିଦ୍ଧାନନ୍ଦ ପ୍ରଧାନ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ।