ଯୁବ ଇଞ୍ଜିନିୟରିଂ ଛାତ୍ରଙ୍କ କରୋନାରେ ପରଲୋକ, ବୀରମହାରାଜପୁରରେ ଶୋକର ଛାୟା
ବୀରମହାରାଜପୁର: ଚାରି ଦିନ ଭିତରେ ସୁବର୍ଣ୍ଣପୁର ସହରରେ ଜଣଙ୍କ ଓ ବୀରମହାରାଜପୁରରେ ଜଣେ ଅବସରପ୍ରାପ୍ତ ଶିକ୍ଷକ କରୋନାରେ ଆକ୍ରାନ୍ତ ହୋଇ ମୃତ୍ୟୁ ଖବର ଲୋକଙ୍କ ମନରୁ ଦୁଃଖ ଯାଇ ନ ଥିବା ବେଳେ ଗତ କାଲି ବୀରମହାରାଜପୁର ଚମ୍ପlମାଲ ଗାଁର ୨୦ ବର୍ଷର ଇଞ୍ଜିନିୟରିଂ ଛାତ୍ର ପ୍ରୀତମ ମହାରଣାଙ୍କ ବୁର୍ଲା କୋଭିଡ ମେଡିକାଲରେ କୋରାନା ମୃତ୍ୟୁ ଖବର ଏ ଅଂଚଳ ତଥା ଜ଼ିଲ୍ଲାବାସୀଙ୍କୁ ଚକିତ କରିଛି ।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁସାରେ ଚମ୍ପାମଳ ଗ୍ରାମର ନରେନ୍ଦ୍ର ମହାରଣାଙ୍କ ପୁତ୍ର ପ୍ରୀତମ ମହାରଣା ଖୋର୍ଦ୍ଧାର ଏକ ଘରୋଇ ଇଞ୍ଜିନିୟରିଂ କଲେଜ ଛାତ୍ର । ସେଠାରୁ ବୀରମହାରାଜପୁର ଆସିବାପରେ ୨୬ ତାରିଖ ଦିନ ତାଙ୍କୁ ଜ୍ବର ସୋଇଥିଲା । ଚିକିତ୍ସା ପାଇଁ ତାଙ୍କୁ ତୁରନ୍ତ ବୀରମହାରାଜପୁର ଡାକ୍ତରଖାନା ନିଆଯାଇଥିଲା । ସେଠାରୁ ତାଙ୍କୁ ସୁବର୍ଣ୍ଣପୁର ଜିଲ୍ଲା ସଦରମହକୁମା ପଠାଇଥିଲେ ଡାକ୍ତର । କିନ୍ତୁ ସୁବର୍ଣ୍ଣପୁରର ଜିଲ୍ଲା ଡାକ୍ତରଖାନାରେ ପ୍ରୀତମଙ୍କ ଅକସିଜେନ୍ ସ୍ତର କମିବା ସହିତ ପଲସ୍ ରେପ୍ ମଧ୍ୟ କମିବାରୁ ଡାକ୍ତର ତାଙ୍କୁ ତୁରନ୍ତ ବୁର୍ଲା ବଡ଼ ମେଡିକାଲକୁ ସ୍ଥାନାନ୍ତରିତ କରିଥିଲେ । ସେଠାରେ ତାଙ୍କର ଚିକିତ୍ସା ଚାଲିଥୀବା ଅବସ୍ଥାରେ ମଙ୍ଗଳ ବାର ଦିନ ମୃତ୍ୟୁ ଘଟିଥିଲା ।
ଏଘଟଣାଟି ବୀରମହାରାଜପୁର ଜଣା ପଡ଼ିବା ପରେ ଅଞ୍ଚଳରେ ଶୋକର ଛାୟା ଖେଳିଯାଇଛି । ସ୍ଵର୍ଗତ ପ୍ରୀତମ ମହାରଣା ଜଣେ ମେଧାବୀ ଛାତ୍ର ଓ ମେଳାପି ପିଲା ହୋଇଥିବାରୁ ତାଙ୍କ ସାଙ୍ଗ ସାଥି ମହଲରେ ମଧ୍ୟ ଶୋକରେ ଛାୟା ଖେଳିଯାଇଛି । ପ୍ରୀତମ ତାଙ୍କ ପଛରେ ତାଙ୍କର ପିତା ନରେନ୍ଦ୍ର ମହାରଣା, ମାଁ ମନୋରମା ଓ ତାଙ୍କର ଇଞ୍ଜିନିୟରିଂ ଛାତ୍ରୀ ଭଉଣୀ ଓ ପରିବାର ବର୍ଗଙ୍କୁ ପଛରେ ଛାଡ଼ି ଯାଇଛନ୍ତି ।