ପୋଖରୀକୁ ଫୁଲ ତୋଳିବାକୁ ଯାଇ ପାଣିରେ ବୁଡି ଯୁବକ ମୃତ
ପାଇକମାଳ: ବରଗଡ଼ ଜିଲ୍ଲା ପାଇକମାଳ ବ୍ଲକ ଛେତେଙ୍ଗା ପଞ୍ଚାୟତ ବ୍ରାହ୍ମଣଢିହି ଗ୍ରାମର ଏକ ପୋଖରୀରୁ ଜଣକର ମୃତଦେହ ପାଇକମାଳ ପୁଲିସ ଓ ଅଗ୍ନିଶମ ବିଭାଗର କର୍ମଚାରୀ ମାନଙ୍କର ସହାୟତା ରେ ଉଦ୍ଧାର କରିଛି । ମୃତକ ଜଣକ ହେଲେ ସେହି ଗ୍ରାମର ବିଶ୍ଵାମିତ୍ର ଭୋଇ (୫୨) । ମିଳିଥିବା ସୂଚନା ଅନୁସାରେ ବିଶ୍ଵାମିତ୍ର ଗତକାଲି ଦିନ ସକାଳୁ ଗାଁ ପୋଖରୀକୁ ଫୁଲ ତୋଳିବା ପାଇଁ ଯାଇଥିଲେ । ଫୁଲ ତୋଳିବା ସମୟରେ ତାଙ୍କର ଗୋଡ଼ ଖସିଯିବାରୁ ସେ ଗଭୀର ପାଣି ଭିତରକୁ ପଶି ଜୀବା ସହିତ କଇଁ ଫୁଲ ଗଛରେ ଛନ୍ଦି ହୋଇବାରୁ ପାଣିରେ ବୁଡି ଯାଇଥିବା ଅନୁମାନ କରାଯାଉଛି ।
Sambad is now on WhatsApp
Join and get latest news updates delivered to you via WhatsApp
ଏହା ସହିତ ଗତ କିଛିଦିନ ହେଲା ମୃତକଙ୍କର ଦେହ ମଧ୍ୟ ଅସୁସ୍ଥ ଥିବାର ଜଣାପଡ଼ିଛି। ଏହା ସହିତ ତାଙ୍କୁ ଫିଟସ ମଧ୍ୟ ଥିବାର ଜଣାପଡ଼ିଛି । ମୃତକ ଙ୍କର ଘର ଲୋକେ ଗତକାଲି ସନ୍ଧ୍ୟାରେ ପାଇକମାଳ ଥାନାରେ ଖବର ଦେଇଥିଲେ । ରାତି ସମୟରେ ଶବ ଉଦ୍ଧାର କରାଯାଇ ପାରିନଥିଲା । ସୋମବାର ସକାଳୁ ପୁଲିସ ଓ ଅଗ୍ନିଶମ ବିଭାଗର ସହାୟତାରେ ପାଣି ଭିତରେ ଭାସୁଥିବା ମୃତକଙ୍କର ଶବ ଉଦ୍ଧାର କରିଥିଲେ । ପାଇକମାଳ ଥାନାର ସବ ଇନ୍ସପେକ୍ଟର ପ୍ରଫୁଲ୍ଲ ପାଣିଗ୍ରାହୀ କେଶ ନମ୍ବର ୨୭/୨୦ରେ ମାମଲା ରୁଜୁ କରି ଘଟଣାର ତଦନ୍ତ ଜାରି ରଖିଛନ୍ତି । ଶବକୁ ବ୍ୟବଛେଦ ପାଇଁ ପଦ୍ମପୁର ଡାକ୍ତରଖାନାକୁ ପଠା ଯାଇଛି ଓ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି ବୋଲି ଥାନା ଆଇଆଇସି ବିଶ୍ୱଜିତ ମନବୋଧ ସୂଚନା ଦେଇଛନ୍ତି ।