ଚାକିରି ନାଁରେ ଆଦିବାସୀ ଯୁବକଯୁବତୀଙ୍କୁ ଠକେଇ, ୬ ଲକ୍ଷ ହଡ଼ପ କରି ୩ ଫେରାର୍, ଥାନାରେ ମାମଲା
ରାୟଗଡ଼ା: ଚାକିରି ପାଇବା ଆଶାରେ ଟଙ୍କା ଦେଇ ଠକାମୀର ଶିକାର ହୋଇଛନ୍ତି ଆଦିବାସୀ ଯୁବକଯୁବତୀ। ଜିଲ୍ଲାର ବିଭିନ୍ନ ଗ୍ରାମାଞ୍ଚଳରୁ ୩ ଶହରୁ ଉର୍ଦ୍ଧ୍ବ ଯୁବକଯୁବତୀଙ୍କ ଠାରୁ ୬ ଲକ୍ଷରୁ ଉର୍ଦ୍ଧ୍ବ ଟଙ୍କା ହଡ଼ପ କରି ଏକ ବେସରକାରୀ କମ୍ପାନୀର ୩ କର୍ମଚାରୀ ଫେରାର୍ ହୋଇ ଯାଇଛନ୍ତି। ଏ ନେଇ ଯୁବକଯୁବତୀ ଆଜି ରାୟଗଡ଼ା ଥାନାର ଦ୍ବାରସ୍ଥ ହୋଇ ଲିଖିତ ଅଭିଯୋଗ କରିବା ସହ ଫେରାର୍ କର୍ମଚାରୀଙ୍କୁ ଗିରଫ କରିବାକୁ ଦାବି କରିଛନ୍ତି। ରାୟଗଡ଼ାରେ କନିଷ୍ଠ ଇନ୍ଷ୍ଟିଟ୍ୟୁସନ୍ ପ୍ରାଇଭେଟ୍ ଲିମିଟେଡ୍ ନାମକ ସଂସ୍ଥା ଖୋଲି ଚାକିରୀ ପ୍ରଦାନ ପାଇଁ କମ୍ପାନୀ କର୍ମଚାରୀ ଗାଁକୁ ଗାଁ ବୁଲି ଯୁବକଯୁବତୀଙ୍କୁ ପ୍ରଲୋଭନ ଦେଖାଇଥିଲେ। ମାସିକ ମୋଟା ଅଙ୍କର ବେତନ ଲୋଭ ଦେଖାଇବା ପରେ ଯୁବକଯୁବତୀ କର୍ମଚାରୀଙ୍କ ଫନ୍ଦି ଫିକର ବୁଝିନପାରି ଅଗ୍ରୀମ ବାବଦକୁ ୨ ହଜାର ଟଙ୍କା ଲେଖାଁଏ ପ୍ରଦାନ କରିଥିଲେ। ସଂସ୍ଥାର ନିର୍ଦେଶକ ଶ୍ରୀନିବାସ, କୋଷାଧ୍ୟକ୍ଷ ଟିଙ୍କୁ କୁମାର ଏବଂ ଓଡ଼ିଶା ଟିମ୍ ଲିଡର୍ ପ୍ରଣବ କୁମାର ମହାନନ୍ଦ ରାୟଗଡ଼ା, କାଶୀପୁର, କଲ୍ୟାଣସିଂହପୁର ଅଞ୍ଚଳ ବୁଲି ପ୍ରାୟ ୩ ଶହରୁ ଉର୍ଦ୍ଧ୍ବ ଯୁବକଯୁବତୀଙ୍କ ନିକଟରୁ ଟଙ୍କା ଆଦାୟ କରିଛନ୍ତି। ଟଙ୍କା ଦେବା ପରେ ଚାକିରୀ ଆଶାରେ ଥିବା ଯୁବକଯୁବତୀ କର୍ମଚାରୀଙ୍କ ସହ ଯୋଗା ଯୋଗରେ ଥିଲେ।
Sambad is now on WhatsApp
Join and get latest news updates delivered to you via WhatsApp
ଆଜି କାଲି କହି କମ୍ପାନୀ କର୍ମଚାରୀ ଦିନ ଗଡ଼ାଇବା ପରେ ଶେଷରେ ଫେରାର୍ ହୋଇ ଯାଇଛନ୍ତି। ୩ କମ୍ପାନୀ କର୍ମଚାରୀଙ୍କ ମୋବାଇଲ୍ ମଧ୍ୟ ଏବେ ଲାଗୁ ନଥିବାରୁ ଟଙ୍କା ଦେଇଥିବା ଯୁବକଯୁବତୀ ଚିନ୍ତିତ ହୋଇ ପଡିଛନ୍ତି। ଶେଷରେ ଠକେଇର ଶିକାର ହୋଇଥିବା ରାୟଗଡ଼ା ବ୍ଲକର କୁମ୍ଭିକୋଟା, ଗୁମ୍ମା, ରାୟଗଡ଼ା ପୌର ପରିଷଦର ସିରିକୋଣାର ଯୁବକଯୁବତୀ ଆଜି ଏ ସଂପର୍କରେ ରାୟଗଡ଼ା ଥାନା ଅଧିକାରୀଙ୍କ ଦୃଷ୍ଟି ଆକର୍ଷଣ କରିଛନ୍ତି। ଲିଖିତ ଏତଲାରେ ଫେରାର ଥିବା କମ୍ପାନୀ କର୍ମଚାରୀଙ୍କ ନାମ ଓ ମୋବାଇଲ୍ ନମ୍ବର ଉଲ୍ଲେଖ ରହିଛି। ଖୁବଶୀଘ୍ର ଫେରାର୍ କର୍ମଚାରୀଙ୍କୁ ଗିରଫ କରିବା ପାଇଁ ବିଜେପି ନେତା ଶ୍ୟାମ ସୁନ୍ଦର ଦାଶ, ବିଦ୍ୟା ପଣ୍ଡା ଓ ନରେଶ ବିଡିକା ମାଧ୍ୟମରେ ପୁରେନ୍ଦ୍ର ସିକ୍କା, ବନିତା ହିକ୍କା, ଚମ୍ପି କାଡ୍ରକା, ଗୌରୀ ହୁଇକା, ସନ୍ତୋଷ ଜାନି ପ୍ରମୁଖ ଯୁବକଯୁବତୀ ଥାନା ଅଧିକାରୀଙ୍କ ନିକଟରେ ଦାବି କରିଛନ୍ତି।