ବାଇକ ଦୁର୍ଘଟଣାରେ ଯୁବକ ମୃତ

ଡାବୁଗାଁ: ନବରଙ୍ଗପୁର ଜିଲ୍ଲା ଡାବୁଗାଁ ଥାନା ଅନ୍ତର୍ଗତ ଶିଙ୍ଗସାରି ଗ୍ରାମରେ ଏକ ବାଇକ ଦୁର୍ଘଟଣାରେ ଜଣେ ଯୁବକଙ୍କ ମୃତ୍ୟୁ ଘଟିଛି। ମୃତ ଯୁବକ ଶିଙ୍ଗସାରି ନିକଟ ଦନନ୍ଧିଗୁଡାର ସନ ସିଂ ଭତରା (୨୫) ବୋଲି ଜଣାପଡିଛି । ଏ ନେଇ ମୃତ ଯୁବକର ବାପା ପର୍ଶୁରାମ ଭତରା ଆଜି ଡାବୁଗାଁ ଥାନାରେ ଏତଲା ଦେବାପରେ ପୁଲିସ ଏକ ମାମଲା ୧୪୬/୨୪ ରୁଜୁ କରି ଶବ ଜବତ କରି ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଛନ୍ତି।  ଗତ ଜୁଲାଇ ମାସ ୨୯ ତାରିଖ ଦିନ ଡାବୁଗାଁ ଥାନା ଅନ୍ତର୍ଗତ ଦନନ୍ଧିଗୁଡା ଗ୍ରାମର ସନ ସିଂ ଭତରା ଏକ ବାଇକରେ କୌଣସି ଏକ କାର୍ଯ୍ୟରେ ନିକଟ ଶିଙ୍ଗସାରି ଗ୍ରାମକୁ ଯାଇ ନିଜ ଗ୍ରାମକୁ ଫେରୁଥିଲା।

ତେବେ ଦନନ୍ଧି ଗୁଡା ଓ ଶିଙ୍ଗସାରି ମଝି ରାସ୍ତାର ଏକ ବୁଲାଣି ନିକଟରେ ବାଇକ ଭାରସାମ୍ୟ ହରାଇବାରୁ ସନ ସିଂ ଭତରା ଦୁର୍ଘଟଣାର ଶିକାର ହୋଇ ରାସ୍ତା କଡ଼ରେ ଛିଟିକି ପଡିଥିଲା। ଖବର ପାଇ ପରିବାର ଲୋକେ ପ୍ରଥମେ ଉମରକୋଟ ସରକାରୀ ଡାକ୍ତରଖାନା ଓ ପରେ ଜିଲ୍ଲା ମୁଖ୍ୟ ସରକାରୀ ଡାକ୍ତରଖାନାକୁ ସ୍ଥାନାନ୍ତର କରିଥିଲେ। ତେବେ ଅବସ୍ଥା ଗୁରୁତର ପରେ ନବରଙ୍ଗପୁରରୁ କୋରାପୁଟ ମୁଖ୍ୟ ସରକାରୀ ଡାକ୍ତରଖାନାକୁ ସ୍ଥାନାନ୍ତର କରିଥିଲେ। ଚିକିତ୍ସାଧୀନ ଅବସ୍ଥାରେ ଆଜି ସନ ସିଂ ଭତରାର ମୃତ୍ୟୁ ଘଟିଥିଲା। ଡାବୁଗାଁ ଥାନା ଶିଙ୍ଗସାରି ପୁଲିସ ଫାଣ୍ଡି ଅଧିକାରୀ ହରିହର ଭତରା ଘଟଣାର ତଦନ୍ତ କରୁଛନ୍ତି।