ମନ୍ଦିରରେ ଶୋଇଥିବାବେଳେ ଯୁବକଙ୍କୁ ହତ୍ୟା

ଭୁବନ: ଢେଙ୍କାନାଳ ଜିଲ୍ଲା ପୁରୁଣା ଅମାଙ୍ଗ ଗ୍ରାମରେ ବିଭତ୍ସ ହତ୍ୟାକାଣ୍ଡ । ନିହଲପ୍ରସାଦ ଥାନା ଅନ୍ତର୍ଗତ ପୁରୁଣା ଅମାଙ୍ଗ ଗ୍ରାମର ଶିବ ମନ୍ଦିରରେ ଏହି ହତ୍ୟାକାଣ୍ଡ ଘଟିଛି । ଶିବ ମନ୍ଦିରରେ ଶୋଇଥିବାବେଳେ ବୁଧବାର ରାତିରେ ଦୁର୍ବୃତ୍ତମାନେ ଜଣେ ବ୍ୟକ୍ତିଙ୍କୁ ହତ୍ୟା କରିଛନ୍ତି | ଏହି ବ୍ୟକ୍ତି ଜଣକ ହେଉଛନ୍ତି ନିହଲ ପ୍ରସାଦ ଥାନା ଅନ୍ତର୍ଗତ ପୁରୁଣା ଅମାଙ୍ଗ ଗ୍ରାମର ରଞ୍ଜନ ପାଗଡ଼ । ରଂଜନଙ୍କୁ ଅତି ବିଭତ୍ସ ଭାବେ ଦୁର୍ବୃତ୍ତମାନେ ହାଣି ପକାଇଥିଲେ । ଏହାପରେ ତାଙ୍କୁ ମୁର୍ମୁଷ ଅବସ୍ଥାରେ ପରିବାର ପକ୍ଷରୁ ଢେଙ୍କାନାଳ ଜିଲ୍ଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଥିଲା । କିନ୍ତୁ ତାଙ୍କର ମୃତ୍ୟୁ ହୋଇଯାଇଛି | ରଂଜନଙ୍କ ଛାତି ଓ ବେକରେ ଧାରୁଆ ଅସ୍ତ୍ରରେ ଗଭୀର କ୍ଷତ ଥିବା ଦେଖାଯାଇଛି ।

ମୃତ ରଞ୍ଜନ ତାଙ୍କ ପତ୍ନୀଙ୍କୁ ନିର୍ଯାତନା ମାମଲାରେ ଜେଲ ଯାଇ ଗତ ଦୁଇବର୍ଷ ହେଲା ଜେଲ୍‌ରୁ ଫେରିଥିଲେ । ତାଙ୍କ ପତ୍ନୀଙ୍କ ସହ ବିବାହ ବିଚ୍ଛେଦ ନେଇ ବିବାଦ ଲାଗିଥିବାବେଳେ ପତ୍ନୀ ତାଙ୍କ ବାପା ଘରକୁ ଚାଲିଯାଇଥିବା ଜଣାପଡିଛି । ଫଳରେ ହତ୍ୟାକାଣ୍ଡ ପଛରେ ସଠିକ କାରଣ କଣ ଜଣାପଡି ନାହିଁ | ନିହଲ ପ୍ରସାଦ ଥାନା ପୁଲିସ ମୃତଦେହକୁ ବ୍ୟବଛେଦ ପାଇଁ ପଠାଇ ଘଟଣାର ତଦନ୍ତ କରୁଥିବା କହିଛନ୍ତି ଥାନାଧିକାରୀ କାଶୀନାଥ ହାଁସଦା |