ବରୀ: ଯାଜପୁର ଟାଉନର ବରୀ ବ୍ଲକ କନିଷ୍ଠ ଯନ୍ତ୍ରୀଙ୍କୁ ଆକ୍ରମଣ କଲେ ଜିଲ୍ଲା ପରିଷଦ ସଦସ୍ୟ ଓ ତାଙ୍କ ସମର୍ଥକ | ନିମ୍ନମାନର କାମକୁ ବିରୋଧ କରିବାରୁ ଜେଇଙ୍କୁ ଜିଲ୍ଲା ପରିଷଦ ସଭ୍ୟ ଦିଲ୍ଲୀପ ମହାନ୍ତି ଆକ୍ରମଣ କରିଥିବାର ଜଣାପଡିଛି | ଆଉ ଏହା ପରେ ପୁଲିସର ଦ୍ୱାରସ୍ଥ ହୋଇଛନ୍ତି କନିଷ୍ଠ ଯନ୍ତ୍ରୀ ବିପ୍ଳବ ପରିଜା | ମିଳିଥିବା ସୂଚନା ମୁତାବକ ବରୀ ବ୍ଲକ ଅନ୍ତର୍ଗତ ଡିହପାଳରେ ଏକ ଖଳା ତିଆରି ହେଉଥିଲା | ତେବେ ଏହି ଖଳା କାର୍ଯ୍ୟର ଆଜି ଢ଼ଳେଇ ପଡ଼ିବାର ଥିଲା | କିନ୍ତୁ ଜେଇ କହିଥିଲେ ଯେ ତାଙ୍କ ଉପସ୍ଥିତିରେ ଢ଼ଳେଇ କାର୍ଯ୍ୟ ହେବ | କିନ୍ତୁ ଆଜି ଜେଇଙ୍କ ଅନୁପସ୍ଥିତିରେ ଢ଼ଳେଇ ପଡୁଥିଲା | ସେହି ସମୟରେ ୨୨ନମ୍ବର ଜୋନର ଜିଲ୍ଲା ପରିଷଦ ସଦସ୍ୟ ଦିଲ୍ଲୀପ ମହାନ୍ତି ସେଠାରେ ଉପସ୍ଥିତ ଥିଲେ |
Sambad is now on WhatsApp
Join and get latest news updates delivered to you via WhatsApp
ଏନେଇ ଖବର ପାଇବା ପରେ ଜେଇ ଯେତେବେଳେ ସେଠାରେ ପହଂଚି ନିମ୍ନମାନର କାମକୁ ବିରୋଧ କରିଥିଲେ ସେତେବେଳେ ଜିଲ୍ଲା ପରିଷଦ ସଦସ୍ୟ ଓ ତାଙ୍କ ସମର୍ଥକ ଜେଇଙ୍କୁ ଆକ୍ରମଣ କରିଥିଲେ | ଏଥିରେ ଜେଇଙ୍କର ମୁଣ୍ଡ ଫାଟିଯାଇଥିବାବେଳେ ତାଙ୍କୁ ମାଡ ମାରିବା ପରେ ଏକ ଘରେ ବନ୍ଦ କରି ରଖିଦେଇଥିଲେ | ଏନେଇ ବିଡ଼ିଓଙ୍କ ସୂଚନା ପାଇବା ପରେ ପୁଲିସ ତାଙ୍କୁ ଉଦ୍ଧାର କରିଥିଲା | ତେବେ ବର୍ତ୍ତମାନ ଜେଇ ଥାନାରେ ଥିବାବେଳେ ଜିଲ୍ଲା ପରିଷଦ ସଦସ୍ୟ ଖୁଲମଖୁଲା ବୁଲୁଛନ୍ତି |