ଆତ୍ମହତ୍ୟା ସ୍ଥିତି
ଦର୍ପଣ
ଜାତୀୟ ଅପରାଧ ରେକର୍ଡ ବ୍ୟୁରୋ (ଏନ୍ସିଆର୍ବି)-୨୦୨୦ ଦ୍ବାରା ସଦ୍ୟ ପ୍ରକାଶିତ ଦୁର୍ଘଟଣା ଓ ଆତ୍ମହତ୍ୟାଜନିତ ମୃତ୍ୟୁ ରିପୋର୍ଟ ଉଦ୍ବେଗଜନକ ଚିତ୍ର ଉପସ୍ଥାପିତ କରିଛି। ଏହାର ତଥ୍ୟ ଅନୁଯାୟୀ ୨୦୨୦ ମସିହାରେ ଦେଶରେ ୧,୫୩,୦୫୨ ଜଣ ଆତ୍ମହତ୍ୟା କରିଥିଲେ। ସଂଖ୍ୟା ଦୃଷ୍ଟିରୁ ଦେଖିଲେ ୨୦୧୯ ତୁଳନାରେ ୨୦୨୦ରେ ଦେଶରେ ଆତ୍ମହତ୍ୟା ସଂଖ୍ୟା ୧୦% ବୃଦ୍ଧି ପାଇଛି। ରାଜ୍ୟମାନଙ୍କ ମଧ୍ୟରେ ମହାରାଷ୍ଟ୍ରରେ ସର୍ବାଧିକ ୧୯,୯୦୯ ଜଣ ଆତ୍ମହତ୍ୟା କରିଛନ୍ତି। ତା ପଛକୁ କ୍ରମାନ୍ବୟରେ ଅଛନ୍ତି ତାମିଲନାଡୁ, ପଶ୍ଚିମବଙ୍ଗ, ମଧ୍ୟ ପ୍ରଦେଶ ଓ କର୍ଣ୍ଣାଟକ। ଓଡ଼ିଶାରେ ସମୁଦାୟ ୫୫୪୬ ଜଣ ଆତ୍ମହତ୍ୟା ଦ୍ବାରା ଜୀବନ ହାରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ସେହିପରି ଜାତୀୟ ସ୍ତରରେ ଆତ୍ମହତ୍ୟା ହାର (ପ୍ରତି ଏକ ଲକ୍ଷ ଜନସଂଖ୍ୟାରେ) ମଧ୍ୟ ୧୧.୩କୁ ବୃଦ୍ଧି ପାଇଛି ଯାହା ୨୦୧୯ରେ ୧୦.୪ ଥିଲା। ଆଣ୍ଡାମାନ ଓ ନିକୋବାର ଦ୍ବୀପପୁଞ୍ଜରେ ଆତ୍ମହତ୍ୟା ହାର ସର୍ବାଧିକ ୪୫ ରହିଛି। ସର୍ବାଧିକ ଆତ୍ମହତ୍ୟା ହାର ତାଲିକାରେ ତା ପଛକୁ ଅଛନ୍ତି ସିକ୍କିମ୍ (୪୨.୫), ଛତିଶଗଡ଼ (୨୬.୪), ପୁଡୁଚେରି (୨୬.୩) ଓ କେରଳ (୨୪)। ଓଡ଼ିଶା (୧୨.୨)ରେ ଆତ୍ମହତ୍ୟା ହାର ଜାତୀୟ ହାର ଠାରୁ ସାମାନ୍ୟ ଅଧିକ ରହିଛି। ଓଡ଼ିଶାର ସମୁଦାୟ ଆତ୍ମହତ୍ୟାର ୮୧.୨% ହେଉଛି ପାରିବାରିକ ସମସ୍ୟାଜନିତ। ଦେଶରେ ସର୍ବାଧିକ ୩୩.୬% ଲୋକ ପାରିବାରିକ ସମସ୍ୟା ଯୋଗୁଁ ଆତ୍ମହତ୍ୟା କରିଥିବା ଜଣାପଡ଼ିଛି। ପେସା ଦୃଷ୍ଟିରୁ ଆତ୍ମହତ୍ୟା କରିଥିବା ଲୋକଙ୍କ ମଧ୍ୟରୁ ସର୍ବାଧିକ ୨୪.୬% ବା ୩୭,୬୬୬ ଜଣ ହେଉଛନ୍ତି ଦିନ ମଜୁରିଆ। ଗତ ସାତ ବର୍ଷରେ ଦିନ ମଜୁରିଆଙ୍କ ଆତ୍ମହତ୍ୟା ଭାଗ ଦ୍ବି-ଗୁଣିତ ହେବା ଦେଶର ସାମାଜିକ ଓ ଅର୍ଥନୈତିକ ବ୍ୟବସ୍ଥାର କରୁଣ ଚିତ୍ର ପ୍ରଦାନ କରିଛି।