ନାମ ଉଚ୍ଛେଦ

ଉତ୍ତର କୋରିଆର ଲୌହ ପ୍ରାଚୀର ଘେରା ଅନ୍ଧାରି ମୁଲକରୁ ବେଳେ ବେଳେ ନିର୍ଗତ ହୋଇଥାଏ ଅଦ୍ଭୁତ ସମ୍ବାଦ ସବୁ, ଯେମିତିକି ଏକଛତ୍ରବାଦୀ କିମ୍ ଜଙ୍ଗ ଉନ ତାଙ୍କର ପିଉସାଙ୍କୁ ଭୋକିଲା କୁକୁରଙ୍କ ଯନ୍ତା ଭିତରେ ପକାଇ ମାରିଦେଲେ, କିମ୍ ଭାଷଣ ଦେଉଥିବା ବେଳେ ଜଣେ ଅଧିକାରୀ ଶୋଇ ପଡ଼ିବାରୁ ତାଙ୍କୁ ପ୍ରାଣଦଣ୍ଡ, ଏଗାର ଦିନ ପାଇଁ ଦେଶବାସୀ ହସିପାରିବେ ନାହିଁ ଇତ୍ୟାଦି ଇତ୍ୟାଦି। ସେହି ଅଜବ ଦୁନିଆର ସଦ୍ୟତମ ହୁକୁମ- ସେ ଦେଶରେ ଆଉ କେହି ନିଜ ଝିଅର ନାମ ‘ଯୁ-ଆଏ’ ରଖି ପାରିବେ ନାହିଁ। ଖାଲି ଯେ ନୂଆ ରଖିବେ ନାହିଁ ତାହା ନୁହେଁ, ଯଦି ଆଗରୁ ସେ ନାଁ ରଖିଛନ୍ତି, ତେବେ ତତ୍‌କ୍ଷଣାତ୍‌ ତାକୁ ବଦଳାଇବାକୁ ପଡ଼ିବ। ଅବଶ୍ୟ ଏ ଦିଗରେ ଅଳସୁଆମାନଙ୍କୁ ଟିକେ ରିହାତି, ନିର୍ଦ୍ଦିଷ୍ଟ ତାରିଖ ଭିତରେ କାମଟି ନ ସାରିଲେ ସରକାରୀ ବାବୁମାନେ ନଥିପତ୍ରରେ ନାଁଟି ଆପଣା ଛାଏଁ ବଦଳାଇଦେବେ। ଯଦିଓ ଏହି ଆଳସ୍ୟପରାୟଣମାନଙ୍କ ପାଇଁ କିଛି ଦଣ୍ଡବିଧାନର ବ୍ୟବସ୍ଥା ଏବେ ଘୋଷଣା କରାଯାଇନାହିଁ, ତେବେ ସେଠିକା ସରକାରଙ୍କ ପୁରୁଣା କାରନାମାକୁ ଆଖିରେ ରଖି ସେ ରିହାତିର ଫାଇଦା ଉଠାଇବାକୁ କୌଣସି ନାଗରିକ ଅପେକ୍ଷା କରିବେ ନାହିଁ।

କାନକୁ ଅଜବ ଲାଗୁଥିବା ଏହି ଫତୁଆଟି ପଛରେ ଗୋଟିଏ ଗମ୍ଭୀର କାରଣ ରହିଛି। ‘ଯୁ-ଆଏ’ ଏମିତି ସେମିତି ନାଁ ନୁହେଁ, ଏହା ଖୋଦ ସେ ଦେଶର ସ‌େର୍ବସର୍ବା କିମ୍ ଜଙ୍ଗ ଉନଙ୍କ ଦଶ ବର୍ଷୀୟା କନ୍ୟାରତ୍ନର ନାଁ। ଯାହାର ତାହାର ନାଁ ଦେଶର ଅପ୍ରତିଦ୍ୱନ୍ଦ୍ବୀ ନେତାଙ୍କ ଝିଅର ନାଁ ସହ ସମାନ କେମିତି ହେବ? କିମ୍ ପରିବାରର ଗରିମା ଉପରେ ଏହି କଥାଟି ଆଞ୍ଚ ଆଣିଦେବ, ଯେହେତୁ ସେ ଦେଶରେ ତିନି ପୁରୁଷ ଧରି କିମ୍ ବଂଶଜ ବ୍ୟତୀତ କେହି ଗାଦିନସୀନ ହୋଇନାହାନ୍ତି। ଏହି ବଂଶ ଶାସନ କରିବା ପାଇଁ ଐଶ୍ୱରିକ ଶକ୍ତି ନେଇ ଧରାପୃଷ୍ଠକୁ ଆସିଛି ବୋଲି ସେଠିକାର ନାଗରିକଙ୍କ ମୁଣ୍ଡରେ ପୂରାଇ ଦିଆଯାଇଛି।
ଅବଶ୍ୟ ପିଲାଙ୍କର ନାଁ ଦେବାକୁ ନେଇ କଟକଣା ପୃଥିବୀର ବିଭିନ୍ନ ଦେଶରେ ସରକାରୀ ଭାବରେ ରହିଛି। ଚୀନ ଓ ଜାପାନରେ ରାଜବଂଶୀୟ ଶାସକମାନଙ୍କର ନାଁ ଦେବାକୁ ପ୍ରଜାମାନଙ୍କୁ ବାରଣ କରିବାର ପରମ୍ପରା ଥିଲା। ଆଜିର ସମୟରେ ମଧ୍ୟ ଆମେରିକା ଇଂଲଣ୍ଡ ଇତ୍ୟାଦି ସହ ଅନେକ ଦେଶରେ କ’ଣ ନାମ ଦେଇ ହେବନାହିଁ ତା’ର ତାଲିକା ପ୍ରକାଶିତ ହୋଇଥାଏ। ନୂଆ ନାଁଟି ଉଚ୍ଚାରଣ କରିବାକୁ କଷ୍ଟକର ହେଲେ, ପିଲାର ବା ଅନ୍ୟ କାହାର ସମ୍ମାନକୁ ବାଧା ପହଞ୍ଚାଉଥିଲେ, ବିପରୀତ ଲିଙ୍ଗ ସୂଚକ ହୋଇଥିଲେ, ନାଁଟିରେ ସଂଖ୍ୟା ବା ଗାଣିତିକ ସୂତ୍ର ରହିଥିଲେ, ନିର୍ଦ୍ଦିଷ୍ଟ ଧର୍ମ ପ୍ରତି ଅପମାନସୂଚକ ହୋଇଥିଲେ, ସେ ନାଁ ଅନୁମୋଦିତ ହୋଇ ପାରିବ ନାହିଁ ବୋଲି କେତେକ ନିୟମ ସଂହିତା ସ୍ପଷ୍ଟ ଲେଖିଦେଇଛନ୍ତି।

ପୃଥିବୀର ଅନ୍ୟତମ ଧନୀ ବ୍ୟବସାୟୀ ଏଲନ ମସ୍କ ତାଙ୍କ ପୁଅର ନାଁ ଦେଲା ବେଳେ କୌଣସି କଟକଣାକୁ ମନରେ ରଖିଥିବା କଥା ମନେ ହୁଏ ନାହିଁ। ପିଲାଟିର ନାଁ ସେ ‘X Æ A-12’ ରଖିଲା ବେଳେ ଅନେକ ଲୋକ ଚକିତ ହେଲେ ଯେ ଏହାକୁ ଉଚ୍ଚାରଣ କେମିତି କରାଯିବ! ତା’ ଛଡ଼ା ଏଥିରେ ସଂଖ୍ୟା ଓ ଅଦ୍ଭୁତ ବର୍ଣ୍ଣ ମଧ୍ୟ ରହିଛି। ତେଣୁ ଜନ୍ମ ନେବାର ଅଳ୍ପ ସମୟ ଭିତରେ ପିଲାଟି ତା’ ନାଁ ପାଇଁ ସାରା ଦୁନିଆରେ ପରିଚିତ ହୋଇଗଲା। ଦୁନିଆକୁ ସବୁବେଳେ କିଛି ନିଆରା କରି ଦେଖାଉଥିବା ଏଲନ ମସ୍କ ଏହି ନାଁଟି ଜରିଆରେ ହୁଏତ ଜଣାଇବାକୁ ଚାହୁଁଥିଲେ ଯେ ନିଜ ପିଲାର ନାମକରଣ ଏକ ବ୍ୟକ୍ତିଗତ ବ୍ୟାପାର ଓ ଏଥିରେ କିଛି କଟକଣା ରହିବା ଉଚିତ ନୁହେଁ।

ଅବଶ୍ୟ, ଏଲନ ମସ୍କ ନିଜ ନବଜାତକର ନାମକରଣ କଲା ବେଳେ ଯେଉଁ ସ୍ୱାଧୀନତା ଚାହିଁଥିଲେ, ତାହା ଆମ ଭାରତୀୟ ପିତାମାତାମାନେ ଅନେକ ଦିନରୁ ବିନା ସୋର-ଶବ୍ଦ ଭିତରେ ଉପଭୋଗ କରିଆସୁଛନ୍ତି। ଆମର ଏଠି ପିଲାଟିକୁ ନାଁ ଦେବା ବେଳେ ନା ଥାଏ କିଛି ସରକାରୀ କଟକଣା ନା ଥାଏ ପରମ୍ପରାର ବାଧ୍ୟ ବାଧକତା! ପୂଜକ ଓ ଜ୍ୟୋତିଷମାନଙ୍କ ଦ୍ୱାରା ଶିଶୁଟିର ନାଁ ନିର୍ଦ୍ଧାରଣ କରାଯିବାର ପରମ୍ପରାକୁ ଭୁଲି ଆଗେଇ ଯାଇଛି ଆଜିର ମଣିଷ। ଗଣନା ଓ ପରମ୍ପରା ନିର୍ଦ୍ଦେଶିତ ନାଁଟି ହୁଏତ ଆଧୁନିକ ଋଚି ସମ୍ପନ୍ନ ପିତାଟିର ମନକୁ ପାଇ ନ ପାରେ ଓ ଏକ ଅପ୍ରୀତିକର ପରିସ୍ଥିତି ସୃଷ୍ଟି କରିପାରେ। ଗୋପୀନାଥ ମହାନ୍ତିଙ୍କର ‘ଅମୃତର ସନ୍ତାନ’ ଉପନ୍ୟାସରେ କନ୍ଧ ଯୁବକ ଡିଉଡୁ ସାଓଁତାର ପିତୃତ୍ୱର ଆନନ୍ଦରେ ଟିକେ ଭଟ୍ଟା ପଡ଼ିଯାଇଛି, ଯେତେବେଳେ ପରମ୍ପରା ଅନୁସାରେ କାଳିସୀ ଲାଗିଥିବା ବେଜୁଣୀ ତା’ ପିଲାଟିର ନାଁ ରଖୁଛି ହାକିନା ଯାହାର ଅର୍ଥ କାଙ୍ଗାଳି, ଭୋକିଲା। ଡିଉଡୁ ସିନା କନ୍ଧ ସମାଜରେ ଧାର୍ମିକ ବିଶ୍ୱାସର କର୍ତ୍ତୃତ୍ୱ ଯୋଗୁଁ ଅନିଚ୍ଛା ସତ୍ତ୍ୱେ ନାଁଟି ମାନିନେଉଛି, ହେଲେ ଆଜିର ପିତାମାତା ସେ ବାଧ୍ୟବାଧକତାର ଶିକାର ହେବେ ବା କାହିଁକି?

ଆମ ଦେଶରେ ନାଁ ଦେବାର ଏହି ଅଖଣ୍ଡ ସ୍ୱାଧୀନତା ଯୋଗୁଁ ପିଲାମାନଙ୍କର ନାଁଗୁଡ଼ିକର ନବୀନତା ଓ ବିବିଧତା ଦେଖି ଚକିତ ହେବାକୁ ପଡ଼େ। ନାଁ ବାଛିବା ବେଳେ ଭାରତୀୟ ପିତାମାତା ପଶୁ, ପକ୍ଷୀ, ପ୍ରକୃତି, ନକ୍ଷତ୍ର ମଣ୍ଡଳ, ବାର, ମାସ, ତିଥି, ସାଧୁ, ସନ୍ଥ, ଦେବଦେବୀ, ପୌରାଣିକ ଚରିତ୍ର (ଏମିତିକି ଦୁଷ୍ଟ ଚରିତ୍ର), ଐତିହାସିକ ବ୍ୟକ୍ତିତ୍ୱ (ଦୁର୍ଦ୍ଧର୍ଷ ବ୍ୟକ୍ତିତ୍ୱ), ବଲିଉଡ୍‌ ତାରକା (ସାଙ୍ଗିଆ ସହିତ- ଯେମିତିକି ଶାହରୁଖ ଖାଁ ସାହୁ), କ୍ରିକେଟ୍‌ ଖେଳାଳି, ସେନାଧିକାରୀ (ଜର୍ଣ୍ଣେଲ ସିଂହ, କପତାନ ସିଂହ), ପ୍ରଭାବଶାଳୀ ସରକାରୀ ପଦାଧିକାରୀ (କଲେକ୍ଟର, ବିଡିଓ, ଡାକ୍ତର), ଜଳବାୟୁ (ବର୍ଷା, ବାଦଲ, ତୋଫାନ) ଇତ୍ୟାଦି କୌଣସି ବର୍ଗକୁ ଅଣଦେଖା କରନ୍ତି ନାହିଁ। ଆମର ଏଠି ନାଁକୁ ନେଇ ସରକାରୀ କଟକଣା ନାହିଁ ସିନା, ହେଲେ ବେଳେବେଳେ ସରକାରୀ ବାବୁମାନେ ଜଣକର ପରିଚୟ ପତ୍ରରେ ଭୁଲ୍‌ ନାଁଟି ବସେଇ ଦିଅନ୍ତି। କୁହାଯାଏ ଯେ ଜଣଙ୍କ ପାଇଁ ତା’ ନାଁଠୁ ବଳି ସୁମଧୁର ସ୍ୱର ଆଉ କିଛି ନାହିଁ। ହେଲେ ସରକାରୀ ନଥିରେ ଭୁଲ୍‌ ଭଟକା ସେ ସ୍ୱରକୁ ପୂରା ବେସୁରା କରିପକାଏ। ଏପରି କ୍ଷେତ୍ରରେ ବିଚରା ଲୋକଟିକୁ ନାଁ ସଂଶୋଧନ ପାଇଁ ନୟାନ୍ତ ହେବାକୁ ପଡ଼ିଥାଏ। ତଥାପି ସେପରି ପରିସ୍ଥିତି ଉତ୍ତର କୋରିଆ ଭଳି ଅପ୍ରତ୍ୟାଶିତ ଭାବରେ ନାମ ଉଚ୍ଛେଦ ଦ୍ୱାରା ନିଜର ପରିଚୟ ହରେଇବାର ଦୁଃଖଠାରୁ କମ୍ ପୀଡ଼ାଦାୟକ।

ମୋ: ୯୪୩୭୦୮୯୬୫୫