ସରକାରୀ ସ୍ବାସ୍ଥ୍ୟ ସେବାକୁ ଗୁରୁତ୍ବ

ଆମ ରାଜ୍ୟର ସରକାରୀ ଚିକିତ୍ସାନୁଷ୍ଠାନଗୁଡ଼ିକରେ ଠିକ୍‌ ଭାବେ ସ୍ବାସ୍ଥ୍ୟ ସେବା ମିଳୁନାହିଁ। ଏଣୁ ସାଧାରଣ ଲୋକେ ବହୁତ ହଇରାଣ ହେଉଛନ୍ତି। ଡାକ୍ତରଙ୍କ ଅଭାବ ସହିତ ବିଭିନ୍ନ ପ୍ରକାର ଉତ୍କଟ ସମସ୍ୟା ହେତୁ ସରକାରୀ ଡାକ୍ତରଖାନାଗୁଡ଼ିକ ସାଧାରଣ ରୋଗୀଙ୍କ ଚାହିଦା ପୂରଣ କରିବାରେ ଅସମର୍ଥ। ଏ ସବୁରେ ଭିତ୍ତିଭୂମିଗତ ଦୁର୍ବଳତା ଅନେକ। ଉପାନ୍ତ ଅଞ୍ଚଳର ଅଧିକାଂଶ ଡାକ୍ତରଖାନା ଅପରିଷ୍କାର ଓ ଅପରିଚ୍ଛନ୍ନ। ସେହି କାରଣରୁ ରୋଗୀମାନଙ୍କ ସଂକ୍ରମଣ ଆହୁରି ଜଟିଳ ହୋଇ ପଡ଼ୁଥିବା ଦେଖାଯାଉଛି।

ଡାକ୍ତରଖାନାରେ ମାଗଣା ଔଷଧ ମଧ୍ୟ ନିୟମିତ ଭାବେ ମିଳେନାହିଁ। ଅନେକ ପ୍ରାଥମିକ ସ୍ବାସ୍ଥ୍ୟ କେନ୍ଦ୍ର ଓ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର ଘରଗୁଡ଼ିକ ଭଙ୍ଗାରୁଜା ଅବସ୍ଥାରେ ଅଛି। କେଉଁଠି ଛାତରୁ ପାଣି ଗଳୁଛି ତ କେଉଁଠି ଲାଇଟ୍ ଓ ପଙ୍ଖା ଆଦି ଚାଲୁନାହିଁ। ବେଡ୍‌ଗୁଡ଼ିକ ଅପରିଷ୍କାର। ବାରଣ୍ଡାରେ କୁକୁର ଏବଂ ରୋଗୀ ଏକା ସାଙ୍ଗରେ ଶୁଅନ୍ତି। ଅସହ୍ୟ ଗରମ ଓ ଗୁଳୁଗୁଳିରେ ରୋଗୀମାନେ ଡାକ୍ତରଖାନା ଖଟ ଛାଡ଼ି ବାହାରେ ଗଛ ମୂଳରେ ବସିଥିବାର ବା ଶୋଇ ଥିବାର ଫ‌େଟା ଅନେକ ସମୟରେ ଗଣମାଧ୍ୟମରେ ବାହାରିଥାଏ। ଏ ବର୍ଷ ବଜେଟ୍‌ରେ ରାଜ୍ୟ ସରକାର ସ୍ବାସ୍ଥ୍ୟ ବିଭାଗ ଲାଗି ଅଧିକ ବ୍ୟୟର ବ୍ୟବସ୍ଥା କରିଛନ୍ତି। ତେଣୁ, ଡାକ୍ତରଙ୍କ ଅଭାବ ପୂରଣ ସହିତ ସବୁ ଅଭାବ ଓ ଅସୁବିଧା ଦୂର କରାଯିବାର ଉଦ୍ୟମ ହେବା ଜରୁରୀ।
ସଂଗ୍ରାମ କେଶରୀ ରାୟ
ଜଙ୍କିଆ, ଖୋର୍ଦ୍ଧା