ବିଭିନ୍ନ ସହରର ରାସ୍ତାଗୁଡ଼ିକରେ ଧଳା ଗାର ଚିହ୍ନିତ ‘ଜେବ୍ରା କ୍ରସିଂ’ର ଉଦ୍ଦେଶ୍ୟ ତା’ ଉପରେ ପଦଚାରୀମାନେ ନିରାପଦରେ ସଡ଼କ ପାର ହେବେ। ଏହାର ଅର୍ଥ ‘ଜେବ୍ରା କ୍ରସିଂ’ ଧାରରେ କେହି ଜଣେ ବ୍ୟକ୍ତି ଛିଡ଼ା ହୋଇ ଅପେକ୍ଷା କରିବାର ମର୍ମ ହେଲା ଦ୍ରୁତଗାମୀ ଯାନଗୁଡ଼ିକ ବେଗ ମନ୍ଥର କରି ତାଙ୍କୁ ସଡ଼କ ପାର ହେବା ଲାଗି ସୁଯୋଗ ପ୍ରଦାନ କରିବେ। ବିଦେଶରେ ଏହି ସଂଭ୍ରମବୋଧ ଅତ୍ୟନ୍ତ ସ୍ପଷ୍ଟ। ସେମାନେ ପଦଚାରୀଙ୍କୁ ବାଟ ଦେବା ଲାଗି ଗାଡ଼ି ବନ୍ଦ କରି ଅପେକ୍ଷା କରନ୍ତି। କିନ୍ତୁ ଆମ ଦେଶରେ ସ୍ଥିତି ସଂପୂର୍ଣ୍ଣ ବିପରୀତ। ଦ୍ରୁତ ଗତିରେ ଚାଲୁଥିବା ଗାଡ଼ିର ଯିବା ଆସିବା ଭିତରେ ଆପଣାକୁ ବଞ୍ଚାଇ ରାସ୍ତା ପାର ହେବା ଯେମିତି ପଦଚାରୀର ନିଜ ଦାୟିତ୍ବ। ଟ୍ରାଫିକ୍‌ ପୁଲିସ ଥିବା ଛକମାନଙ୍କରେ ସ୍ଥିତି ଭଲ, କାରଣ ଉପସ୍ଥିତ ପୁଲିସ ଗାଡ଼ିଗୁଡ଼ିକୁ ଅଟକାଇଲେ ପଦଚାରୀମାନେ ନିରାପଦରେ ସଡ଼କ ପାର କରିବାର ସୁଯୋଗ ପାଆନ୍ତି।

Advertisment

କିନ୍ତୁ ପୁଲିସ ନ ଥିବା ସ୍ଥାନରେ ସମସ୍ୟା ଉତ୍କଟ, ଯେଉଁଠି ସମୟେ ସମୟେ ବୟସ୍କ ପଦଚାରୀମାନେ ସନକ ପାର ହେବାକୁ ଭରସି ନ ପାରି ଦଶରୁ ପନ୍ଦର ମିନିଟି ବା ଅଧିକ ସମୟ ପର୍ଯ୍ୟନ୍ତ ନିରୁପାୟ ଭାବେ ଛିଡ଼ା ହୋଇ ରହନ୍ତି। ଏଭଳି ସ୍ଥିତିରେ ଆମ ଗାଡ଼ି ଚାଳକମାନଙ୍କ ଠାରେ ସଦ୍‌ବୁଦ୍ଧି ଉଦୟ ହେଉ ବୋଲି ଆଶା କରି ଅପେକ୍ଷା କରି ରହିବା ନିରର୍ଥକ। ବରଂ, ପ୍ରତି ‘ଜେବ୍ରା କ୍ରସିଂ’ ପୂର୍ବରୁ ହଂପ୍‌ସ ତିଆରି କରାଯାଉ, ଯାହା ଅନ୍ତତଃ ପକ୍ଷେ ଗାଡ଼ିଗୁଡ଼ିକର ବେଗକୁ ମନ୍ଥର କରିବ ଓ ପଦଚାରୀମାନେ ନିରାପଦରେ ସଡ଼କ ପାର ହେବାର ସୁଯୋଗ ପାଇବେ।
ବିଶ୍ବଜିତ ପରିଡ଼ା
ବୋଲକଣା, ଡେଲାଙ୍ଗ, ପୁରୀ