ଆଜିକାଲି ବାହା ହେବା ଯୋଗ୍ୟ କୋଉ ପୁଅକୁ ଯଦି ‘ବାହା କିଆଁ ହେଉନୁ ବାବୁ?’ ବୋଲି ପଚାରି ଦେବେ ତ ସିଏ ଜରୁର୍ କହିବ ଯେ ‘ନା ନା ମୋର ସେ ଝମେଲାରେ ପଶିବାର ନାଇଁ।’ ତା’ର ଏମନ୍ତ ବିବୃତି ଶୁଣିବା ପରେ ଆପଣଙ୍କ ମନରେ ହୁଏ’ତ ନାଚି ଯାଇପାରେ ସେଇ ପୁରୁଣା ସିନେମାର ଗୀତ ‘ବୋଉ ଲୋ, ହେବି ନାହିଁ, ବାହା ହେବି ନାହିଁ’ ଗାଇ ଗାଇ ଡିଆଁଡେଇଁ କରୁଥିବା ନାୟକର କଥା।
ଅସଲରେ କିନ୍ତୁ ସିନେମାର ସଂଶିତ ନାୟକଟି ଅବଶେଷେ ବାହା ହୋଇ ଯାଇଥିବା ପରି ଆପଣଙ୍କୁ ‘ନା ନା’ ଶୁଣାଇ ଥିବା ଏ ପୁଅଟି ବି ବାହା ହୋଇଯିବାକୁ ହିଁ ମନେ ମନେ ଅନାଇ ରହିଥିବ।
ଯେମିତି କଲେଜ ପଢ଼ା ବେଳୁ ହିଁ ବାହା ହୋଇ ଯିବାକୁ ଆମର ଜଣେ ନିହାତି ବଗୁଲିଆ ଜାତୀୟ ସାଙ୍ଗର ମନ ଏକ ରକମ ହମହମ ହେଉଥିଲା। ତା’ ବାପା ବି ଥିଲେ ଅଜବ। ପୁଅ ସହ ବନ୍ଧୁ ପରି ବ୍ୟବହାର କରୁଥିଲେ ଓ ଏଭଳି ମଧୁର ସମ୍ପର୍କରେ ଆହୁରି ମିଠାସ୍ ଭରି ଦେବା ଲାଗି ବୋଧେ ତା’ ସହ ପ୍ରାୟତଃ ଇଂଲିସ୍‌ରେ କଥା ହେଉଥିଲେ। ତ ଫାଇନାଲ ପରୀକ୍ଷା ଚାଲିଥାଏ। ହଠାତ ତା’ ବାପାଙ୍କର କ’ଣ ମନେ ହେଲା କେଜାଣି ପୁଅକୁ ପଚାରି ଦେଲେ: ବାବୁ ଏଥର ବାହା ହେବାକୁ ପସନ୍ଦ କରିବୁ କି? କହିବା ଲୋଡ଼ା ନାହିଁ ଯେ ପିତାଶ୍ରୀଙ୍କ ଏମନ୍ତ ଅୱଲ ନମ୍ବରିଆ ପ୍ରଶ୍ନରେ ବିମୋହିତ ହୋଇ ଯାଇଥିଲା ଆମ ବଗୁଲିଆ ସାଙ୍ଗ। ତେଣୁ, ସେ କ୍ଷଣି ଅଧିକ କିଛି ଗମ୍ଭୀର ପ୍ରତିକ୍ରିୟା ପ୍ରଦର୍ଶନ ନ କରି ନାମକୁ ମାତ୍ର ‘ନା’ ବୋଲି କହିବାକୁ ଯାଇ ବାପାଙ୍କୁ ଚୁମ୍ବକେ କହି ଦେଇଥିଲା ‘ଆଗେ ପରୀକ୍ଷା ସରୁ’! ବାପା ବୁଝି ଯାଇଥିଲେ ଯେ ଶୀଘ୍ର ବାହା ହେବା ହିଁ ହେଉଛି ତା’ ପରମ ଲକ୍ଷ୍ୟ!
ହେଲେ ସେ ସତରେ ଏଡ଼ିକି ବାଳୁଙ୍ଗା ଥିଲା ଯେ ଆମମାନଙ୍କ ଆଗରେ ଆସି ତା ଗତାନୁଗତିକ ଷ୍ଟାଇଲରେ ପ୍ରଚଣ୍ଡ ବିବୃତିଟାଏ ଏମନ୍ତ ଉଗାଳି ଥିଲା: ‘ମୋରି ବୟସର ହୋଇଥିବା ବେଳେ ମୋତେ ଉପୁଜାଇ ସାରିଥିବା ସେଇ ମଣିଷଟିକୁ ଆଉ କ’ଣ କହିଥାନ୍ତି କହୁନା?’
ଆଜିକାଲିକା ପୁଅଙ୍କ କଥା ତ ଆହୁରି ବିଚିତ୍ର! କମ୍ ସିଆଣିଆ ନୁହନ୍ତି ସେମାନେ! ସେମାନେ ଭଲ କରି ଜାଣନ୍ତି ଯେ ସେଇଆ କଲେ ଯାବତ ଝମେଲା। ‘ହଁ’ଟିଏ ଶୁଣିଲା ମାତ୍ରକେ ତଥାକଥିତ ଘର ଲୋକେ ମଧ୍ୟସ୍ଥି ମସୁଧା କରିବା, ପ୍ରସଙ୍ଗ ପକାଇବା ,ଫଟୋ ବାଛିବା, କନ୍ୟା ଦେଖା ପାଇଁ ଯିବା ଇତ୍ୟାଦି ଇତ୍ୟାଦି ସମ୍ବଳିତ ପାଲା ରୀତିମତ ସୁରୁ କରି ପକାଇବେ। ସୁତରାଂ ଇଦାନୀଂ ପ୍ରାୟ ଶତ ପ୍ରତିଶତ କ୍ଷେତ୍ରରେ ବାହା ହେବା କଥା ପଡୁପଡୁ ପୁଏ ଜାଣିଶୁଣି ଏମିତି ଉହୁଁ ଉହୁଁ ହେଉଛନ୍ତି ଯେ କହିଲେ ନ ସରେ!
ଫଳତଃ ପରବର୍ତ୍ତୀ ଜିଜ୍ଞାସା ମୋଚନ କ୍ରମରେ ‘ପ୍ରେମ ଫ୍ରେମ ଲଭ୍ ଫଭ୍ କରୁଚୁ କିରେ? କାହାକୁ ପସନ୍ଦ କରି ସାରିଚୁ ତ’ କହି ଦେ’ ବୋଲି ଅବିଳମ୍ବେ ପଚରା ଯିବାର ଅବସର ସ୍ୱତଃ ହାଜର ହେବାକୁ ବାଧ୍ୟ। ତେବେ, ଏ ପ୍ରଶ୍ନମାନ ପଚରା ଯିବା ପରେ ବି କେହି କେହି ମୌନମୁହାଁ ନିହାତି ଉପର ଦେଖାଣିଆ ଭାବେ ‘ନା ନା ସେମିତି କିଛି ନାହିଁ, ଏବେ ଏ ସବୁ କଥା କାହିଁକି ଉଠୁଛି?’ ଜାତୀୟ ମାମୁଲି ପ୍ରତିକ୍ରିୟାମାନ ପ୍ରଦର୍ଶନ କରି ଦିନା କେତେ ‘ମୋତେ ଛୁଁ ମୋତେ ଛୁଁ’ ଖେଳ ଖେଳିଥାନ୍ତି। ସେମନ୍ତ କ୍ଷେତ୍ରରେ ଘର ଲୋକେ ତୁରନ୍ତ ଜାଣିଯିବା ଚାହି ଯେ ବାବୁ ଜଣକ ପିଛାରେ ଲାଗି ନ ରହିଲେ ଅଚିରେ ସେ ଜନୈକା ନବାଗତାଙ୍କ ସହ ହାତ ଧରାଧରି ହୋଇ ଆସି ‘ଇଏ ମୋ ବୋଉ, ଆଉ ଇଏ ବାପା’ ବୋଲି ତାଙ୍କୁ ଚିହ୍ନାଇ ସମ୍ମାନ ପ୍ରଦର୍ଶନ କରିବା ଭଳି କର୍ତ୍ତବ୍ୟ ସଂପାଦନ କରିବାକୁ କହିବେ।
ସୁତରାଂ, ଅବଶେଷେ ଅବଶ୍ୟ ଏତିକି କହି ହେବ ଯେ ‘ବାହା’ ନ ହେବା ପାଇଁ ସବୁ ‘ବାହାନା’ ମିଛିମିଛିକା ସିନା! ପୁନଶ୍ଚ କହି ରଖାଯାଉ ଯେ ଏଇ ‘ବାହା-ନା’ ଭିତରେ ଥିବା ‘ନା’ଟିକୁ ନିକାଲି ଦେଲେ ଜାଣ ଯେ ଜଣେ ‘ବାହା’ ହୋଇ ପଡ଼ିବା ଥୟ!
ମୋ: ୯୪୩୭୯୦୯୬୭୫